XOŞ NIYYƏTLƏR FONDU

Qayda budur: igid gedər, ad qalar,

Yaxşıdan da, yamandan da ağızda bir dad qalar.

Bu iki misralıq məşhur deyimdə çox sadə həyat həqiqəti özünə yer tapmışdır. Bəli, dünyaya gələn insan Allahın ona ayırdığı ömür payını yaşadıqdan sonra əbədiyyətə qovuşur. Özündən sonra adı, gördüyü işləri və əməlləri qalır. Sonrakı nəsillər isə görmədikləri, müasiri olmadıqları insanlara qiymət verərkən onların sağlıqlarında xalqın və dövlətin rifahı naminə gördükləri işlərə əsaslanaraq dəyərləndirirlər.

Azərbaycan xalqının tarixində elə simalar və görkəmli şəxsiyyətlər olub ki, onların gördükləri işlər bir dövrə sığmayıb, əsrlərin və nəsillərin yaddaşında özünə əbədi yer qazanıb. Hətta elə nadir şəxsiyyətlər də var ki, onların əməlləri və ideyaları cismani yoxluqları dövründə belə davam etdiyindən daim canlı və yaşarı hiss olunurlar. Hərdən isə belə əməl və zəka sahiblərinin adını daşıyan fondlar və qurumlar təsis edilərək onların işlərini uğurla davam etdirənlərə, nəcib və xeyirxah əməllərini bütün dövrlərdə yaşatmaq istəyənlərə də təsadüf olunur.

Mövcudluğunun on ili ərzində xalqın həqiqi məhəbbət və inamını qazanan Heydər Əliyev Fondu da belə qurumlardandır. Xoş niyyətlər mücəssəməsinə çevrilən bu fond ulu öndər Heydər Əliyevin Azərbaycana rəhbərlik etdiyi bütün dövrlərdə gördüyü gərəkli, nəhəng və xeyirxah işləri nəinki yaşadır, hətta yeni dövrün tələb və prinsiplərinə uyğun şəkildə davam və inkişaf etdirir.

Ulu öndər Heydər Əliyev müəyyən fasilə ilə iki dəfə Azərbaycana rəhbərlik edib. Hər iki rəhbərlik dövrü zamanca fərqli olsa da, mahiyyətcə bir-birinə bənzəyib.

Heydər Əliyev birinci dəfə Azərbaycana rəhbər seçiləndə Azərbaycan geridə qalmış, SSRİ miqyasında belə tanına bilməmiş yoxsul ölkə idi.

Ulu öndərin rəhbərliyi dövründə Azərbaycan özünü sərbəst yaşatmaq qabiliyyətinə malik dörd respublikadan birinə çevrildi. Ölkədə sənaye və kənd təsərrüfatı yüksək inkişaf mərhələsinə qədəm qoydu, əhalinin maddi rifahı əsaslı şəkildə yaxşılaşdı, kəndlər, şəhərlər müasirləşdi, səhiyyə, elm, mədəniyyət və təhsil ön mövqelərə çıxdı.

Heydər Əliyev xalqın arzu və tələbi ilə ikinci dəfə ölkə rəhbərliyinə qayıdanda isə Azərbaycan xaos, anarxiya və qanunsuzluq burulğanında boğulurdu. Ölkə iqtisadiyyatı pozularaq dağılmış, kolxoz və sovxozlar talan edilərək iflic vəziyyətinə salınmış, əhali işsiz qalaraq tam yoxsullaşmışdı.

Eyni zamanda bir neçə istiqamətdə uğurlu fəaliyyət göstərə bilən bu siyasət nəhəngi az vaxtda müharibə bölgəsində atəşkəsə, ölkədə möhkəm və dönməz sabitliyə nail oldu, dövlət çevrilişi cəhdlərinin qarşısını alaraq ölkədə əmin-amanlıq və sülh yaratdı. Referendum yolu ilə yeni Konstitusiya hazırlanaraq qəbul edildi, özəlləşdirmə proqramları yerinə yetirildi, aqrar islahatları gerçəkləşdirildi, bazar iqtisadiyyatı münasibətlərinə keçid və demokratik cəmiyyət quruculuğunda uğurlu addımlar atıldı, "Əsrin müqaviləsi" neft kontraktı imzalanaraq Azərbaycanın iqtisadi yüksəlişi və dünya birliyinə inteqrasiyası prosesinin əsası qoyuldu.

Heydər Əliyev çoxcəhətli və yorulmaz fəaliyyəti ilə daim Azərbaycanı gerilikdən inkişafa, yoxsulluqdan firavanlığa, böhrandan və parçalanma təhlükəsindən dünyanın sayılıb-seçilən üzvləri sırasına çıxaran, Azərbaycan xalqının mədəni, mənəvi intibahını təmin edən dövlət başçısı olduğunu tarix qarşısında dönə-dönə sübut edib.

Ulu öndərin bu siyasət və fəaliyyəti "Heydər Əliyev siyasi kursu" adı ilə ölkəmizdə və bütün dünyada birmənalı şəkildə qəbul olunmuşdur!

Bu gün də Azərbaycanda Heydər Əliyev siyasi kursu qətiyyət və prinsipiallıqla davam etdirilir!

Nə qədər ki Azərbaycan xalqı var, bu siyasi kurs müstəqil dövlətimizin möhkəmliyini və inkişafını təmin etməklə daim bizi uğur və qələbələrə çatdıracaqdır!

Ulu öndər Heydər Əliyev cismən bizi tərk etsə də, qoyduğu yol və müəyyən etdiyi siyasi kursla indi də xalqımıza və dövlətimizə yol göstərərək xidmət göstərir!

Ümummilli lider Heydər Əliyevin humanizim və insanpərvərlik siyasəti isə öz təcəssümünü Heydər Əliyev Fondunun fəaliyyətində tapmaqda və gerçəkləşməkdədir.

Heydər Əliyev Fondu barədə söhbət açmazdan əvvəl Prezident İlham Əliyevin bu mötəbər qurumun fəaliyyətinə verdiyi qiymətlə tanış olaq.

Heydər Əliyev Fondunun beş illik fəaliyyətindən danışan cənab İlham Əliyev görülən işləri yüksək dəyərləndirməklə yanaşı, onun ümumxalq fondu olduğunu və çoxcəhətli fəaliyyətini də qabartmışdır: "Heydər Əliyev Fondu, sözün əsl mənasında, ümumxalq fondu olmuşdur. Bu fondun xətti ilə aparılan işlər, görülən tədbirlər, irəli sürülmüş təşəbbüslər göz qabağındadır. İstər təhsil, istər səhiyyə sahəsində, mədəniyyət sahəsində, mənəvi irsimizin qorunması işində, Azərbaycanın dünya birliyində təbliğ edilməsi işində, Azərbaycanın olduğu kimi təqdimatı işində, Ermənistan-Azərbaycan, Dağlıq Qarabağ münaqişəsinin geniş mənada dünya birliyinə düzgün şəkildə çatdırılması işində Heydər Əliyev Fondunun rolunu mən çox yüksək qiymətləndirirəm. Bu fond sübut etdi ki, əgər istək olarsa, əgər iradə olarsa və əgər xoş niyyət olarsa, istənilən sahədə istənilən məsələ həll oluna bilər. Bu fondun çoxşaxəli fəaliyyətini əgər bir sözlə xarakterizə etmək mümkündürsə, mən "xoş niyyət" deyərdim. Çünki bütün sahələrdə biz bunu görürük".

Dövlət başçısı fondun milliliyini onu sevdirən əsas məqamlardan biri kimi qeyd edir: "Heydər Əliyev Fondu milli fonddur. Fondun bütün təşəbbüsləri milli ruha əsaslanır".

Fəaliyyətində ümumbəşəri dəyərlərə hörmətlə yanaşıldığını diqqətə çəkir: "Heydər Əliyev Fondu mədəniyyət sahəsində və digər sahələrdə, ölkə həyatında önəmli bir amilə çevrilibdir və əminəm ki, fond bundan sonrakı fəaliyyətində də ümumbəşəri prinsipləri irəliyə aparacaqdır".

Fond Azərbaycan xalqını və dövlətini daim yeniləşməyə və müasirləşməyə səsləyir: "Heydər Əliyev Fondu Azərbaycanı gələcəyə aparan gözəl bir vasitədir. Modernləşmə, müasirləşmə, dünya birliyinə inteqrasiya, Azərbaycanın milli maraqlarının müdafiə edilməsi, Azərbaycanın olduğu kimi dünyada təqdim edilməsi - bütün bu şərəfli funksiyalar bu fondun üzərinə düşübdür. Düşübdür deyəndə, fond və fondun rəhbərliyi bütün bu işləri öz təşəbbüsü ilə görür, mən bunu da deməliyəm".

Dövlət başçısının söylədikləri Heydər Əliyev Fondunun fəaliyyətinin əsas istiqamətləri barədə dəyərli fikirlərdir. Təbii ki, bu yığcam fikirlərdə fondun gördüyü çoxşaxəli işlərin hamısının əhatə olunması mümkünsüzdür. Heydər Əliyev Fondu daha çox ölkə və beynəlxalq miqyaslı irihəcmli layihələri gerçəkləşdirməklə məşğul olur. Onların bəzilərini birlikdə nəzərdən keçirək.

Fondun fəaliyyətini uğurlu edən ən mühüm amillərdən biri ona Azərbaycanın birinci xanımı, Milli Məclisin deputatı, UNESCO və ISESCO-nun xoşməramlı səfiri Mehriban xanım Əliyevanın rəhbərlik etməsidir. Çünki Mehriban xanım Əliyevanın təbiətinə xas olan alicənablıq və mərhəmət duyğuları fondun fəaliyyətinin insanpərvərliyinə çox müsbət təsir göstərir. Ötən on il ərzində insanların sağlamlığı, gənc nəslin təlim-tərbiyəsi, valideyn himayəsindən məhrum olan uşaqların məişət şəraitinin yaxşılaşdırılması, milli mədəniyyətimizin inkişafı və təbliği, tarixi, mədəniyyət və dini abidələrin bərpası və qorunması, ekologiyanın təmizlənməsi, xüsusi qayğıya ehtiyac duyan insanların himayəyə alınması fondun diqqət mərkəzində saxladığı məsələlər sırasında olmuşdur.

"Yeniləşən Azərbaycana yeni məktəb" layihəsi Azərbaycanın bütün bölgələrində yeni məktəb binalarının inşası, qəzalı və köhnəlmiş tikililərin əsaslı təmir və yenidənqurmadan sonra müvafiq avadanlıqlarla təmin edilməsində mühüm rol oynamışdır.

"Uşaq evləri və internat məktəblərinin inkişafı" proqramı uşaq müəssisələrində yaşayış və təhsil şəraitinin yaxşılaşdırılmasına, asudə vaxtın səmərəli təşkilinə yeni töhfələr vermişdir.

Hazırda Azərbaycanda doğma yurd-yuvasından zorla qovularaq məcburi köçkün və qaçqın vəziyyətində yaşayan bir milyona yaxın insan vardır. Dövlət bu qəbildən olan vətəndaşlarına daim xüsusi qayğı və diqqət göstərir. "Təhsilə dəstək" layihəsi isə hər il məcburi köçkün ailələrindən olan birinci sinif sagirdlərinin çanta və digər dərs ləvazimatları ilə təmin olunmasına xidmət göstərir.

"Kor və görmə qabiliyyəti zəif olan insanların informasiya-kommunikasiya texnologiyalarına çıxışının təmin edilməsi" layihəsi kor və görmə qabiliyyəti zəif uşaqlar üçün respublika internat məktəbində model İKT sinfinin, audiostudiyanın, Brayl əlifbalı zəngin kitabxananın yaradılmasına dəstək verib.

2004-cü ildən başlayaraq "Diabetli uşaqlara ən yüksək qayğı" layihəsi çərçivəsində bu xəstəliklərə düçar olan 14 yaşınadək uşaqlar müntəzəm şəkildə insulin preparatları və şpris-qələmlərlə təmin edilir.

"Talassemiyasız həyat naminə" layihəsi əsasında inşa edilərək 2009-cu ildə istifadəyə verilən mərkəz bu xəstəlikdən əziyyət çəkənlərin əsl dayağına çevrilmişdir.

"Tolerantlığın ünvanı - Azərbaycan" layihəsi məscidlərlə yanaşı, pravoslav və katolik kilsələrinin bərpasına, habelə dünyanın bir sıra ölkələrində yerləşən dini məbədlərin təmirinə və rekonstruksiyasına, yeni dini ibadətgahların inşasına yardım göstərilməsinə hesablanıb və ciddi uğurlar qazanılıb.

Hazırda ölkəmizin hər bir guşəsində xalqın məhəbbət və ehtiramının ifadəsi kimi Heydər Əliyev muzeyləri və Heydər Əliyev mərkəzləri tikilərək fəaliyyət göstərir. Heydər Əliyev Fondu bu muzeylərin müvafiq eksponatlar, sənədlər, fotoşəkillər və digər əyani vasitələrlə təmin olunmasını həyata keçirir.

Fondun gördüyü işlər sırasında Ermənistan-Azərbaycan, Dağlıq Qarabağ probleminin həllinə yardım ön yeri tutur. Qarabağ həqiqətlərinin dünya ictimaiyyətinə, beynəlxalq təşkilatlara çatdırılması və daim gündəmdə saxlanması üçün müxtəlif forma və metodlardan istifadə olunur. Ölkə xaricində maarifləndirmə işlərinin aparılması üçün müxtəlif dillərdə şoxsaylı kitablar və bukletlər buraxılır, sənədli və tarixi filmlər çəkilərək hər tərəfə yayılır. İşğal və matəm günlərində keçirilən tədbirlərdə fondun təşəbbüsü ilə xaricdə oxuyan azərbaycanlı tələbələrin, habelə türk diasporunun gücündən səmərəli istifadə olunur. Heydər Əliyev Fondunun vitse-prezidenti Leyla Əliyevanın rəhbərliyi ilə bir neçə ildir gerçəkləşdirilən "Xocalıya ədalət" kampaniyası öz uğurlu nəticəsini vermiş, əllidən çox dövlətin parlamenti, ayrı-ayrı təşkilatlar faciənin soyqırımı kimi tanınması ilə bağlı qərarlar qəbul etmişlər.

Fondun ən uğurlu layihələrindən biri Bakıda Beynəlxalq Muğam Mərkəzinin istifadəyə verilməsi olmuşdur. Bu musiqi məbədi UNESCO tərəfindən bəşəriyyətin şifahi və qeyri-maddi mənəvi irsinin şah əsərləri siyahısına daxil edilmiş Azərbaycan muğamının inkişafına və dünyada tanınmasına böyük töhfələr vermişdir. Dünyada ilk dəfə olaraq "Muğam aləmi" Beynəlxalq muğam festivalı bu mərkəzdə keçirilmişdir.

Azərbaycanın dünyada daha yaxından tanınması və beynəlxalq imicinin formalaşması sahəsində Heydər Əliyev Fondunun gördüyü işlərin analoqu yoxdur. Son illərdə fond tərəfindən gerçəkləşdirilən mədəni-kütləvi tədbirlərin qısa siyahısını diqqətə çəkirik: Parisdə, Miluzda və Reymsdə Məhsəti Gəncəvinin və Nizami Gəncəvinin həyat və yaradıcılığına həsr olunmuş sərgi və konsertlər, Ştutqartda "Azərbaycan gecəsi", BMT-nin mənzil-qərargahında "Azərbaycan - tolerantlıq məkanı" adlı fotosərgi, Parisdə "Azərbaycan - tolerantlıq məkanı" adlı fotosərgi, UNESCO-da "Azərbaycan - tolerantlıq məkanı" adlı fotosərgi, "Qız qalası" Beynəlxalq incəsənət festivalı, "Tullantıdan sənətə" adlı beynəlxalq sərgi, Kann, Miluz, Strasburq, Şabli, Bove, Van, La Roşel, Bordo, Evian və Leqldə "Qafqazın mirvarisi olan Azərbaycanın mədəni dəyərləri" sərgi və konserti, Vatikanda "Azərbaycanın zəngin incilərinə tarixi baxış" sərgisi, Fransanın San-Trope şəhərində "Azərbaycanın mədəni zənginlikləri" adlı sərgi, UNESCO-da Azərbaycan xalçalarına həsr olunmuş sərgi, Parisdə "Odlar yurdu Azərbaycanın müasir əsərləri" sərgisi, Londonda "Azərbaycan xalçaları ilə nağıllar aləminə" sərgisi, "Mən Azərbaycanı sevirəm" rəsm sərgisi.

Venesiya Biennalesində Azərbaycan pavilyonu, Hamburqda və Kölndə "Azərbaycan gecəsi", Münhendə Azərbaycan mədəniyyəti gecəsi, Romada "Azərbaycan: mədəniyyət ruzigarı" adlı mərasim, İtaliyada Azərbaycan mədəniyyəti günlərinin başa çatması ilə bağlı mərasim, Avropa Parlamentinin mənzil-iqamətgahında Azərbaycan mədəniyyəti günləri.

Qəbələ Beynəlxalq musiqi festivalı, beyn

əlxalq muğam festivalları, Muğam televiziya müsabiqəsi, Florensiyada Azərbaycan incəsənət ustalarının konserti, "San-Remo festivalının ulduzları Bakıda" konserti, Mstislav Rostropoviç adına Beynəlxalq musiqi festivalı, "Eurovision" Mahnı Müsabiqəsi, UNESCO-da "Azərbaycanın gənc istedadları" konsert proqramı, Beynəlxalq Aşıq Festivalı.

Bakıda, Parisdə "YARAT!" Müasir İncəsənət Məkanının "Ev. Doğma ev" mövzusunda sərgiləri, Bakıda, Londonda, Parisdə, Berlində, Moskvada, Romada, Vyanada "Bakıya uçuş. Müasir Azərbaycan incəsənəti" sərgiləri, Bakıda "Avrovision - Afrikadan müasir incəsənət", "Fransa inciləri", "Uşaqlar və müharibə", "Azərbaycan əcnəbilərin gözü ilə" sərgiləri.

Hətta adi sadalama belə tədbirlərin sayının çoxluğu və möhtəşəmliyi barədə dolğun təsəvvür yaradır. Siyahını bir qədər uzatsaq da, hələ xeyli ixtisar aparmalı olduq. Amma heç zaman kəmiyyət çoxluğu keyfiyyət azlığına səbəb olmayıb. Əksinə, fondun tədbirləri hər dəfə əvvəlkilərdən daha maraqlı və üstün keçir.

Heydər Əliyev Fondunun ən böyük nailiyyəti insanların inam və etibarını qazanmasıdır. Bu gün köməyə ehtiyacı olan, bəzən hər yerdən əli üzülərək çıxılmaz vəziyyətdə nə edəcəyini kəsdirməyən insanlar ümid və əminliklə fonda üz tuturlar. Təsadüfi deyil ki, fonda dövlət qurumları qədər, bəlkə də ondan daha artıq məktub və xahiş ünvanlanır. Əlbəttə, hər müraciətdəki istəkləri gerçəkləşdirmək mümkün deyil! Amma hər məktuba qayğı və diqqət göstərilir, mümkün olan arzuların yerinə yetirilməsinə dəstək verilir. İnsanlar bu fondda daim mərhəmət və xeyirxahlıq görürlər, isti münasibətə şahid olurlar.

Əslində, fond Heydər Əliyevin insanpərvər və işıqlı ideyalarını gerçəkləşdirməklə bərabər, onun adını və əməllərini də özünə layiq şəkildə yaşadır və davam etdirir!

Bəxtiyar SADIQOV

Azərbaycan.-2014.- 7 may.-S.6.