Azərbaycanın fövqəladə hallar naziri

Xorvatiyanın keçmiş Prezidenti ilə görüşmüşdür

Azərbaycan Respublikasının fövqəladə hallar naziri general-polkovnik Kəmaləddin Heydərov Bakıda keçirilən II Qlobal Açıq Cəmiyyətlər Forumunda iştirak edən Xorvatiya Respublikasının keçmiş Prezidenti Stepan Mesiç ilə görüşmüşdür.

Görüşdə nazir Fövqəladə Hallar Nazirliyinin fəaliyyət istiqamətləri, strukturu barədə ətraflı məlumat vermişdir. Həmçinin nazirliyin nüfuzlu beynəlxalq və regional təşkilatlarla, xarici dövlətlərin müvafiq qurumları ilə əlaqələrinin inkişaf etdirilməsi istiqamətində görülən işlər qonağın diqqətinə çatdırılmışdır.

Fövqəladə Hallar Nazirliyindən AzərTAc-a bildirmişlər ki, qonaq Azərbaycan ilə Xorvatiya arasında aidiyyəti qurumların əməkdaşlıq əlaqələrinin daha da dərinləşdirilməsinin və inkişaf etdirilməsinin vacibliyini vurğulamışdır.

Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.

Azərbaycan.-2014.- 1 may.- S.2.