Mədəniyyət və Turizm Nazirliyində İslam Əməkdaşlıq

Təşkilatının baş katibi ilə görüş keçirilmişdir

Mədəniyyət və Turizm Nazirliyində İslam Əməkdaşlıq Təşkilatının (İƏT) baş katibi İyad bin Amin Mədəni ilə görüş keçirilmişdir.

AzərTAc xəbər verir ki, mədəniyyət və turizm naziri Əbülfəs Qarayev İyad bin Amin Mədənini İƏT-in baş katibi seçilməsi münasibətilə təbrik etmişdir.

Azərbaycanın mədəni həyatı barədə qonağa məlumat verən Ə.Qarayev bildirmişdir ki, hazırda xalqımız ən əlamətdar bayramlarından birinə - baharın gəlişinin rəmzi olan Novruz bayramına hazırlaşır.

Nazir İyad bin Amin Mədəninin yeni vəzifəyə təyin olunandan sonra Azərbaycana səfərini ikitərəfli əməkdaşlığın yaxşı göstəricisi kimi qiymətləndirmişdir.

İyad bin Amin Mədəni İƏT-in baş katibi vəzifəsinə seçkilərdə onu dəstəklədiyinə görə Azərbaycana minnətdarlığını bildirmiş, ölkəmizin İƏT çərçivəsində geniş fəaliyyətini vurğulamış və əməkdaşlığın davam etdiriləcəyinə ümidvar olduğunu bildirmişdir.

Görüşdə Azərbaycan ilə İƏT arasında bir çox sahələrlə yanaşı, mədəniyyət və turizm sahəsində də əməkdaşlığı genişləndirmək məsələlərinə dair fikir mübadiləsi aparılmışdır.

Baş katib vurğulamışdır ki, İƏT torpaqlarının işğaldan azad edilməsinə və ərazi bütövlüyünün bərpa olunması istiqamətində Azərbaycan Respublikasının təşəbbüs və səylərini dəstəkləyir.

Azərbaycan.-2014.- 6 mart.- S.2.