Qazax Sement Zavodu

İllik gücü bir milyon tondur

2014-cü il "Sənaye ili"dir

Keçən il ölkədə 30-dan çox sənaye müəssisəsi istifadəyə verilmişdir. Onlardan biri də Qazax Sement Zavodudur. Avey dağının ətəyində yerləşir. Burada əhəng ehtiyatı çoxdur. Ona görə də sement zavodu üçün məhz bu dağ seçilmişdir.

Müəssisənin texnoloji sistemi və baş planı "Azərdövlətmaşlayihə" institutu tərəfindən hazırlanmışdır. Bu mühüm layihənin mühəndis-məsləhətçisi Türkiyənin "SC İndustry A.Ş." şirkətidir.

Zavodun tikintisini "Akkord Sənaye Tikinti İnvestisiya Korporasiyası"nın müvafiq departamentləri və Azərbaycanın inşaat-quraşdırma şirkətləri həyata keçirir. Xüsusi təcrübə tələb olunan işlər üçün Çin Xalq Respublikasının "Sinoma" şirkəti dəvət edilmişdir. Burada təxminən dörd min ton avadanlığın, beş min ton metal hisssələrin quraşdırılması və digər işlərin görülməsi "Hidroenerji quraşdırma" şirkətinin mütəxəssislərinə həvalə olunmuşdur.

Sementin keyfiyyətinin müntəzəm yoxlanılması üçün Almaniya, Fransa, İsveçrə və Türkiyənin aparıcı şirkətlərinin avadanlıqları ilə təchiz olunmuş kimyəvi və fiziki laboratoriya qurulmuşdur.

Zavodun avtomatik idarəetmə sistemi "Siemens" firması mütəxəssisləri tərəfindən proqramlaşdırılmış, ən müasir avadanlıqlarla təchiz edilmişdir. Əslində bu, beynəlxalq səviyyəli layihədir.

Müstəqil ölkəmizin həyatı üçün xüsusi əhəmiyyəti olan bu mühüm obyektin inşasına 2010-cu ilin mart ayında başlanmışdır. 2012-ci ilin aprel ayının 12-də dövlət başçısı İlham Əliyevin bu yerlərə səfəri kollektivin böyük ruh yüksəkliyinə səbəb olmuşdur. Prezident inşaat işlərinin gedişi ilə ətraflı tanış olub bu mühüm obyektin inşasının vaxtında və yüksək keyfiyyətlə başa çatdırılması üçün konkret tövsiyə və tapşırıqlar verdi.

Respublikada quruculuq işlərinin getdikcə genişləndiyini xüsusi vurğulayan cənab İlham Əliyev dedi ki, "sement zavodu... ölkə üzrə çox böyük bir layihədir. Bu həm ölkə iqtisadiyyatına böyük töhfədir, həm iş yerlərinin artırılması üçün çox vacibdir, orada yüzlərlə insan işləyəcəkdir. Çalışırıq ki, hər yerdə işlər yaxşı getsin, iş yerləri açılsın, insanların yaşayış səviyyəsi yüksəlsin və gözəl şərait olsun. Bu yol inkişaf deməkdir".

Dövlət başçısının tapşırıqlarına layiqincə əməl edən kollektiv sement istehsalı xətti üzrə inşaat və quraşdırma işlərini uğurla başa çatdıraraq 2013-cü ilin aprel ayında məhsul istehsalına başlamışdır. Burada istehsal "quru" üsulla həyata keçirilir. Müəssisənin illik gücü bir milyon tondur.

Bu günlərdə Avey dağında zavodun işi ilə tanış olduq. Çox böyük müəssisədir. Ümumi tikinti kompleksinə 49 bina və digər qurğular daxildir. Avtomobil yolu, dəmir yolu, su, qaz və elektrik xətləri çəkilib. Sel bəndinin tikintisi və s. işlər həyata keçirilib.

Zavod ərazisində işçilər üçün altımərtəbəli dördulduzlu mehmanxana, 250 yerlik müasir avadanlıqlarla təchiz olunmuş yeməkxana, 69 otaqlı beşmərtəbəli inzibati bina tikilib. Məişət və istehsalat sularının təmizlənməsi məqsədilə bakterioloji kompleks quraşdırılıb.

Ən müasir texnologiyadan istifadə olunan zavodda müxtəlif markalı sementin istehsalı uğurla davam etdirilir. Müştəriləri daim yüksək keyfiyyətli məhsulla təmin etmək və alıcılarda məmnunluq yaratmaq üçün xammalın və istehsal olunan sementin keyfiyyəti zavodun laboratoriyasında müntəzəm yoxlanılır və keyfiyyətinə daim nəzarət edilir. Zavodda dedilər ki, ona görə də Qazax sementinə tələb və ehtiyac böyükdür.

Zavodda kollektivə qayğı ön planda durur. Maliyyə və mühasibatlıq bölməsinin rəhbəri Əlif Məmmədov bildirdi ki, hazırda zavodda 700 nəfərdən çox işçi çalışır. Onların 80-90 faizi Qazax və qonşu rayonların sakinləridir. Onlar nəqliyyatla və isti yeməklə təmin olunurlar.

Qazax Sement Zavodu ahəngdar işləyir. Bununla yanaşı, ikinci növbənin inşasında qızğın iş gedir. "Hidroenerji Quraşdırma" MMC-nin sahə rəisi Çingiz Əliyev bizi görülən işlərlə tanış edib dedi ki, digər quraşdırma işləri ilə yanaşı, istehsal üçün xüsusi əhəmiyyət daşıyan klinker adlı yarımfabrikatın hazırlanması üçün layihənin quraşdırılması ilə məşğuluq. Zavodun ərazisində klinika binası, uşaqlar və böyüklər üçün idman meydançaları və başqa obyektlər də inşa olunur.

Respublikanın sərhəd bölgəsində çox mühüm bir zavodun inşası başa çatıb, səriştəli kadrlar yetişib, işlər ahəngdar gedir. İlk addımlar uğurludur. Bu hünərvər kollektivin ən böyük uğurları isə hələ öndədir.

Əhməd İSAYEV,

Azərbaycan.-2014.- 5 mart.- S.5.