Ranko Krivokapiç: Son on ildə Azərbaycan

çox böyük nailiyyətlər əldə etmişdir

İyunun 27-də Azərbaycan Respublikası Milli Məclisinin sədri Oqtay Əsədov ATƏT Parlament Assambleyasının prezidenti, Monteneqro Respublikası parlamentinin sədri Ranko Krivokapiç ilə görüşmüşdür.

AzərTAc xəbər verir ki, görüşdə Oqtay Əsədov Azərbaycan-ATƏT münasibətlərinin inkişaf etdiyini demiş, yüksək səviyyəli səfərlərin bu inkişafa təkan verdiyini bildirmişdir. Milli Məclisin sədri vurğulamışdır ki, Azərbaycan ATƏT ilə əlaqələrin daha da inkişaf etdirilməsində maraqlıdır və Assambleyanın işində fəal iştirak edir.

ATƏT Parlament Assambleyasının 23-cü illik sessiyasının Azərbaycanda keçirilməsini yüksək qiymətləndirən sədr sessiyanın səmərəli keçməsi üçün bütün lazımı işlərin görüldüyünü qeyd etmişdir. O, sessiya çərçivəsində bir sıra önəmli məsələlərin müzakirə olunacağını da əlavə etmişdir.

Ermənistan-Azərbaycan, Dağlıq Qarabağ münaqişəsinə toxunan Milli Məclisin sədri vurğulamışdır ki, Ermənistan Helsinki Yekun Aktının prinsiplərini kobudcasına pozmuşdur. Münaqişə nəticəsində Azərbaycan ərazisinin 20 faizi işğal olunmuş, bir milyondan çox insan qaçqın və məcburi köçkünə çevrilmişdir. Təəssüf ki, ATƏT Parlament Assambleyası tərəfindən bu istiqamətdə heç bir addım atılmamışdır. İyirmi ildir ki, ATƏT-in Minsk qrupu münaqişənin həlli ilə məşğuldur, ancaq heç bir nəticə yoxdur. Oqtay Əsədov vurğulamışdır ki, Azərbaycan bütün dövlətlərin ərazi bütövlüyünü dəstəkləyir. Biz istəyirik ki, ATƏT məkanında olan bütün dövlətlərin problemlərinə eyni yanaşma nümayiş etdirilsin. Biz qurumun təsir mexanizmlərinin daha güclü olmasını istəyirik.

Ranko Krivokapiç ATƏT PA-nın Bakıda sessiyasının yüksək səviyyədə keçməsi üçün hər cür şəraitin yaradıldığını demişdir. Buna görə də o, ATƏT-in bütün qurumları adından Azərbaycana təşəkkürünü bildirmişdir.

ATƏT PA-nın prezidenti vurğulamışdır ki, son on ildə Azərbaycan hər kəsi heyrətləndirə biləcək böyük nailiyyətlər əldə etmişdir.

ATƏT-ə üzv dövlətlərin ərazi bütövlüyü ilə bağlı məsələlərin hər zaman önəmli olduğunu bildirən R.Krivokapiç Dağlıq Qarabağ münaqişəsinin gələcək sessiyalarda müzakirə edilə biləcəyini söyləmişdir.

Azərbaycan.-2014.- 28 iyun.- S.5.