Azərbaycanda etnik, milli, dini mənsubiyyətindən asılı olmayaraq bütün vətəndaşların hüquq və azadlıqlarının təminatı daim diqqət mərkəzindədir

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev mərkəzi qərargahı Brüsseldə yerləşən Beynəlxalq Sərhədsiz İnsan Haqları Təşkilatının (BSİHT) direktoru Villi Fetr ilə görüşmüşdür.

AzərTAc xəbər verir ki, görüşdə insan hüquqları sahəsində böyük təcrübəyə malik olan BSİHT-in direktoru Şuranın maliyyə dəstəyi ilə həyata keçirdikləri "Azərbaycanda birgə yaşayış: etnik fərqliliyin idarə edilməsi və tolerantlıq mədəniyyəti" layihəsinin icra vəziyyəti haqqında məlumat vermişdir.

Villi Fetr martın 6-dək Azərbaycanın rus, polyak, avar, tatar, ləzgi, talış, erməni, ukraynalı, bolqar, kürd, yunan, kazak və axıska türkləri icmalarının nümayəndələri ilə görüş keçirəcəklərini vurğulamışdır. Qonaq səfərin nəticəsi olaraq hazırlayacaqları hesabatın cari ilin sentyabrında Avropa Parlamentinin yeni seçilmiş üzvlərinə, oktyabrda isə Varşavada ATƏT-in Demokratik Təsisatlar və İnsan Haqları Bürosuna (DTİHB) təqdim olunacağını qeyd etmişdir.

Azay Quliyev Azərbaycanda etnik, milli, dini mənsubiyyətindən asılı olmayaraq bütün vətəndaşların hüquq və azadlıqlarının təminatı məsələsinin daim diqqətdə saxlanıldığını bildirmişdir. Şura sədri ölkəmizdə yüz illərdən bəri mövcud olan multikulturalizm mühiti haqqında danışmış və demokratikləşmə istiqamətində həyata keçirilən işlərlə bağlı məlumat vermişdir. Vurğulanmışdır ki, saylarından asılı olmayaraq əksər etnik qruplar Azərbaycan parlamentində də təmsil olunur və onlar vətəndaş hüquqlarından tam şəkildə istifadə edirlər.

Azərbaycan.-2014.- 4 mart.- S.2.