Müasir qanunvericilik sisteminin banisi
"Heydər Əliyev tarixin böyük bir hissəsidir. Onun əməlləri,
bütün təşəbbüsləri bir məqsəd
daşıyırdı - Azərbaycan xalqına xidmət etmək,
ölkəmizi gücləndirmək, müstəqilliyimizi
möhkəmləndirmək, demokratik cəmiyyət
qurmaq."
İlham ƏLİYEV
Heydər Əliyev bütün
şüurlu həyatını xalqına həsr etmiş və
onu istiqlala qovuşdurmuş müdrik siyasətçi kimi
milli tariximizin əbədiyaşar simasına
çevrilmişdir. Bu nadir düha XX əsrin sonunda yenidən
əldə etdiyimiz müstəqilliyimizin əbədi və
dönməz xarakter almasına nail olmuş, bu kimi misilsiz xidmətləri
sayəsində xalqın dövlətçilik şüurunda
ümummilli lider yüksəkliyini fəth etmişdir.
Ulu öndər siyasi fəaliyyətə
başladığı ilk gündən Azərbaycanı
inkişaf etdirmək istiqamətində əməli
addımlar ataraq, müəyyən dövrdə müstəqilliyə
qovuşdurmaq üçün xalqımızın milli-mənəvi
irsini, onun özünəməxsusluğunu qorumağı
bacarmışdır. Onun ölkəyə ilk dəfə
rəhbərlik etdiyi dövrdə Azərbaycanda həyatın
bütün sahələrində böyük nailiyyətlər
qazanıldı. Məhz bu illərdə
milli və mənəvi dəyərlər sisteminin qorunub
saxlanılmasında, dövlətçilik, o cümlədən
parlamentarizm ənənələrinin inkişafında həyata
keçirilən məqsədyönlü siyasət sayəsində
sonradan xalqın milli oyanışı və müstəqillik
ideyalarının gerçəkləşməsi
üçün əlverişli şərait yarandı.
Ulu öndər respublikanın qanunvericilik
sistemini formalaşdıran parlamentin fəaliyyətinə
xüsusi diqqət göstərirdi. O dövrdə Heydər
Əliyevin yeritdiyi kadr siyasəti nəticəsində
bütün dövlət orqanlarına olduğu kimi, Ali Sovetə
də ən bacarıqlı və layiqli şəxslər cəlb
olundu. O illərdə Heydər Əliyev respublika Kommunist
Partiyasının Birinci katibi olmaqla yanaşı, SSRİ Ali
Sovetinin (VIII-X çağırışlar) deputatı,
yuxarı palatanın - İttifaq Sovetinin sədr müavini (IX
çağırış), habelə Azərbaycan SSR Ali
Sovetinin (VII-X çağırışlar) deputatı və rəyasət
heyətinin üzvü olmuş, kommunist rejiminin bütün sərtliyinə
baxmayaraq qanunverici orqanın verdiyi imkanlardan
xalqımızın mənafeyi naminə maksimum istifadə
etmişdir.
Həmin dövrdə iqtisadi və sosial
sahələrdə aparılan köklü struktur
islahatlarının xarakterinə, xalqın maddi rifah
halının yüksəlməsinə görə parlamentdə
təsdiqlənmiş IX, X və XI beşillik proqramlar
respublikanın inkişafında mühüm mərhələ
oldu.
Heydər Əliyevin təşəbbüsü ilə
SSRİ rəhbərliyi Azərbaycanın iqtisadi inkişafı
üçün mühüm əhəmiyyət
daşıyan beş qərar qəbul
etmişdir. Bu məqsədlə İttifaq
fondundan Azərbaycana külli miqdarda maliyyə vəsaiti
ayrılmışdı. Azərbaycanda bir
sıra yeni komplekslər, inzibati binalar, institutlar, zavodlar,
fabriklər, metro stansiyaları tikilmiş, yeni təhsil
ocaqları, məktəblər istifadəyə verilmişdir.
Sonralar Moskvada - İttifaq rəhbərliyində təmsil
olunduğu dövrdə də ulu öndər doğma Vətəninin
inkişafı üçün mümkün olan bütün
imkanlardan istifadə edirdi.
Ümumiyyətlə, 1970-ci illərdə və 1980-ci
illərin əvvəllərində Azərbaycan SSR-in Ali Soveti
Heydər Əliyevin rəhbərliyi ilə gerçəkləşdirilən
möhtəşəm quruculuq işlərinin hüquqi
bazasının yaradılması prosesində mühüm rol
oynamış, xalqımızın milli-mənəvi dəyərlərinin
qorunmasına, onun tərəqqisinə xidmət edən
mühüm qanun və qərarlar qəbul etmişdir.
Bu dövrdə parlamentdə Mülki, Mülki-Prosessual
və Cinayət-Prosessual məcəllələrinə bir
sıra mütərəqqi əlavə və dəyişikliklər
edilmiş, Azərbaycan SSR-in məhkəmə quruluşu, Səhiyyə,
Dövlət notariatı, Xalq Təhsili, Tarixi və mədəni
abidələrin qorunması, Torpaq və Əmək
haqqında qanunlar, Ailə və Nikah haqqında məcəllələr
qəbul olundu. Heydər Əliyev respublikanın
rəhbəri kimi parlamentin gücündən xalqın milli-mənəvi
sərvətlərinin qorunub saxlanılması və
inkişafı üçün istifadə edərək
hüquqi bazanı daha da gücləndirdi.
Həmin illərdə icra orqanları ilə
parlamentin işinin səmərəli koordinasiyası milli tərəqqi
üçün zəruri əsaslar
formalaşdırmış, Azərbaycanın gələcək
siyasi müstəqilliyinə möhkəm zəmin
yaratmış, Heydər Əliyevin təşəbbüsü
ilə Azərbaycan dilinə dövlət dili statusu
verilmişdir.
SSRİ dağildiqdan sonrakı ilk illərin
əvvəllərində - ölkəmizin ağır günlər
yaşadığı bir dövrdə onu gözləyən
ciddi təhlükələrə baxmayaraq xalqının
taleyinə biganə qala bilməyən Heydər Əliyev
Moskvadan Vətənə döndü. O, bu barədə belə
deyirdi: "...Doğma Vətən torpağına heç də
yenidən hakimiyyətə qalxmaq üçün yox, ancaq və
ancaq respublikanın bu ağır və çətin
dövründə xalqın dərdinə şərik
olmağa, vətəndaşlıq borcumu yerinə yetirməyə,
azadlıq uğrunda mübarizəyə qoşulmağa gəlmişəm..."
1991-ci il sentyabrın 3-də
Naxçıvan əhalisinin təkidi ilə Heydər
Əliyev muxtar respublikanın Ali Məclisinə sədr
seçildi. O, muxtar respublikaya rəhbərlik etməyə
başladığı ilk gündən dövlət
quruculuğuna, idarəetmənin təkmilləşdirilməsinə,
iqtisadi islahatların aparılmasına, xarici ölkələrlə
əlaqələrin qurulmasına, müdafiə və hərbi
quruculuq məsələlərinə ciddi fikir verildi. Bu məqsədlə Muxtar Respublikanın Ali Məclisində
mühüm qərarlar qəbul olundu. Görülən
tədbirlər nəticəsində blokadada olan
Naxçıvanın vəziyyəti xeyli yüngülləşdi.
Müstəqilliyin bərpasından
sonrakı ilk illərdə tez-tez hakimiyyət dəyişiklikləri
yaşayan Azərbaycanda vəziyyət getdikcə kəskinləşir,
torpaqlarımız ermənilər tərəfindən dalbadal
işğal olunur, separatizm meyilləri güclənirdi. İctimai-siyasi həyatda hökm sürən
qeyri-sabitlik və ölkə rəhbərliyində xalqın
mənafeyini əks etdirən siyasi iradənin olmaması
dövlətçiliyimizə ağır zərbələr
vururdu. Bu vəziyyət 1993-cü il
iyunun 15-dək davam etdi. Yalnız ulu öndər Heydər
Əliyev xalqın təkidli tələbi ilə ölkədə
siyasi hakimiyyətə yenidən qayıtdıqdan sonra cəmiyyətdə
köklü dəyişikliklər baş verdi.
Heydər Əliyev parlamentə sədr
seçilərkən verdiyi bəyanatla müstəqil dövlətçiliyimizin
inkişaf konsepsiyasını və yollarını sistemli
şəkildə açıqladı. Bu istiqamətdə məqsədyönlü tədbirlər
həyata keçirilməyə başlandı. O, tezliklə
ölkədə qanunçuluğun bütün sahələrdə
möhkəmlənməsini təmin etməyə, qanunverici
orqanın cəmiyyətdəki nüfuzunu qaldırmağa,
onun təşəkkülünə, ölkənin
ictimai-siyasi həyatının sabitləşməsinə,
habelə milli parlamentarizm ənənələrinin
inkişafına nail oldu.
1993-cü il iyunun 15-dən oktyabrın 3-dək Heydər
Əliyevin Ali Sovetə rəhbərlik etdiyi müddət ərzində
parlamentdə müstəqil dövlətimizin qanunvericilik
bazasının əsasları yaradıldı, həyatın
müxtəlif sahələrinə aid 120 qanun və qərar qəbul
olundu, ölkənin mənafeyi baxımından mühüm əhəmiyyət
kəsb edən neft danışıqları milli müstəviyə
keçirildi.
Heydər Əliyev Ali Sovetin Sədri kimi bəyan edirdi
ki, ölkəmiz demokratiya yolu ilə getməli, Azərbaycanda
əsl demokratiya prinsipləri yaranmalı, inkişaf etməli,
siyasi plüralizmə və çoxpartiyalı cəmiyyət
kimi partiyaların fəaliyyətinə şərait
yaradılmalı, bazar iqtisadiyyatı, sərbəst iqtisadiyyat
təşəkkül tapmalıdır. Mübaliğəsiz
demək olar ki, Heydər Əliyevin Ali Sovetin sədri vəzifəsində
çalışdığı dövrdə Azərbaycanın
demokratik, hüquqi, dünyəvi dövlət kimi gələcək
inkişafının təməli qoyuldu.
Heç də təsadüfi deyil ki, 1993-cü il 3 oktyabr prezident seçkilərində xalq
Heydər Əliyevə səs verərək ölkənin taleyini
bu görkəmli dövlət xadiminə həvalə etmək
niyyətində olduğunu bütün dünyaya
nümayiş etdirdi. Bu seçimlə Azərbaycan
xalqı müstəqillik yolunda yeni bir dövrə qədəm
qoydu.
Bu dövrdə ölkə hələ də
sovetlər zamanında qəbul edilmiş qanunlarla idarə
olunurdu. 1991-ci ildə Azərbaycan
dövlət müstəqilliyini bərpa etdikdən sonra
artıq yeni Əsas Qanunun - Konstitusiyanın qəbul edilməsi
zərurəti yaranmışdı. 1993-cü
ildə prezident seçkilərinin keçirilməsinə
baxmayaraq, respublikanın ictimai-siyasi həyatında baş vermiş
dəyişikliklər ölkənin əsas sənədində
öz əksini tapmamışdı. Bütün
bunlar müstəqil Azərbaycanın yeni Konstitusiya layihəsinin
hazırlanmasını şərtləndirən amillərdən
idi.
Ölkənin rəhbəri kimi Heydər
Əliyev iqtisadi, siyasi, sosial, hüquqi islahatların həyata
keçirilməsini, demokratik dəyərlərin cəmiyyətdə
bərqərar olunmasını çox önəmli hesab
edirdi. Bu məqsədlə o, ölkənin
yeni Konstitusiyasının qəbulunu önəmli hesab edirdi.
1995-ci ildə ulu öndərin müəllifi
olduğu müstəqil Azərbaycanın yeni Konstitusiyasının
ümumxalq səsverməsi (referendum) yolu ilə qəbul edilməsi
və parlament seçkilərinin keçirilməsi ilə
dövlət quruculuğu sahəsində yeni dövr
başlandı. Məhz yeni
Konstitusiyanın verdiyi imkanlar sayəsində ölkədə
çox qısa bir vaxtda hüquqi, iqtisadi, sosial islahatları
həyata keçirmək, demokratik dəyərlərin cəmiyyətdə
bərqərar olması yolunda inamlı addımlar atmaq
mümkün oldu. Prezident İlham Əliyev bu barədə
belə deyib:
"Ölkəmizdə müstəqil dövlət təsisatlarının
yaradılması, beynəlxalq normalara əsaslanan demokratik,
hüquqi dövlət quruculuğunun böyük vüsət
alması, suveren Azərbaycanın Əsas Qanunu olan
Konstitusiyanın qəbul edilməsi, vətəndaş cəmiyyətinin
formalaşdırılması, milli təhlükəsizliyin təmin
olunması və yeni iqtisadi kursun müəyyənləşdirilməsi
ilə bağlı proseslərin müvəffəqiyyətli həlli
şəxsən Heydər Əliyevin xidmətidir".
Dövlət quruculuğunda hüquqi islahatların
aparılması məqsədi ilə Heydər Əliyevin
1996-cı il 21 fevral tarixli sərəncamı
ilə Hüquq İslahatları Komissiyası yaradıldı.
Ümummilli liderin başçılıq etdiyi
bu komissiya ölkə həyatının ən müxtəlif
sahələrində islahatların aparılmasında əhəmiyyətli
rol oynadı.
Milli Məclis tezliklə Konstitusiya
quruculuğu, məcəllələşdirmə, digər
qanunvericilik sahələri, o cümlədən parlament fəaliyyətinə
dair daxili nizamnamə, deputat statusu, parlament komissiyaları
haqqında, habelə ictimai münasibətlərin tənzimlənməsinə
yönəlmiş qanunlar qəbul etdi, parlament institutunun
konstitusion normalarını formalaşdırdı. Bu dövrdə parlament əsas funksiyasını
davam etdirərək, ölkədə sosial-iqtisadi,
hüquqi-siyasi islahatların keçirilməsi
üçün zəruri qanunvericilik bazası yaratdı.
Bir sözlə, ölkənin hüquq sistemi
yenidən müasir dövrün tələblərinə
uyğun quruldu.
Milli Məclisdə hüquqi islahatlara dair " Konstitusiya
Məhkəməsi haqqında", "Məhkəmələr
və hakimlər haqqında", "Polis haqqında",
"Prokurorluq haqqında", "Vəkillər və vəkillik
fəaliyyəti haqqında", "Notariat haqqında",
"Sərbəst toplaşmaq azadlığı
haqqında", "Azərbaycan Respublikasının vətəndaşlığı
haqqında", "Əcnəbilərin və vətəndaşlığı
olmayan şəxslərin hüquqi vəziyyəti
haqqında", "Uşaq hüquqları haqqında",
"Bələdiyyələrə seçkilərin
qaydaları haqqında", "Bələdiyyələrin
statusu haqqında" qanunlar qəbul edildi. Yeni
qanunvericilik sisteminin təşəkkülü istiqamətində
Cinayət, Cinayət-Prosessual, Mülki, Mülki-Prosessual,
İnzibati Xətalar, Ailə, Əmək, Vergi, Gömrük,
Seçki məcəllələri qəbul olundu.
Parlamentdə qəbul olunmuş "Azərbaycan
Respublikasının insan hüquqları üzrə müvəkkili
(ombudsman) haqqında", "Azərbaycan Respublikasında
insan hüquq və azadlıqlarının həyata
keçirilməsinin tənzimlənməsi haqqında",
"Azərbaycan Respublikasının Nazirlər Kabinetinə
Azərbaycan Respublikasının Milli Məclisi tərəfindən
etimad məsələsinin həll edilməsi hüququnun
əlavə təminatları haqqında" Konstitusiya
qanunları hüquqi islahatlar sahəsində çox
mühüm addım oldu.
Ümumiyyətlə, 1993-cü il oktyabrın 10-dan
2002-ci il dekabrın 30-dək Milli Məclisdə qəbul
edilmiş 1715 qanun və qərardan 975-nin məhz ümummilli
lider Heydər Əliyevin qanunvericilik təşəbbüsü
əsasında parlamentə təqdim olunmuşdur.
1998-ci il fevralın 10-da ölkəmizdə
ölüm hökmü rəsmən ləğv edildi. Azərbaycan MDB məkanında və müsəlman
dünyasında bu tarixi qərarı qəbul edən ilk
dövlət idi. O vaxt hətta Avropa Şurasının
üzvü olan bir çox ölkələr analoji addım
atmamışdı. 1998-ci il avqustun 8-də
ulu öndər konstitusion hüququn təməl prinsiplərindən
olan söz azadlığının təminatı ilə
bağlı mühüm bir qərara imza atdı - mətbuat
üzərində senzura tamamilə ləğv edildi.
1999-cu il dekabrın 12-də
Konstitusiyada təsbit olunmuş keçid müddəalarından
daha birinə əməl olundu - ölkədə ilk bələdiyyə
seçkiləri keçirildi, yerli özünüidarə
institutu fəaliyyətə başladı. Ölkə
iqtisadiyyatı üçün böyük əhəmiyyət
kəsb edən neft kontraktları təsdiqləndi. Azərbaycan qlobal enerji və kommunikasiya layihələrinin
fəal iştirakçısına çevrildi.
Bu gün bu siyasət Prezident İlham
Əliyev tərəfindən yeni mərhələdə
müvəffəqiyyətlə davam etdirilir. Dövlət başçısının təşəbbüsü
ilə qədim İpək Yolunun Bakı-Tbilisi-Qars nəqliyyat
xəttinin timsalında dəmir relslər üzərinə
keçirilməsi istiqamətində fəal işlər
görülür. Azərbaycan qocaman
Avropanın enerji təhlükəsizliyinə öz töhfəsini
verməklə yanaşı, Cənubi Qafqazda söz sahibi
olaraq regionun lider dövlətinə çevrilmişdir.
Bu, sözün həqiqi mənasında, əsası
ulu öndər tərəfindən qoyulmuş müstəqil
Azərbaycanın inkişaf konsepsiyasının uğuru, bu
gün İlham Əliyev tərəfindən davam etdirilən
Heydər Əliyev siyasətinin təntənəsidir.
Heydər Əliyev ölkəmizin
nüfuzlu beynəlxalq təşkilatlarla əlaqələrinə,
o cümlədən Avropa Şurasına üzvlüyü məsələsinə
böyük önəm verirdi. Milli Məclis
öz növbəsində Azərbaycanın demokratik
inkişaf yolunda mövqeyini möhkəmləndirmək
üçün qəbul etdiyi qanunvericilik aktlarını,
xüsusilə də məcəllələrin
hazırlanmasını sürətləndirdi, Avropa
Şurasının bir sıra saziş və konvensiyalarına
qoşuldu. Bu siyasətin məntiqi nəticəsi kimi
müstəqil Azərbaycan 2001-ci il
yanvarın 17-də Avropa Şurası Nazirlər Komitəsinin
qərarı ilə bu təşkilatın tamhüquqlu
üzvlüyünə qəbul olundu.
Avropa Şurası Parlament
Assambleyasında ölkəmizin ilk parlament nümayəndə
heyətinə 2001-ci ildən 2003-cü ilin oktyabrınadək
cənab İlham Əliyev rəhbərlik edirdi. Nümayəndə
heyəti AŞ PA-nın 2001-ci il aprel
sessiyasında "Ermənistan tərəfindən azərbaycanlı
əhaliyə qarşı törədilmiş
soyqırımın tanınması" və "Ermənistan
və Dağlıq Qarabağda saxlanılan müharibə əsirləri
və girovları" adlı rəsmi sənədlərin qəbul
olunmasına nail oldu.
Sonrakı mərhələdə ölkənin
ictimai-siyasi həyatında, iqtisadi inkişafında baş verən
keyfiyyət dəyişiklikləri, ölkəmizin Avropa
hüquq məkanına daxil olması ilə əlaqədar Konstitusiyaya
bir sıra əlavə və dəyişikliklərə
ehtiyac yarandı. Bu tarixi və təbii
proseslərin nəticəsi kimi ölkədə iki dəfə
konstitusiya islahatı həyata keçirildi.
İlk dəfə - 2002-ci ildə Azərbaycanda
konstitusion dəyişikliklərə yaranan ehtiyac məhz həyatın
bütün sahələrində qabarıq nəzərə
çarpan sürətli inkişafdan irəli gəlirdi. 2002-ci il avqustun 24-də keçirilmiş referendumun nəticəsi
kimi ölkənin əsas sənədinə bir sıra mütərəqqi
dəyişikliklər edildi. Dəyişikliklər
məhkəmə islahatlarının həyata keçirilməsinə,
Milli Məclisin fəaliyyətinin, seçki sisteminin təkmilləşdirilməsinə,
insan hüquq və azadlıqlarının daha səmərəli
müdafiəsinə xidmət etdi.
Sonrakı mərhələdə ulu öndərin
layiqli davamçısı Prezident İlham Əliyevin rəhbərliyi
ilə cəmiyyət həyatının bütün sahələrində
əldə edilən uğurlar, sosial-iqtisadi islahatların dərinləşməsi,
vətəndaş cəmiyyəti institutlarının,
qeyri-hökumət təşkilatlarının dövlət dəstəyi
ilə əhatə olunması, Avroatlantik məkana inteqrasiya,
bütövlükdə respublikanın həyatında
özünü qabarıq göstərən fundamental dəyişikliklər
və pozitiv yeniliklər ölkə Konstitusiyasında yenidən
bir sıra əlavə və dəyişikliklər edilməsini
gündəmə gətirdi. Bu məqsədlə 2009-cu il martın 18-də keçirilən referendum
Azərbaycan xalqının demokratikləşmə və liberallaşmaya
xidmət edən, insan hüquqlarının qorunmasında əlavə
imkanlar açan konstitusiya islahatlarını dəstəklədiyini
təsdiq etdi.
2003-cü ilin oktyabrından ulu öndərin
siyasi kursunu bütün sahələrdə uğurla davam etdirən
Azərbaycan Prezidenti İlham Əliyev də qanun
yaradıcılığı prosesinə dövlət
quruculuğunun mühüm sahələrindən biri kimi
yanaşmış, Milli Məclisin müasirləşməsinə,
maddi-texniki bazasının yüksəlməsinə
çalışmışdır.
Bu gün
Milli Məclis dövlət başçısına dəstək
olaraq keçid dövrünü arxada qoymuş ölkəmizin
yeni inkişaf modelinin hüquqi təminatının
yaradılmasında yaxından iştirak edir. Bu
baxımdan parlamentin fəaliyyətinə qiymət verən
Prezident İlham Əliyev öz fikirlərini belə
açıqlayır:
"Milli Məclis Azərbaycanın
inkişafında çox mühüm rol oynayır. Yeni qanunlar qəbul olunur, Milli Məclisin beynəlxalq
fəaliyyəti möhkəmlənir və deputatların
seçicilərlə görüşləri çox mütəmadi
xarakter alır. Bu, çox önəmlidir,
çünki seçicilərin qayğıları,
onların arzuları ilk növbədə yerinə yetirilməlidir.
Bu baxımdan Milli Məclis üzvlərinin fəaliyyətindən
çox şey asılıdır. Bütün
görülən işlər, ölkədə gedən
inkişaf meyilləri bir məqsədə qulluq edir: Azərbaycanı
hərtərəfli inkişaf etdirmək, zəngin, qüdrətli
dövlətə çevirmək, sosial ədalət prinsiplərini
tam şəkildə bərqərar etmək və ölkəmizi
müasirləşdirmək."
Bu gün fəxrlə deyə bilərik
ki, IV çağırış Milli Məclis ölkəmizin
Konstitusiyasına uyğun olaraq qanun
yaradıcılığı sahəsində üzərinə
düşən vəzifələri uğurla həyata
keçirir. Parlamentdə qəbul olunan
Konstitusiya qanunları, məcəllələr, qanunlar, təsdiq
edilmiş konvensiyalar və sazişlər cəmiyyət və
dövlət həyatında yaranan münasibətləri tənzimləməyə
xidmət edir. Milli Məclis öz fəaliyyətində
ulu öndərin dövlətçilik formuluna sadiq qalaraq
milli xüsusiyyətləri nəzərə almaqla qabaqcıl
dünya ölkələrinin təcrübəsindən, o
cümlədən Avropa parlamentarizmi ənənələrindən
bəhrələnməyə xüsusi əhəmiyyət
verir.
Qeyd etmək lazımdır ki, cənab
İlham Əliyevin vaxtilə Avropa Şurası Parlament
Assambleyasında nümayəndə heyətimizin rəhbəri
olduğu dövrdə formalaşmış parlament
diplomatiyası ənənəsi bu gün deputatlarımız
tərəfindən nüfuzlu beynəlxalq qurumlarda uğurla
davam etdirilir.
Bu siyasətin məntiqi nəticəsi kimi Avropa
Şurası Parlament Assambleyasının, BMT Baş
Assambleyasının, Avropa Parlamentinin, Almaniya
Bundestaqının və İtaliya Senatının
Dağlıq Qarabağ problemi ilə əlaqədar qəbul
etdikləri qətnamələrdə ölkəmizin
mövqeyini dəstəkləmələrini misal göstərmək
olar. Bu gün Heydər Əliyev Fondunun həyata keçirdiyi
"Xocalıya ədalət" kampaniyası çərçivəsində
xarici ölkələrdə fəaliyyət göstərən
diaspor təşkilatlarımız, diplomatlarımız və
xarici ölkələrə səfər edən Milli Məclisin
deputatları Xocalı soyqırımının bütün
dünyada tanınması istiqamətində işlər
aparır və artıq Kolumbiya, Meksika, Pakistan, Çexiya,
Rumıniya, Latviya, Bosniya və Herseqovina, İordaniya, Peru,
Panama parlamentlərində və ABŞ-ın 20-dək
ştatında Xocalı soyqırımına siyasi qiymət
verilmişdir. İslam Əməkdaşlıq Təşkilatının
Parlament İttifaqı Xocalı faciəsini beynəlxalq səviyyədə
soyqırımı kimi tanımışdır.
Bu gün qürurla deyə bilərik ki, artıq ölkəmiz
nüfuzlu beynəlxalq tədbirlərə ev
sahibliyi edən etibarlı tərəfdaşa çevrilmişdir.
2013-cü ildə Azərbaycanın BMT kimi
dünyanın taleyinin müzakirə olunduğu mötəbər
qurumun Təhlükəsizlik Şurasına sədrlik etməsi
ölkəmizin günbəgün artan nüfuzunun bariz
nümunəsidir. Müstəqil ölkəmiz
artıq kosmik klubun üzvüdür. 2013-cü
ilin sonuna yaxın isə Azərbaycan dünyaya səs salaraq
"Şahdəniz-2" kimi tanınan XXI əsrin müqaviləsini
imzaladı. Bununla ölkəmiz
Avropanın enerji təhlükəsizliyində mühüm rol
oynadığını bir daha göstərmiş oldu.
Dövlət başçısının
yürütdüyü uğurlu və uzaqgörən siyasəti
yüksək qiymətləndirən Azərbaycan xalqı
2013-cü ilin oktyabrında keçirilmiş seçkilərdə
bir daha məmnuniyyətlə öz Prezidentinə - İlham
Əliyevə səs verdi.
Əminliklə deyə bilərik ki, ölkəmizin imza
atdığı uğurlarda Milli Məclisin də öz
töhfəsi, öz payı var. Müstəqil dövlətimizin
parlamentinin keçdiyi yola nəzər salarkən əmin ola bilərik ki, müasir Azərbaycan dövlətinin
xilaskarı və qurucusu Heydər Əliyevin böyük
uzaqgörənliklə formalaşdırdığı
parlamentarizm ənənələri illər keçdikcə
daha da möhkəmlənir və zənginləşir. Bu
gün hüquqi, demokratik dövlət quruculuğu
prosesındə yaxından iştirak edən IV
çağırış Milli Məclis ölkə həyatının
müxtəlif sahələrində ictimai münasibətləri
tənzimləyən müasir ruhlu qanunlar, qərarlar qəbul
edir, ölkəmizin taleyüklü məsələlərinin
həllində öz sözünü deyir.
Parlamentimiz ulu öndər Heydər Əliyevin dövlətçilik, azərbaycançılıq məfkurəsindən bəhrələnərək bütün məsələlərdə ölkə vətəndaşlarının mənafeyini uca tutur, yeni qanunların insanların rifahının yüksəlməsinə və maraqlarının qorunmasına xidmət etməsinə çalışır. Əminəm ki, IV çağırış Milli Məclis bundan sonra da Prezident İlham Əliyevin rəhbərliyi ilə ölkəmizdə vüsət alan inkişaf prosesinin qanunvericilik bazasının möhkəmləndirilməsi üçün əzmlə çalışacaq, ölkəmizin yeni-yeni uğurlara imza atmasına bundan sonra da öz dəyərli töhfələrini verəcəkdir.
Oqtay ƏSƏDOV,
Azərbaycan Respublikası Milli Məclisinin
Sədri,
YAP Siyasi Şurasının üzvü
Azərbaycan.-
2014.- 9 may.- S.3.