Ulu öndərin ideyaları

uğurla reallaşır

"Azərbaycanın dövlət müstəqilliyi yolunda fədakarcasına çalışmaq mənim həyatımın mənasıdır."

Heydər ƏLİYEV

Müstəqil Azərbaycanın banisi, dünyanın ən böyük azərbaycanlısı, çağdaş dünyamızın ən nəhəng simalarından biri olan Heydər Əliyevin rəhbərliyi altında uzun müddət işləmiş, hər zaman bu böyük tarixi şəxsiyyətin idarəçilik məktəbindən öyrənən bir şəxs kimi deyə bilərəm ki, ulu öndərin 70 illik gərgin əmək fəaliyyəti bilavasitə Azərbaycanın müasir tarixi ilə sıx, üzvi şəkildə bağlı olmuşdur.

Azərbaycana rəhbərlik etdiyi bütün illər ərzində onun çoxşaxəli fəaliyyətinin, həyata keçirdiyi bütün tədbirlərin, gördüyü işlərin mərkəzində həmişə Azərbaycan dövləti və Azərbaycan xalqı durmuşdur.

Azərbaycanın ən yeni tarixində müstəqil dövlət ideyası da məhz Heydər Əliyevin adı ilə bağlıdır. "Azərbaycanın dövlət müstəqilliyi yolunda fədakarcasına çalışmaq mənim həyatımın mənasıdır" - deyən ulu öndərin yalnız bir amalı, bir məqsədi var idi - Azərbaycan dövlətini qurmaq, möhkəmləndirmək və Azərbaycan xalqına layiq olduğu xoş güzəranı bəxş etmək!

Sözün həqiqi mənasında, dünya siyasətində sayılan-seçilən, nüfuz sahibi olan siyasi xadim, insanpərvər, mehriban, qayğıkeş, həqiqətsevər, sözü ilə əməli bir-birini tamamlayan, bütün varlığı ilə dövlətə və xalqa bağlı nadir şəxsiyyət olan Ulu öndər:

* - xüsusi xidmət orqanlarında çalışdığı dövrdə belə, Azərbaycanın milli ruhlu, açıq, demokratik fikirli ziyalılarını qorumağa nail olmuşdu;

* - ötən əsrin 70-ci illərində Azərbaycanı qısa müddətdə geridə qalmış respublikadan Sovetlər İttifaqının bütün sahələrdə - sənaye, kənd təsərrüfatı, təhsil, səhiyyə və s. ən qabaqcıl respublikasına çevirmişdi, bu günkü yüksəlişin, tərəqqinin bünövrəsini hələ o zaman qoymuşdu;

* - öz əməlləri ilə, xalqa əvəzsiz xidmətləri ilə əbədiyaşarlıq zirvəsinə yüksələ bilmişdi;

* - böyük siyasət qalasının ən uca zirvəsini fədakarlıqla fəth etmişdi;

* - Azərbaycan kimi kiçik bir məmləkətin adını bütün dünyaya tanıtmışdı;

* - qəlbi daim bəşəri duyğularla döyünən ümumbəşər övladı idi;

* - adı həmişə dünyanın tanınan, hörmət bəslənilən siyasi liderləri, ən müdrik rəhbərləri sırasında çəkilirdi;

* - dünya siyasət meydanında cərəyan edən proseslərə təsir baxımından həmişə öz sözü, öz çəkisi, öz dəst-xətti ilə seçilirdi;

* - əsl ümumxalq məhəbbəti, sevgisi qazanmış tək-tək siyasətçilərdən, dövlət xadimlərindən idi.

Qətiyyətlə deyə bilərik ki, XX əsrin sonlarında Azərbaycanda dövlətçilik ənənələrinin bərpa edilib zənginləşdirilməsi, Azərbaycanın dövlət müstəqilliyinin möhkəmləndirilməsi, onun əbədi, dönməz xarakter alması, ölkəmizin dinamik inkişaf etməsi Heydər Əliyevin uzaqgörən və zəngin siyasi fəaliyyəti, möhkəm siyasi iradəsi və qeyri-adi təşkilatçılıq istedadı sayəsində mümkün oldu.

Şübhəsiz, ölkəmizin bugünkü sabit və dayanıqlı inkişafının təməlində məhz ulu öndərin ildən-ilə uğurla reallığa çevrilən ideyaları durur.

Bu gün dünyanın ən nüfuzlu analitik araşdırma, tədqiqat mərkəzləri də etiraf edirlər ki, müstəqillik bərpa ediləndən sonra keçən 23 il ərzində Azərbaycan dövləti başqa ölkələrin 50-100 ildə getdiyi qədər çox böyük inkişaf, tərəqqi yolu keçib. Dərin iqtisadi böhranla, məhv olmaq təhlükəsi ilə üzləşən, xaosun, hərc-mərcliyin hökm sürdüyü Azərbaycan qısa müddət ərzində ən yüksək zirvəyə - dünyanın etibarlı ictimai-siyasi sabitliyə, dayanıqlı, dinamik iqtisadiyyata malik, inkişaf etmiş ölkələri sırasına yüksələ bildi. Ümumiyyətlə, tarixdə qısa zaman çərçivəsində belə sürətli tərəqqi yolu keçən başqa bir dövlət olmamışdır.

Bu böyük, analoqu olmayan nailiyyətlərə görə xalqımız iki dahi rəhbərə - ulu öndər Heydər Əliyevə və möhtərəm Prezident cənab İlham Əliyevə hədsiz dərəcədə minnətdardır.

Çünki müasir Azərbaycanın banisi, dünyanın ən böyük azərbaycanlısı Heydər Əliyev:

* 1993-cü ildə tarixin ən çətin mərhələsində xalqımızın təkidli tələbi ilə ikinci dəfə hakimiyyətə qayıdışı və böyük məharətlə həyata keçirdiyi tədbirlər nəticəsində xalqımız ağır, təlatümlü günlərdən, dövlətimiz məhv olmaq təhlükəsindən xilas oldu;

* Böyük xilaskar faktiki olaraq güclü dövlət yaratdı, uzaqgörənliyi, qətiyyəti və əzmkarlığı ilə Azərbaycanın yeni tarixində müstəqilliyimizin əbədi, dönməz olmasını təmin etdi;

* Xalqımızın ümummilli lideri uzaqgörən və zəngin siyasi fəaliyyəti, siyasi iradəsi və qeyri-adi təşkilatçılıq istedadı sayəsində ölkəmizin dinamik iqtisadi inkişaf yolu ilə inamla irəliləməsinə, beynəlxalq nüfuzunun sürətlə artmasına, strateji müttəfiqlərin qazanılmasına nail oldu;

* Yeni Azərbaycan Partiyasını yaratdı, onu təşkilatlandırdı, ölkənin siyasi həyatında aparıcı siyasi qüvvəyə çevirdi.

Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyev isə ötən dövr ərzində:

* Ümummilli lider Heydər Əliyev tərəfindən əsası qoyulan siyasəti məharətlə, çevik və qətiyyətlə həyata keçirərək Azərbaycanı yüksək insan inkişafına malik olan ölkələr sırasına çıxardı;

* Azərbaycan tarixində yeni dövrün -inkişaf, tərəqqi dövrünün əsasını qoydu və ölkəmiz iqtisadi sahədə keçid dövrünü 2009-cu ildə uğurla başa vurdu;

* Azərbaycanı regionun lider dövlətinə, Cənubi Qafqazda investisiya - kredit reytinqi alan ilk və yeganə ölkəyə, dünya miqyasında öz sözünü deyən məmləkətə çevirdi;

* Ölkəmizin bütün regionlarının inkişafını təmin etdi, Azərbaycanı sürətlə inkişaf edən ölkələr sırasına yüksəltdi, neft kapitalını insan kapitalına çevirdi;

* Azərbaycanın 2020-ci ilədək strateji inkişafının əsas istiqamətlərini müəyyənləşdirdi;

* Azərbaycanı dünyada digər dövlətlərə nümunə ola biləcək tolerant ölkə kimi tanıtdı;

* Azərbaycan BMT-nin Təhlükəsizlik Şurasında və Qaçqınlar üzrə Ali Komissarlığın İcraiyyə Komitəsində təmsilçilik hüququ qazandı;

* Ölkəmiz ilk süni peykini orbitə çıxarmağa müvəffəq oldu;

* Bakı Beynəlxalq Humanitar Forumu, Mədəniyyətlərarası Dialoq Forumu, Dünya İqtisadi Forumu - Davos Forumu kimi mötəbər beynəlxalq tədbirlərə ev sahibliyi edən şəhərə çevrildi;

* Ölkəmizi Davos İqtisadi Forumunun rəqabət qabiliyyətliliyinə görə 39-cu yerə yüksəltdi.

Ötən dövr ərzində Azərbaycan dövlətinin keçdiyi tarixi yola nəzər salsaq, onun nə qədər əlamətdar siyasi, iqtisadi hadisələrlə zəngin olduğunu, genişmiqyaslı, mühüm nailiyyətlər əldə edildiyini, dövlət quruculuğunun möhkəmləndirilməsində, xalqın rifah halının yaxşılaşdırılmasında qətiyyətli, sistemli, ardıcıl addımlar atıldığını açıq-aşkar görərik.

Fərəhli haldır ki, istər ictimai-siyasi, istər sosial-iqtisadi, istərsə də digər sahələrdə qarşıya qoyulan bütün məsələlər öz həllini tapıb. Ötən müddətdə iqtisadiyyat real ifadədə 3,4 dəfə, qeyri-neft sahələri 2,7 dəfə, dövlət büdcəsi 19 dəfə artıb, iqtisadiyyata 160 milyard dollar sərmayə qoyulub, 1,2 milyon yeni iş yeri açılıb, işsizliyin səviyyəsi 5 faizə, yoxsulluğun səviyyəsi isə 5,3 faizə enib.

Ulu öndər 1994-cü ildə XX "Əsrin müqaviləsi"ni imzalamaqla Azərbaycanın bugünkü inkişafının təməlini qoydusa, Azərbaycan Respublikasının Prezidenti cənab İlham Əliyev XXI əsrin layihəsi olan "Şahdəniz-2" enerji layihəsini reallaşdırmaqla ölkəmizin uzunmüddətli inkişafına, işıqlı gələcəyinə etibarlı təminat yaratdı.

Cənab Prezidentin titanik fəaliyyəti sayəsində ölkəmizdə bərqərar olan davamlı sabitlik, iqtisadi inkişaf, tərəqqi və milli dövlətçilik ənənələrinə sadiqlik inkişafın Azərbaycan modelinin yaradılmasına, ölkəmizin sosial-iqtisadi qüdrətinin nəzərəçarpacaq dərəcədə yüksəlməsinə, dünya ölkələrinə inteqrasiyanın sürətlənməsinə, nəhayət, dünyanın maraq mərkəzinə çevrilməsinə əlverişli zəmin yaratdı. Buna görə də bu gün dünyanın bir çox ölkəsi Azərbaycanın təcrübəsini öyrənir, ondan bəhrələnir.

2013-cü il oktyabrın 9-da keçirilmiş prezident seçkiləri də ölkəmizdə davam etdirilən siyasi kursun xalq tərəfindən dəstəklənməsinin bariz təcəssümünə çevrildi. Qətiyyətli siyasi iradə, birlik nümayiş etdirən xalqımız ulu öndər Heydər Əliyevin müdrik siyasətinə, cənab İlham Əliyevin son 10 ildə gördüyü işlərə - ölkəmizi geniş inkişaf yoluna çıxarmış siyasətə və liderə səs verdi.

Bir sözlə, 2013-cü ildə keçirilən prezident seçkilərində YAP-ın namizədi cənab İlham Əliyevin parlaq qələbə qazanması ölkə rəhbərinə və onun rəhbərlik etdiyi partiyaya xalqın inam və etimadının əyani nəticəsi oldu.

Ümumiyyətlə, bütün parametrləri ilə Azərbaycanın siyasi tarixinə ən demokratik, şəffaf, ədalətli, azad seçkilər kimi həkk olunan, nüfuzlu xarici siyasi dairələr, beynəlxalq müşahidəçilər, populyar kütləvi informasiya vasitələri tərəfindən də yüksək qymətləndirilən bu seçkilər, sözün həqiqi mənasında, bir çox ölkələr üçün nümunədir, örnəkdir.

Azərbaycan Respublikasının Prezidenti cənab İlham Əliyev 2003-cü il oktyabrın 1-də ulu öndərin Azərbaycan xalqına son müraciətində səslənən bütün tövsiyələri müvəffəqiyyətlə icra edib. Cənab İlham Əliyevin dəfələrlə qeyd etdiyi kimi, ölkəmizdə öz həllini tapmamış yalnız bir problem qalıb. Bu da Ermənistan-Azərbaycan, Dağlıq Qarabağ münaqişəsidir. Bu münaqişənin kökləri isə dərindir. Tarixə qısa nəzər salsaq görərik ki, son 200 ildə ermənilər Azərbaycan torpaqlarının ələ keçirilməsi planını öz havadarlarının - erməni lobbisinin köməyi ilə mərhələ-mərhələ həyata keçirmişlər. Bu məkrli siyasət nəticəsində ermənilər XX əsrin əvvəlində əzəli Azərbaycan torpağında erməni dövlətinin yaradılmasına nail olsalar da, sonralar bununla kifayətlənmədilər.

Nəticədə XX əsrdə xalqımızın başına çox müsibətlər, dəhşətli faciələr gətirildi. 1905, 1918-1920, 1948-1950 və 1988-ci illərdə azərbaycanlıların öz ata-baba yurdlarından zorla köçürülməsi, deportasiya, etnik təmizləmə və soyqırımılara məruz qalması məhz bu yüzillikdə törədilmiş müsibətlərdir.

Ümummilli lider Heydər Əliyev 1969-1982-ci illərdə Azərbaycana rəhbərlik edərkən erməni lobbisinin Azərbaycanın ayrılmaz hissəsi olan Dağlıq Qarabağla bağlı iddiasının qarşısını almağa müvəffəq olmuşdu. Ermənilər çox ciddi - cəhd etsələr də, öz çirkin istəklərinə nail ola bilmirdilər.

Buna görə də onlar birinci növbədə Heydər Əliyevin keçmiş Sovetlər İttifaqının rəhbərliyindən, Siyasi Bürodan uzaqlaşdırılmasını qarşılarına məqsəd qoydular. Təəssüflər olsun ki, ulu öndər böyük siyasətdən Mixail Qorbaçovun əli ilə uzaqlaşdırıldıqdan 25 gün sonra ermənilər Dağlıq Qarabağ böhranını yenidən qızışdırdılar və havadarlarının köməyi ilə öz çirkin planlarını həyata keçirməyə başladılar.

Ulu öndər Heydər Əliyevin böyük siyasətdən getməsi xalqımız üçün çox ağır müsibətlərə səbəb oldu. Nəticədə Sumqayıt hadisələri, 20 Yanvar, Xocalı faciəsi törədildi, Ermənistanın 1988-1992-ci illərdə planlı şəkildə həyata keçirdiyi etnik təmizləmə siyasəti nəticəsində tarixən bu ərazidə yaşamış 250 min azərbaycanlı öz doğma yurdlarından zorla qovularaq Azərbaycana pənah gətirdi, Ermənistan silahlı qüvvələri tərəfindən Azərbaycan torpaqlarının 20 faizi - Dağlıq Qarabağın, eləcə də ona bitişik olan 7 rayonun ərazisi işğal olundu, 700 min nəfərədək azərbaycanlı öz doğma yurdunda məcburi köçkünə çevrildi.

Ümummilli lider Heydər Əliyevin ən böyük arzularından biri Ermənistan-Azərbaycan, Dağlıq Qarabağ münaqişəsinin ədalətli həlli, zəbt olunmuş torpaqlarımızın erməni işğalçılarından azad edilməsi, soydaşlarımızın öz doğma ata-baba yurdlarına ləyaqətlə qaytarılması idi. O, bunun üçün daim var qüvvəsi ilə çalışırdı və bu istiqamətdə çox böyük işlər görə bildi.

Məhz Heydər Əliyevin diplomatiyası sayəsində Ermənistan-Azərbaycan, Dağlıq Qarabağ münaqişəsinin əsl mahiyyəti, Azərbaycanın haqq səsi dünya ictimaiyyətinə çatdırıldı, Ermənistanın təcavüzkar siyasəti ifşa edildi. 1993-cü ildə BMT Təhlükəsizlik Şurasının münaqişənin siyasi həlli, işğal olunmuş ərazilərin azad edilməsi, qaçqın və məcburi köçkünlərin doğma yurdlarına qaytarılması ilə bağlı beynəlxalq hüquq normalarına uyğun 4 qətnaməsi qəbul edildi. 1994-cü ildə atəşkəsə nail olundu. ATƏT-in 1994-cü il Budapeşt, 1996-cı il Lissabon və 1999-cu il İstanbul sammitlərində münaqişənin dinc və siyasi yollarla həlli istiqamətində tədbirlər görüldü, ABŞ Konqresinin müstəqil Azərbaycana birbaşa yardım göstərilməsini qadağan edən Azadlığa Dəstək Aktına ədalətsiz 907-ci düzəlişin icrası dayandırıldı.

Məhz Heydər Əliyevin gündəlik qayğısı sayəsində qaçqınların və məcburi köçkünlərin problemləri ölkənin bir nömrəli problemi səviyyəsinə qaldırıldı. Bu sahə ilə bağlı xüsusi dövlət proqramı qəbul edildi, ən çətin şəraitdə - çadırlarda yaşayan insanların mənzil-məişət şəraitinin yaxşılaşdırılmasına başlanıldı. Neft Fondunda toplanan ilk vəsait də qaçqın və məcburi köçkünlərin mənzil şəraitinin yaxşılaşdırılmasına yönəldildi, eyni zamanda, onların sosial problemlərinin həlli ilə bağlı geniş tədbirlər həyata keçirildi.

Ulu öndərin öz yurdlarından didərgin salınmış soydaşlarımıza diqqət, qayğı, himayədarlıq siyasəti onun siyasi varisi, Azərbaycan Respublikasının Prezidenti cənab İlham Əliyev tərəfindən uğurla davam etdirilir.

Cənab Prezident 2003-2014-cü illərdə qaçqın və məcburi köçkünlərlə bağlı keçirilən müxtəlif tədbirlərdə 33 dəfə, o cümlədən yeni salınmış yaşayış qəsəbələri və məhəllələrinin böyük əksəriyyətinin açılışında şəxsən iştirak etmiş, həmçinin problemə həsr olunmuş bir beynəlxalq konfrans və iki geniş müşavirə keçirilmiş, bir dövlət proqramı və ona 2 əlavələr təsdiq edilmişdir.

Yeni salınmış qəsəbələrin açılışlarında cənab Prezidentin və Azərbaycanın birinci xanımı Mehriban Əliyevanın şəxsən iştirak etməsi və məcburi köçkünlərlə səmimi söhbətləri soydaşlarımızın həyatında unudulmaz, xoş xatirələrə çevrilmişdir.

Qeyd etmək lazımdır ki, 2003-2013-cü illər ərzində dövlət proqramı və ona əlavələrin uğurla icra edilməsi nəticəsində:

* ölkədə mövcud olmuş 12 çadır düşərgəsinin ləğvi 2007-ci ildə başa çatdırılmışdır;

* qaçqın və məcburi köçkünlər üçün ümumilikdə salınmış 82 müasir qəsəbə və məhəllədən 77-si son 10 ildə inşa edilmişdir;

* Son 10 ildə yeni yaşayış komplekslərində 120 məktəb, 6 musiqi məktəbi, 33 uşaq bağçası, 37 tibb müəssisəsi, 34 klub-icma mərkəzi, 28 rabitə evi tikilmişdir;

* ümumiyyətlə, indiyədək mənzil şəraiti yaxşılaşdırılmış 40 min ailə və ya 180 min nəfər qaçqın və məcburi köçkündən 37 min ailə, yaxud 166 min nəfər (92 %) son 10 ilin payına düşür;

* qaçqın və məcburi köçkünlərin sosial müdafiəsi üçün ümumilikdə 4,4 milyard manat vəsait sərf olunmuşdur. Bu vəsaitin 84 faizi, yaxud 3,7 milyard manatı son 10 ildə ayrılmışdır;

* yeni qəsəbə və məhəllələrin salınmasına Dövlət Neft Fondundan 1,46 milyard manat vəsait ayrılmışdır;

* müxtəlif maliyyə mənbələrindən ayrılmış vəsait hesabına məcburi köçkünlərin müvəqqəti məskunlaşdığı 220 yataqxana təmir edilmiş, nəticədə 68 min nəfər məcburi köçkün faydalanmışdır;

* məcburi köçkünlərə aylıq yemək xərci üçün verilən müavinətin məbləği 3,6 dəfə, kommunal xidmətlərə görə vəsaitin miqdarı 4,5 dəfə, Dövlətqaçqınkomun illik büdcəsi isə 5,5 dəfə artmışdır;

* əməkqabiliyyətli 380 min məcburi köçkündən 161 min nəfəri daimi işlə təmin edilmiş, 200 min nəfəri isə mövsümi işlərə cəlb edilmişdir;

* Sahibkarlığa Kömək Milli Fondunun xətti ilə son 10 ildə 1841 məcburi köçkün sahibkarlıq subyektinin investisiya layihəsinin maliyyələşdirilməsinə 37,2 milyon manat, həmçinin yeni texnologiyalara əsaslanan 3 investisiya layihəsinə 9,3 milyon manat məbləğində güzəştli kredit verilmişdir;

* Dünya Bankı və Azərbaycan hökuməti arasında bağlanılmış kredit sazişi ("Məcburi Köçkünlərin İqtisadi İnkişafına Yardım Layihəsi") üzrə Azərbaycan Respublikası Məcburi Köçkünlərin Sosial İnkişaf Fondu tərəfindən 10,8 min nəfər məcburi köçkünə 7,7 milyon manat məbləğində mikrokredit verilmiş və bu proqramlardan 46 min məcburi köçkün faydalanmışdır.

* Məcburi Köçkünlərin Sosial İnkişaf Fondu tərəfindən son 10 ildə 310 min nəfərin faydalandığı (bunun da 83%-i məcburi köçkündür) və dəyəri 30 milyon manat təşkil edən 520 müxtəlif növ mikrolayihə icra edilmişdir.

* 2013-cü ildə bir nəfər məcburi köçkünə xərclənən vəsaitin həcmi təxminən 1100 manat təşkil etmişdir ki, bu da dünyanın digər münaqişə zonaları ilə müqayisədə ən yüksək göstəricidir.

* məcburi köçkünlər arasında yoxsulluq həddi son 10 ildə 75 faizdən 15 faizədək azalmışdır.

Cənab İlham Əliyevin tapşırığına əsasən Ermənistan-Azərbaycan, Dağlıq Qarabağ münaqişəsi haqqında həqiqətlərin dünya ictimaiyyətinin diqqətinə müntəzəm çatdırılması ilə bağlı müvafiq tədbirlərin həyata keçirilməsi də davam etdirilir.

Qeyd etmək lazımdır ki, fəaliyyətə başladığı ilk gündən etibarən Heydər Əliyev Fondu da qaçqın və məcburi köçkünlərin üzləşdikləri problemlərin həllinə daim diqqətlə yanaşır.

Fondun prezidenti, UNESCO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə yaradılmış "Azərbaycan" internet portalında Ermənistan-Azərbaycan, Dağlıq Qarabağ münaqişəsi, Xocalı soyqırımı, Ermənistanın hərbi təcavüzünün nəticələri barədə geniş məlumat toplanmışdır. Bununla bərabər, fondun xətti ilə hər il Xocalı soyqırımı ərəfəsində dünyanın müxtəlif ölkələrində tədbirlər keçirilir, beynəlxalq mətbuatda soyqırımı haqqında yazılar dərc edilir.

Fondun vitse-prezidenti Leyla xanım Əliyevanın təşəbbüsü ilə 80-dən artıq ölkədə "Xocalıya ədalət" beynəlxalq məlumat-təşviqat kampaniyası ilə bağlı silsilə tədbirlər təşkil olunur.

Aparılan məqsədyönlü işlər nəticəsində artıq 7 dövlətin parlamenti və ABŞ-ın 14 ştatı Xocalı façiəsinin soyqırımı kimi tanınması barədə müvafiq qətnamə qəbul etmişdir. İslam Əməkdaşlıq Təşkilatı Parlament İttifaqı bu faktı "insanlığa qarşı törədilmiş kütləvi cinayət" hadisəsi kimi tanımış və üzv dövlətləri həmin faciəyə müvafiq siyasi-hüquqi qiymət verməyə çağırmışdır.

Qaçqınların və Məcburi Köçkünlərin İşləri üzrə Dövlət Komitəsi tərəfindən Ermənistan-Azərbaycan, Dağlıq Qarabağ münaqişəsi ilə bağlı hazırlanan kitablar, çəkilən qısametrajlı filmlər səfirliklər vasitəsilə dünya ölkələrində nümayiş etdirilir və bu yolla dünya ictimaiyyəti məlumatlandırılır. Bu məqsədlə mütəmadi olaraq xarici ölkələrin, beynəlxalq maliyyə qurumlarının, humanitar və bu sahədəki inkişaf təşkilatlarının nümayəndələri ilə görüşlər keçirilir.

Azərbaycan Respublikasının Prezidenti cənab İlham Əliyevin 2004-cü ilin fevral ayında keçirilmiş, beynəlxalq humanitar təşkilatların fəaliyyətinin 10 illiyinə həsr edilmiş beynəlxalq konfransda qeyd etdiyi kimi, imkanların məhdud olduğu dövrdə, xüsusən müstəqilliyin bərpasından sonrakı ilk illərdə göstərilən fövqəladə humanitar yardımın çox böyük əhəmiyyəti olmuş, yaranmış humanitar fəlakətdən çıxmaqda respublikada fəaliyyət göstərən beynəlxalq, yerli humanitar və inkişaf təşkilatlar əvəzsiz rol oynamışlar.

Hazırda respublikamızda 42 beynəlxalq, 45 yerli humanitar təşkilat fəaliyyət göstərir və bilavasitə bu təşkilatların xətti ilə ötən 21 il ərzində qaçqın, məcburi köçkün və aztəminatlı əhaliyə müxtəlif layihələr üzrə 940 mln ABŞ dollarından çox həcmdə yardım göstərilmişdir.

Cənab Prezidentin tapşırığı ilə bu təşkilatların tam sərbəst, azad və şəffaf fəaliyyətləri üçün ölkədə nümunəvi şərait yaradılmışdır.

Azərbaycan Respublikasının Prezidenti cənab İlham Əliyev dəfələrlə bəyan etmişdir ki, Azərbaycan heç vaxt öz əzəli torpağında ikinci qondarma erməni dövlətinin yaradılmasına imkan verməyəcək, Dağlıq Qarabağ heç vaxt müstəqil olmayacaq.

İnanırıq ki, cənab İlham Əliyev bu problemi də həll edəcək, onun qətiyyətli səyi nəticəsində ölkəmizin ərazi bütövlüyü bərpa ediləcək, azərbaycanlılar öz ata-baba yurdlarına ləyaqətlə qayıdaraq yenidən öz doğma torpaqlarında yaşayacaqlar.

Bütün xalqımız kimi, məcburi köçkünlər də rəhbər, lider kimi yalnız cənab İlham Əliyevə inanır, yalnız ona etibar edirlər. Çünki Azərbaycana belə bir layiqli siyasi davamçını ulu öndər Heydər Əliyev bəxş etmişdir. Çünki cənab İlham Əliyev təkrarsız Heydər Əliyev akademiyasından dərs almış, uzun müddət bu siyasi mühitdə formalaşmışdır.

Dünyanın ən böyük azərbaycanlısı Heydər Əliyev deyirdi: "Nə qədər ki, Azərbaycan var, Mən də varam. Mən isə Azərbaycanda əbədi olacağam!"

Bəli, Heydər Əliyev bütün ömrünü xalqına bağışladı, bütün həyatını Azərbaycana həsr etdi, onun üçün yaşadı və yaratdı. Ulu öndərin bizə bəxş etdiyi ən böyük irs isə bugünkü müstəqil Azərbaycan dövlətidir.

Əminliklə deyə bilərik ki, ümummilli lider Heydər Əliyevin ideyaları, onun müəyyən etdiyi strateji istiqamətlər hələ uzun illər Azərbaycan dövlətinə və xalqına sədaqətlə xidmət edəcək və qədirbilən xalqımız da analoqu olmayan bu siyasəti daim dəstəkləyəcəkdir.

Əli HƏSƏNOV,

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, YAP sədrinin müavini, YAP İdarə Heyətinin üzvü

Azərbaycan.- 2014.- 9 may.- S.3.