Mireya Aquero de Korrales: Son illər Azərbaycanın beynəlxalq aləmdə artan nüfuzu, sürətli iqtisadi inkişafı bizi sevindirir

Azərbaycan Respublikası Milli Məclisinin sədri Oqtay Əsədov mayın 7-də Honduras Respublikasının xarici işlər və beynəlxalq əməkdaşlıq naziri xanım Mireya Aquero de Korralesin başçılıq etdiyi nümayəndə heyəti ilə görüşmüşdür.

AzərTAc xəbər verir ki, görüşdə Oqtay Əsədov Azərbaycan ilə Honduras arasında əlaqələrdən danışmışdır. Bildirmişdir ki, iki ölkə arasında 20 ildən artıq tarixə malik münasibətlər mövcuddur. Azərbaycan və Honduras arasında siyasi əlaqələrin inkişaf etdiyini deyən Milli Məclisin sədri iqtisadi sahədə də əməkdaşlığın genişləndirilməsi üçün potensialın olduğunu diqqətə çatdırmışdır.

Oqtay Əsədov qeyd etmişdir ki, ölkələrimiz arasında əlaqələrin daha da inkişafını təmin etmək üçün hüquqi bazanın yaradılması zəruridir.

Honduras Milli Konqresinin Azərbaycan ərazisinin 20 faizinin Ermənistan silahlı qüvvələri tərəfindən işğalını və Xocalı soyqırımını tanıyan qərarına toxunan Milli Məclisin sədri buna görə minnətdarlığını bildirmişdir.

Xanım Mireya Aquero de Korrales demişdir ki, ölkələrimiz arasında müxtəlif istiqamətlərdə, xüsusən ticarət, maliyyə, enerji sahələrində əməkdaşlığı dərinləşdirmək üçün kifayət qədər potensial vardır.

Nazir Prezident İlham Əliyevin ona Azərbaycanın yüksək mükafatlarından olan “Dostluq” ordenini təqdim etdiyini bildirərək demişdir: “Bu mükafat məni çox şərəfləndirdi”.

Ölkəmiz haqqında kifayət qədər məlumatlı olduqlarını qeyd edən Mireya Aquero de Korrales bildirmişdir: “Son illərdə Azərbaycanın beynəlxalq aləmdə artan nüfuzu, sürətli iqtisadi inkişafı bizi sevindirir.”

Sonda Oqtay Əsədov Hondurasın Beynəlxalq Ədalət Məhkəməsinin nümayəndəsi Karlos Lopez Kontrerasa və bu ölkənin Meksikadakı səfiri Xose Mariano Kastilyo Merkadoya respublikalarımız arasında siyasi münasibətlərin inkişafındakı xidmətlərinə görə Milli Məclisin Fəxri medalını təqdim etmişdir.

Azərbaycan.-2014.-8 may.-S.3.