Ombudsman Aparatının əməkdaşı Kişineuda

regional konfransda iştirak etmişdir

Moldova Respublikasının paytaxtı Kişineu şəhərində Avropa İttifaqı və Avropa Şurasının birgə proqramı çərçivəsində "Penitensiar sistemdə pis rəftarla mübarizənin səmərəliliyinin təmin edilməsi" mövzusunda regional konfrans keçirilmişdir.

Azərbaycan Respublikasının İnsan Hüquqları üzrə Müvəkkili Aparatının İşgəncələrin qarşısının alınması şöbəsi müdirinin müavini Absələddin Əliyev tədbirdə iştirak etmişdir.

Ombudsman Aparatından AzərTAc-a bildirmişlər ki, beynəlxalq qurumların tanınmış ekspertləri, habelə Azərbaycan, Gürcüstan, Moldova, Ukrayna və Ermənistandan olan dövlət orqanlarının və qeyri-hökumət təşkilatlarının təmsilçiləri bu sahədəki fəaliyyətləri barədə ətraflı məlumat vermişlər.

A.Əliyev tədbirdə Azərbaycan Ombudsmanının işgəncələr əleyhinə milli preventiv mexanizm (MPM) qismində gördüyü işlər, milli qanunvericiliyin təkmilləşdirilməsi ilə bağlı təklifləri, azadlıqdan məhrumetmə yerlərinə, o cümlədən penitensiar müəssisələrə başçəkmələrin həyata keçirilməsi, habelə "Həbs yerlərində saxlanılan şəxslərin hüquq və azadlıqlarının təmin edilməsi haqqında" Azərbaycan Respublikasının Qanunu və onun tətbiqi ilə bağlı tədbirlər haqqında məlumat vermişdir. O, Azərbaycan MPM sahəsində təcrübəsini iştirakçıların diqqətinə çatdırmış, sualları cavablandırmışdır.

Tədbirdə həmçinin Azərbaycan Respublikası Baş Prokurorluğunun, Ədliyyə Nazirliyi Penitensiar Xidmətinin və Daxili İşlər Nazirliyinin məsul əməkdaşları, Avropa Şurasının ölkəmizdəki ofisinin nümayəndəsi, Konstitusiya Araşdırmalar Mərkəzinin rəhbəri də iştirak etmişlər.

Regional konfrans səmərəli müzakirələr və təcrübə mübadiləsi şəraitində başa çatmışdır.

Azərbaycan.-2014.- 4 mart.- S.2.