Azərbaycan-İtaliya əlaqələrinin daha da

inkişafı üçün böyük potensial vardır

Azərbaycan Respublikası Milli Məclisinin sədri Oqtay Əsədov mayın 7-də İtaliya Senatının müdafiə komissiyasının sədri, Demokrat Partiyasının üzvü Nikola Latorrenin başçılıq etdiyi nümayəndə heyəti ilə görüşmüşdür.

AzərTAc xəbər verir ki, görüşdə Oqtay Əsədov Azərbaycan və İtaliya arasında əlaqələrin sürətlə inkişaf etdiyini demişdir.

İtaliyanın Avropada Azərbaycanın əsas tərəfdaşlarından biri olduğunu deyən Milli Məclisin sədri ölkələrimiz arasında ticarət dövriyyəsinin ildən-ilə artdığını diqqətə çatdırmışdır.

Oqtay Əsədov Azərbaycanın Avropanın enerji təhlükəsizliyində oynadığı mühüm roldan danışmışdır. Bildirilmişdir ki, Azərbaycan qazının Avropaya nəqlini həyata keçirmək üçün ötən ilin sonunda Bakıda “Şahdəniz-2” üzrə yekun investisiya qərarı imzalanmışdır. Sədr qeyd etmişdir ki, Trans-Adriatik boru kəmərinin (TAP) istifadəyə verilməsi ilə Avropaya yeni qaz dəhlizi açılacaqdır.

Oqtay Əsədov hər iki ölkənin qanunverici orqanlarında dostluq qruplarının fəaliyyət göstərməsini yüksək qiymətləndirmişdir.

Nikola Latorre Azərbaycan və İtaliya arasında möhkəm dostluq əlaqələrinin olduğunu bildirmişdir. Ölkələrimiz arasındakı iqtisadi əməkdaşlığa toxunan N.Latorre mövcud əlaqələrin daha da inkişaf etdirilməsi üçün böyük potensialın olduğunu diqqətə çatdırmışdır.

Qonaq Azərbaycanın mürəkkəb geosiyasi mövqedə yerləşməsinə baxmayaraq, sabit ölkə olduğunu və müdrik siyasət yeritdiyini qeyd etmişdir.

Trans-Adriatik boru kəməri ilə bağlı fikirlərini bölüşən Nikola Latorre bu layihənin reallaşması istiqamətində görülən işləri yüksək qiymətləndirmişdir.

Azərbaycan.-2014.-8 may.-S.3.