Heydər Əliyevin iqtisadi modeli
dinamik inkişafın təməlidir
İqtisadiyyatı
güclü olan
dövlət hər şeyə qadirdir.
Heydər ƏLİYEV
Dünya təcrübəsi göstərir ki, hər bir dövlətin
inkişaf yolunu müəyyən
edən başlıca amillərdən biri
milli lider faktorudur. Milli lider fenomeninin
elmi əsaslar üzərində müəyyənləşdirdiyi
mükəmməl strategiya ölkənin iqtisadi inkişaf
potensialının reallaşdırılmasını təmin edir və bu potensialın
hər bir vətəndaşın mənafeyinə
xidmət etməsinə geniş imkanlar yaradır. XX əsr
dünya tarixinin parlaq şəxsiyyətlərindən biri kimi Azərbaycan
xalqının müstəqillik arzusunu konkret dövlət modelində gerçəkliyə
çevirərək milyonların qəlbində özü üçün
abidə ucaldan ümummilli
lider Heydər Əliyev müstəqil Azərbaycanın
hərtərəfli inkişaf
strategiyasının müəllifidir.
Azərbaycanın
inkişaf mərhələlərinin təhlili
göstərir ki, ümummilli
lider tərəfindən yeni
prinsiplər əsasında qurulan milli iqtisadiyyatın əsası Heydər
Əliyevin Azərbaycanda ikinci dəfə
hakimiyyətə qayıdışından xeyli
əvvəl - 1969-cu ildə respublikaya rəhbər
seçilməsindən başlayır. Ulu öndər totalitar rejimin
hökmranlıq etdiyi mürəkkəb tarixi şəraitdə Azərbaycanı Sovet İttifaqının ən qabaqcıl
respublikalarından birinə çevirmək üçün
bütün sahələrdə geniş islahatlar həyata
keçirmişdir. Postsovet məkanında analoqu olmayan cəsarətli
qərarları ilə Heydər Əliyev Azərbaycanın iqtisadi inkişafının əsaslarının
yaradılması, zəngin iqtisadi
potensialının ölkənin gələcək
inkişafına yönəldilməsi prosesinə start vermişdir. Heydər Əliyevin ölkənin gələcəyinə
ünvanlanmış strategiyasının
reallaşdırılması nəticəsində Azərbaycan
keçmiş sovetlər birliyində
qabaqcıllar sırasına çıxmış, ölkəmizin
şəhər və kəndlərinin siması sürətlə
dəyişməyə, insanların rifahı
yaxşılaşmağa başlamışdır.
Həmin dövrün statistik
göstəricilərinə nəzər salsaq,
Azərbaycanın 1969-1982-ci illərdə sözün
əsl mənasında böyük uğurlar qazandığını görərik.
Yüksək inkişaf tempi
Azərbaycan iqtisadiyyatının bütün
sahələrini, o cümlədən kənd
təsərrüfatını da əhatə
edirdi. Ulu öndər Heydər Əliyev 70-ci illərin əvvəllərində
SSRİ hökuməti qarşısında aqrar
sektorun inkişafı, kənd əhalisinin
məşğulluğu, güzəranı baxımından taleyüklü məsələlər
qaldırmış və onların həllinə nail olmuşdur. 1971-1975-ci
illərdə 1966-1970-ci illərə nisbətən məhsul istehsalı 34 faiz
artdı, bir sıra vacib
sahələrdə yüksək göstəricilər əldə
edilməsinin möhkəm təməli yaradıldı.
1976-1980-ci illərdə Azərbaycan kənd təsərrüfatı
ümumi məhsulunun artımına
görə SSRİ-də birinci yerə
çıxdı.
Ümummilli liderin uzaqgörən
və müdrik siyasəti nəticəsində
Azərbaycan o zaman Sovet İttifaqında ən qabaqcıl kənd
təsərrüfatı, o cümlədən
pambıqçılıq və üzümçülük
respublikasına çevrildi. Həmin illərdə respublikamızda elektron maşınqayırması, yüngül və yeyinti
sənayesi üçün maşın və
avadanlıq istehsalı, digər mütərəqqi sənaye
sahələri yaradıldı. Əgər XIX əsrdən XX əsrin
80-ci illərinədək (təxminən 100 il
ərzində) Azərbaycanda 735 böyük sənaye
obyekti tikilmişdisə, Heydər
Əliyevin respublikaya rəhbərlik etdiyi ilk dövrdə
onların sayı 1048-ə çatdı. 1971-1985-ci illərdə
581 adda yeni tipli maşın, avadanlıq, aparat
və cihaz nümunələri
yaradıldı. Azərbaycan həmin illərdə neft məhsulları, neft
avadanlığı, əlvan metallar, polad borular, sintetik kauçuk, elektrik
mühərrikləri, məişət kondisionerləri, mineral gübrələr, xalça
və digər istehsal növləri
üzrə Sovet İttifaqında
aparıcı yerlərdən birini tuturdu. Ölkəmizdə buraxılan 350 adda məhsul dünyanın 65 ölkəsinə
ixrac olunurdu.
1969-1982-ci illərdə Heydər Əliyevin rəhbərliyi
ilə ölkəmizdə sənaye və aqrar
sahələrin inkişafında əldə olunan
uğurlarla yanaşı, elm,
təhsil, səhiyyə, mədəniyyət və digər
sahələrdə də müsbət nəticələr əldə
olundu.
Azərbaycanın
inkişaf tarixinin
dinamikası bir daha təsdiq
edir ki, Heydər
Əliyevin 14 iyul 1969-cu ildə hakimiyyətə
gəlişindən sonrakı dövr, əslində
respublikamızı müstəqil dövlət quruculuğuna aparan yolun başlanğıcı idi.
1970-ci illərdən başlanan iqtisadi inkişaf, milli-mədəni
dirçəliş, milli ruhun yüksəlişi
xalqımızın illərdən bəri qəlbində
yaşatdığı dövlətçilik ideyasının
milli-azadlıq mübarizəsində əsas hərəkətverici
qüvvəyə çevrilməsinə mühüm
zəmin yaratdı.
Ulu öndər sonralar o
illəri xatırlayarkən bildirmişdir:
"70-ci illərdə görülən işlər,
yaradılan böyük iqtisadiyyat,
sənaye potensialı və neft sənayesi
sahəsində görülən işlər, yaranmış potensial Azərbaycan Respublikasının
dövlət müstəqilliyinin əsasıdır. Bu gün
bəyan etmək istəyirəm ki, o illərdə bu işləri
görərkən mən məhz Azərbaycanın gələcəyini,
bugünkü müstəqilliyini düşünürdüm. O işləri
görərkən mən əmin idim ki, onlar Azərbaycanın
sərbəst, müstəqil yaşaması üçün
əsas yaradır".
Azərbaycan
Prezidenti İlham
Əliyevin bəyan etdiyi kimi,
əgər 70-ci illərdə Azərbaycanın təkmil neft sənayesi kompleksi
formalaşmasaydı, müstəqillik dövründə yeni neft
strategiyasını uğurla həyata
keçirmək də çətin olacaqdı. Keçmiş imperiya
daxilində hansı qlobal proseslərin getdiyini daha dərindən
müşahidə etmək
imkanına malik olan
Heydər Əliyev Azərbaycanın müstəqillik əldə
edəcəyini öncədən görərək bunun üçün iqtisadi-siyasi, intellektual baza formalaşdırmışdır. Həmin
illərdə ulu öndər milli kadr
hazırlığına da xüsusi diqqətlə yanaşmış,
dövlət idarəçiliyində azərbaycanlıların
sayı artmış, onların xaricdə təhsil almasına
yaxşı imkanlar yaranmışdır.
Məhz o dövrdə xaricdə yüksək
təhsil almış kadrlar bu gün də dövlət
quruculuğu prosesinə öz
töhfələrini verirlər.
Həmin
illərdə formalaşdırılmış böyük
iqtisadi potensial
90-cı illərin sonlarına doğru dünyada cərəyan edən mürəkkəb
proseslərin nəticəsi kimi istiqlaliyyət
qazanmış Azərbaycanın sonrakı mərhələdə
müstəqil yaşamasını təmin etmişdir. Müdrik xalqımızın XX əsrdə dünya
siyasi arenasına bəxş etdiyi nadir şəxsiyyət
kimi ümummilli liderlik zirvəsinə ucalmış Heydər
Əliyev bu gün həm
də müstəqil respublkamızın milli
inkişaf modelinin banisi kimi böyük
ehtiram və rəğbətlə
anılır. Heydər Əliyev özünün dərin iqtisadi
bilik və təcrübəsi əsasında
Azərbaycanın yeni dövr
üçün iqtisadi
inkişaf prioritetlərini müəyyənləşdirmiş,
bu sahədə mövcud
problemlərin həlli yollarını elmi-nəzəri və praktiki əsasda göstərmişdir. Ümummilli lider mərkəzi
planlaşdırma və bölgü
prinsiplərinin hakim olduğu
bir ictimai-iqtisadi formasiyadan azad bazar iqtisadiyyatına optimal
keçid modelini irəli
sürərək onun həyata
keçirilməsinə nail olmuşdur. İqtisadi sahədə
həyata keçirilən islahatların əsasında bazar iqtisadiyyatının
formalaşdırılması yolu ilə
sürətli inkişafı təmin etmək, vətəndaşların
sosial rifahını yüksəltmək məqsədi
dayanır.
Böyük və zəngin tarixə malik
olan xalqımız ötən əsrin son onilliyində müstəqilliyini yenidən
bərpa etdi. Müstəqilliyin bərpasının
ilk illərində ölkəmizdə olduqca mürəkkəb sosial-iqtisadi
və siyasi vəziyyət mövcud
idi. Həmin dövrdə
dövlət idarəçiliyi sahəsində təcrübənin
olmaması, ölkədaxili siyasi böhran, Ermənistan tərəfindən
torpaqlarımızın 20 faizinin
işğalı nəticəsində bir milyondan artıq soydaşımızın
qaçqın və məcburi köçkünə
çevrilməsi kimi hadisələrin təsiri respublikanın sosial-iqtisadi
həyatında dərin izlər buraxmışdı. Bütün bunların nəticəsi olaraq istehsalın həcminin kəskin sürətdə
aşağı düşməsi, işsizlik
və inflyasiya səviyyələrinin
yüksəlməsi müşahidə edilirdi.
Bu
illərdə milli valyutanın zəruri təminat
bazası olmadığına görə onun
alıcılıq qabiliyyəti kəskin şəkildə
aşağı düşdü ki, bu da
işsizliyin artması və əhalinin
rifahının kəskin surətdə pisləşməsi ilə
nəticələndi. 1992-1993-cü illərdə səriştəsiz
büdcə-vergi
və pul-kredit siyasəti respublikanın real imkanları ilə
uzlaşmadığından real və
maliyyə sektorlarının iflasına, iqtisadi
tənəzzülün daha da dərinləşməsinə gətirib
çıxardı. 1992-ci ildə tədavülə
buraxılmış milli valyuta
- manat tezliklə qiymətdən
düşməyə, inflyasiyanın yaranması və sürətlə
artması müşahidə olunmağa
başladı və 1992-ci ildə inflyasiya
səviyyəsi əvvəlki ilə nisbətən 4,9 dəfə
artaraq 912,3 faiz təşkil
etdi. Büdcə kəsirinin ümumi daxili məhsula
nisbəti 1991-ci ildəki 3 faizdən 1994-cü ildə 10 faizə
qədər artdı.
Müstəqilliyin
ilk illərində ölkə
iqtisadiyyatında ÜDM hər il orta hesabla 16,5 faiz azalırdı. Tənəzzül meyli sənayedə xüsusilə kəskin xarakter almış, 1985-ci ilə nisbətən
sənaye istehsalının həcmi 1991-ci ildə 10 faiz, 1992-ci ildə 37 faiz,
1993-cü ildə isə 50 faizə qədər azalmışdı. Ölkə istehsal potensialının demək olar ki, 2/3-ni itirmişdi. Həmin illərdə xarici ticarət dövriyyəsinin həcmi 42 faiz azalmış, 1994-cü ilədək Azərbaycan
iqtisadiyyatına demək olar ki, xarici sərmayə
qoyulmamışdı. Ölkə iqtisadiyyatı idarəolunmaz
vəziyyətə düşmüşdü.
1993-cü ildə Azərbaycan
xalqının təkidli tələbi ilə yenidən hakimiyyətə
qayıdan ulu öndər Heydər
Əliyev Azərbaycan Respublikasının Prezidenti
seçildi. Bununla da ölkədə ictimai-siyasi sabitlik təmin
edildi və iqtisadi həyatda
dirçəliş meyilləri yaranmağa
başladı. Bunun nəticəsində iqtisadiyyata cəlb olunan
investisiyaların həcmi ildən-ilə artdı, xalqın
güzəranı yaxşılaşmağa başladı, bir sıra əhəmiyyətli nailiyyətlər
əldə edildi. Ən böyük nailiyyət isə ölkəmizdə
aparılan müstəqil dövlət quruculuğu
prosesində iqtisadi islahatların və
inkişafın mahiyyət etibarilə yeni
modelin - Heydər Əliyev modelinin
yaranması idi.
Ulu öndərin ən çox diqqət
yetirdiyi məsələlərdən biri islahatların ardıcıl və sistemli şəkildə həyata keçirilməsi
məqsədilə mükəmməl qanunvericilik
bazasının yaradılması, onun beynəlxalq
tələblərə uyğunlaşdırılması idi. İqtisadiyyatın ayrı-ayrı sahələrini tənzimləyən
qanun layihələrini Milli
Məclisin müzakirəsinə göndərən Heydər
Əliyev onların demokratik prinsiplərlə
və aşkarlıq şəraitində müzakirəsini də
vacib sayırdı. Bu
dövrdə qəbul olunmuş iqtisadi qanunlar Azərbaycanın
milli iqtisadi inkişaf modelinin
formalaşmasına və iqtisadi islahatların vətəndaşların mənafeyinə
uyğun şəkildə həyata
keçirilməsinə etibarlı zəmin yaratdı.
1993-2003-cü illərdə qəbul edilmiş
qanun və qərarların böyük əksəriyyəti - 975-i məhz
ümummilli lider Heydər
Əliyevin qanunvericilik təşəbbüsü
əsasında parlamentə təqdim olunmuşdu.
Bu
qanunların, normativ-hüquqi sənədlərin
başlıca məqsədi müstəqil Azərbaycan
dövlətinin iqtisadi əsaslarının
möhkəmləndirilməsi, bazar
iqtisadiyyatının formalaşdırılması, dövlət
idarəetməsinin təkmilləşdirilməsi, vətəndaşların
sosial və iqtisadi
hüquqlarının daha dolğun təmin edilməsi
idi.
Heydər
Əliyevin qətiyyətli siyasəti nəticəsində
1994-cü ildən başlayaraq həyata
keçirilən uğurlu neft
strategiyası, neft gəlirləri əsasında
yaradılmış möhkəm maliyyə-iqtisadi baza hesabına qeyri-neft sektorunun dinamik
inkişafı və iqtisadiyyatın diversifikasiyası, özəl
sektorun inkişafına hərtərəfli dövlət dəstəyi,
regionların tarazlı inkişafı, keyfiyyətli insan kapitalının
formalaşdırılması, səmərəli beynəlxalq iqtisadi əməkdaşlıq, dünya iqtisadiyyatına inteqrasiya
son nəticədə ölkəmizin hər
bir vətəndaşının
rifahının yüksəldilməsində mühüm rol oynadı.
1994-cü
il sentyabrın 20-də dünyanın 8
ölkəsini təmsil edən 11 transmilli
neft şirkəti ilə "Əsrin
müqaviləsi"nin imzalanması Azərbaycanda siyasi sabitliyin
yaradılmasının və enerji təhlükəsizliyinin
möhkəm təməlini qoydu, dünya iqtisadi sisteminə
inteqrasiya üçün
əlverişli şərait yaratdı və ölkəyə xarici
investisiyaların axını başlandı. Azərbaycan MDB məkanında
Qərbin iri neft
şirkətləri ilə böyük miqyasda saziş imzalayan ilk dövlət olmaqla Xəzər dənizində beynəlxalq
əməkdaşlığın əsasını da qoydu. Heydər
Əliyevin neft strategiyasının ən böyük uğuru Azərbaycanın
enerji daşıyıcılarını dünya bazarına çıxaran
Bakı-Tbilisi-Ceyhan əsas ixrac boru kəməri layihəsi idi.
Vaxtilə bəziləri bu kəmərin
reallaşacağına inanmasa da, onu əfsanə
adlandırsa da, ulu
öndər layihənin uğuruna əmin
idi. Bu gün
dünya etiraf edir ki, Heydər Əliyev
dühası, uzaqgörənliyi, mübarizliyi
olmasaydı, Bakı-Tibilisi-Ceyhan da
olmazdı.
Azərbaycan neftinin dünya
bazarlarına çıxarılması üçün
1996-cı ildə Bakı-Novorossiysk, 1999-cu ildə
Bakı-Supsa ixrac neft
kəmərlərinin istismara verilməsinə,
Bakı-Tbilisi-Ceyhan əsas ixrac neft kəmərinin inşası ilə
bağlı sazişin imzalanmasına və
beləliklə də ixrac
marşrutlarının diversifikasiyasına nail
olundu. Bununla
yanaşı, Azərbaycan qazının Qərb bazarına
ixracının təmin olunması üçün
ulu öndərin şəxsi təşəbbüsü
ilə Bakı-Tbilisi-Ərzurum qaz kəmərinin
inşasına başlanıldı.
Ümummilli lider Heydər
Əliyevin 1999-cu ildə imzaladığı fərmanla neft yataqlarının xarici
şirkətlərlə birgə işlənməsindən əldə
edilən mənfəət neftinin
satışından daxil olan
vəsaitlərin səmərəli idarə edilməsi, həmin
vəsaitlərin prioritet sahələrin
inkişafına və sosial-iqtisadi baxımdan mühüm
əhəmiyyət kəsb edən layihələrin həyata
keçirilməsinə yönəldilməsini təmin etmək
üçün Dövlət Neft Fondu yaradıldı. Fəaliyyətinin
əsasını Heydər Əliyevin "Neft
Azərbaycanın ən böyük sərvəti
olub, xalqa, özü də təkcə indiki nəslə
deyil, həm də gələcək nəsillərə
mənsubdur" fəlsəfəsi təşkil edən
Dövlət Neft Fondunun
başlıca məramı neft və qaz hasilatından əldə olunan
vəsaitlərin səmərəli idarə edilməsidir.
Ulu öndərin müdrik
qərarı ilə Dövlət Neft Fondundan ilk vəsait
qaçqın və məcburi köçkünlərin
sosial-məişət şəraitinin
yaxşılaşdırılmasına yönəldildi.
Hazırda beynəlxalq təşkilatlar tərəfindən fondun fəaliyyəti və bu
sahədə şəffaflığın təmin edilməsi
yüksək qiymətləndirilir.
Aqrar sektorun bazar
prinsipləri əsasında qurulması ilə bağlı
islahatların həyata keçirilməsinə
başlanıldı. Ulu öndər Heydər
Əliyevin təşəbbüsü və rəhbərliyi
altında MDB-də ilk olaraq
1995-ci ildən başlanan aqrar
islahatların həyata keçirilməsi, sovxoz
və kolxozların ləğv olunması, onlara məxsus torpağın, mal-qaranın və
əmlakın özəlləşdirilməsi
kimi tədbirlər nəticəsində kənd
təsərrüfatında ciddi struktur dəyişiklikləri baş
verdi, keyfiyyətcə fərqli münasibətlər
formalaşdı.
Heydər
Əliyevin memarı olduğu və uğurla həyata keçirdiyi
torpaq islahatı nəticəsində 1350 min hektardan çox
torpaq sahəsi əvəzsiz olaraq kəndlilərə paylandı, kolxoz və sovxozların yerində fermer təsərrüfatları
yaradıldı. Bütün qeyd olunan tədbirlərin
həyata keçirilməsi nəticəsində bu gün aqrar bölmədə özəl sektorun xüsusi çəkisi
demək olar ki, 100
faizə çatmışdır.
Aqrar sektorda səmərəli təsərrüfatçılığın,
sahibkarlığın inkişafının təmin edilməsi
məqsədilə kənd təsərrüfatı məhsulları
istehsalçılarının əvvəlki vergi
borcları silindi və onlar
torpaq vergisindən başqa
digər vergi ödəmələrindən
azad edildi.
1995-ci
ildən etibarən ölkədə aparılan ardıcıl
və sistemli iqtisadi
islahatların ən mühüm istiqamətlərindən
birini də dövlət mülkiyyətinin
özəlləşdirilməsi və azad
sahibkarlığın inkişafı üçün
əlverişli şəraitin yaradılması təşkil edirdi.
Heydər Əliyev
ölkənin gələcək iqtisadi
inkişafının məhz özəl sektorla
bağlı olduğunu vurğulayırdı:
"Sahibkarlığın inkişaf
etdirilməsi, sərbəst iqtisadiyyata yol verilməsi, bazar
iqtisadiyyatının yaradılması bizim
strateji yolumuzdur". Ulu öndərin
müəyyən etdiyi və onun rəhbərliyi ilə uğurla
həyata keçirilən sahibkarlığın
inkişafı strategiyası özəl bölmənin
inkişafına yönəlmiş tədbirlərin sistemliliyi, dövlət tənzimlənməsinin
liberallaşdırılması, dövlət-sahibkar münasibətlərinin
institusionallaşdırılması ilə xarakterizə edilir. Heydər Əliyevin rəhbərliyi
ilə sahibkarlıq infrastrukturunun
formalaşdırılması istiqamətində mühüm addımlar atıldı, sahibkarlara maliyyə dəstəyi və zəruri
texniki yardım göstərən strukturlar formalaşdı. Sahibkarların vergi yükünün
azaldılması istiqamətində mənfəət və əlavə
dəyər vergisinin dərəcələri
aşağı salındı, kiçik
sahibkarlıq subyektlərinə vahid vergi tətbiq edilməyə başlandı.
Özəlləşdirmənin
həyata keçirilməsi üçün
normativ-hüquqi baza
yaradıldı, "Azərbaycan Respublikasında 1995-1998-ci
illərdə dövlət mülkiyyətinin özəlləşdirilməsinin
Dövlət Proqramı" və Azərbaycan Respublikasında
dövlət əmlakının özəlləşdirilməsinin
İkinci Dövlət Proqramı təsdiq
edildi.
Bu mühüm sənədlərdə xüsusi mülkiyyət və sərbəst rəqabət
prinsipləri əsasında öz-özünü
tənzimləyən bazar iqtisadiyyatı mühitinin yaradılması, iqtisadiyyatın strukturunun bazar
iqtisadiyyatının tələblərinə uyğun
olaraq yenidən qurulması, iqtisadiyyata investisiyaların, o
cümlədən xarici
investisiyaların cəlb edilməsi kimi məsələlər
öz əksini tapmışdır. Dövlət əmlakının özəlləşdirilməsi
və torpaq islahatları, qiymətlərin
liberallaşdırılması, vergi
islahatlarının aparılması, əlverişli biznes mühitinin
yaradılması, xarici investisiyanın
qorunması, eləcə də bazar infrastrukturunun formalaşdırılması
üzrə həyata keçirilən tədbirlər keçid dövrünün başa
çatmasında əhəmiyyətli rol
oynadı.
Heydər
Əliyev Azərbaycan Respublikasının Prezidenti
kimi fəaliyyətə
başladığı ilk gündən vətəndaşların
həyat səviyyəsinin yüksəldilməsini
başlıca məqsəd kimi müəyyənləşdirmişdi.
Ölkədə hər bir vətəndaşın
rifahının yüksəldilməsi, onun sosial
müdafiəsi və layiqli həyat səviyyəsinin
təmin edilməsi məqsədləri ulu
öndərin rəhbərliyi ilə hazırlanmış və
1995-ci ildə ümumxalq referendumu
ilə qəbul edilmiş ali
qanunvericilik sənədində - Konstitusiyada da təsbit edilmişdir. Sosial sahədə mövcud problemlərin
kompleks şəkildə həllini nəzərdə
tutan "2003-2005-ci illərdə yoxsulluğun azaldılması və iqtisadi inkişaf üzrə
Dövlət Proqramı"na uyğun olaraq, əhalinin işlə təmin
olunması, təhsil almaq, səhiyyə
xidmətlərindən faydalanmaq
imkanlarının genişləndirilməsi, infrastruktur
və kommunal xidmətlərə olan ehtiyacın ödənilməsi, sanitariya və gigiyena
şəraitinin, həmçinin ətraf mühitin
yaxşılaşdırılması, insan
üçün layiqli
həyat şəraitinin təmin edilməsi məqsədilə
zəruri işlər həyata keçirildi.
Xalqa xidməti ən böyük
xoşbəxtlik kimi dəyərləndirən
ulu öndər qeyd etmişdir: "İstər bir
azərbaycanlı, Azərbaycan Respublikasının vətəndaşı,
istərsə də onun rəhbəri, Prezidenti kimi mənim həyat
amalım yalnız sizə - bütün
varlığım qədər
sevdiyim Azərbaycan xalqına, dövlətçiliyimizə,
ölkəmizin iqtisadi, siyasi,
mənəvi inkişafına xidmət olmuşdur".
Bu mərhələdə həyata
keçirilən iqtisadi siyasətin mühüm istiqamətlərindən biri də infrastrukturun inkişaf etdirilməsi olmuşdur.
Bu
baxımdan ulu öndərin rəhbərliyi
ilə həyata keçirilən nəqliyyatın inkişafı
siyasətinin mərkəzində ölkə ərazisində
beynəlxalq və tranzit dəhliz və
yolların, ölkənin regionlararası, şəhər və
rayondaxili yol-nəqliyyat infrastrukturunun
inkişafı, eləcə də milli nəqliyyat-yol
sisteminin dünya kommunikasiya məkanına sürətli
inteqrasiyası dururdu. Bu
məqsədlə TRASEKA, Şimal-Cənub nəqliyyat dəhlizi,
İNOGEYT Proqramının həyata keçirilməsinə
başlanıldı. Nəticədə Azərbaycan Xəzər
regionunda əsas multimodal
nəqliyyat qovşağına və beynəlxalq əhəmiyyətli
neft-qaz tranziti ölkəsinə
çevrildi.
Heydər Əliyevin
balanslaşdırılmış xarici
siyasəti sayəsində ölkəmiz Cənubi Qafqazın lokomotiv dövlətinə, regionda
gerçəkləşdirilən bütün
transmilli layihələrin təşəbbüskarına
və fəal iştirakçısına çevrildi.
Ulu
öndərin çoxsaylı xarici səfərləri,
ikitərəfli və beynəlxalq səviyyədə
imzalanmış mühüm saziş və sənədlər, uğurlu neft
diplomatiyası, beynəlxalq və regional
təşkilatlarla aparılan gərgin iş
ölkəmizin inkişafının sürətləndirilməsinə
mühüm töhfəsini verdi. Heydər Əliyevin təşəbbüsü
ilə Birləşmiş Millətlər Təşkilatının
qurumları, Avropa İttifaqı, İqtisadi Əməkdaşlıq Təşkilatı,
Avropa Şurası, eləcə də Dünya Bankı, Beynəlxalq Valyuta
Fondu, Avropa Yenidənqurma
və İnkişaf Bankı və s. kimi beynəlxalq institutlarla səmərəli əməkdaşlıq
yaradıldı.
Görülmüş işlərin nəticəsi olaraq Azərbaycanda 1995-ci ildən dinamik inkişafın yeni dövrü başlandı. 1995-2003-cü illər
ərzində ümumi daxili
məhsul 90,1 faiz, dövlət büdcəsinin
gəlirləri 3,9 dəfə, ölkənin valyuta
ehtiyatları 85 dəfə, sənaye məhsulunun həcmi 22,4 faiz, kənd təsərrüfatı
istehsalı 52,8 faiz, xarici
ticarət dövriyyəsi 4 dəfə, iqtisadiyyatda
məşğul olanların orta aylıq əməkhaqqı
6,2 dəfə artdı, inflyasiya səviyyəsi
2-3 faizə qədər endirildi. Bu dövrdə iqtisadiyyata
bütün maliyyə mənbələri
hesabına 20 milyard ABŞ dolları həcmində
investisiyanın qoyulması təmin olundu.
Beləliklə,
düşünülmüş iqtisadi siyasət nəticəsində makroiqtisadi sabitliyə nail
olundu, davamlı iqtisadi
artımın əsası qoyuldu, eləcə
də əhalinin həyat səviyyəsi
yaxşılaşdı. Qiymətlər sabitləşdi,
özəl sektorun inkişafının dəstəklənməsi
mexanizmi yaradıldı, demokratik,
hüquqi-dünyəvi dövlət qurulması prosesi ilə
yanaşı, bazar iqtisadiyyatına keçid prosesinin sürətləndirilməsi
təmin olundu və ölkədə gələcək
dinamik və davamlı artımın maliyyə
əsasları yaradıldı. Bu gün Azərbaycanda sosial-iqtisadi,
ictimai-mədəni həyatın elə bir
sahəsi yoxdur ki, həmin
sahənin inkişafı ümummilli
liderin adı ilə bağlı
olmasın.
Müasir Azərbaycan dövlətinin banisi Heydər Əliyevin misilsiz
idarəçilik qabiliyyəti, gərgin əməyi nəticəsində
əldə olunmuş nailiyyətlərin
sonrakı illərdə Prezident İlham Əliyev tərəfindən uğurla davam etdirilməsi
sayəsində bu gün
müstəqil Azərbaycan Respublikası bir
çox zirvələri fəth edərək BMT Təhlükəsizlik
Şurasına qeyri-daimi üzv
seçildi, kosmosa peyk çıxaran məhdud saylı dövlətlər
sırasına daxil oldu,
bazar iqtisadiyyatına keçidi
başa çatdırdı, xaricə investisiya yatıran ölkəyə, regionun bütün siyasi və iqtisadi məsələlərinin
həllində əsas söz sahibinə
çevrildi.
Prezident İlham Əliyev bildirmişdir: "On il bundan
əvvəl birinci dəfə prezident vəzifəsinə seçiləndə
söz vermişdim ki, əgər xalq mənə
etimad göstərərsə, mən ulu öndər Heydər Əliyev siyasətinə
sadiq qalacağam. Şadam ki, on il ərzində
qarşıda duran bütün
vəzifələr uğurla icra edildi".
Ölkəmizdə həyata
keçirilən sosial-iqtisadi siyasətin mühüm amillərindən biri
də qarşıya qoyulan hər bir hədəfin reallaşdırılması üçün reallığa adekvat konkret fəaliyyət
proqramlarının işlənib hazırlanmasıdır. Bu baxımdan Azərbaycan Respublikası regionlarının
sosial-iqtisadi inkişafı dövlət
proqramlarının əhəmiyyətini xüsusi
vurğulamaq lazımdır. Keçid dövrünə xas
bir sıra köklü
problemlərin həlli prosesinə məhz bu
fərmanlarla start verilmiş,
qısa zaman ərzində ölkə
iqtisadiyyatında mütərəqqi inkişaf
meyillərinə təkan vermişdir. Məqsədli dövlət proqramlarının uğurlu icrası iqtisadiyyatın davamlı
inkişafına və şaxələndirilməsinə,
regionların potensialının reallaşmasına, bütün şəhər və
rayonların simasının köklü
sürətdə dəyişməsinə, çoxsaylı müasir müəssisələrin və iş yerlərinin
açılmasına, yoxsulluğun əhəmiyyətli
dərəcədə azalmasına, əhalinin həyat səviyyəsinin
davamlı olaraq
yaxşılaşmasına səbəb olmuşdur.
Görülən
kompleks tədbirlər, aparılan islahatlar nəticəsində ölkəmizdə
son 10 ildə ümumi
daxili məhsul istehsalı real
ifadədə 3,2 dəfə, o cümlədən
sənaye məhsulunun ümumi həcmi 2,7
dəfə, kənd təsərrüfatı 1,5 dəfə, tikinti sektoru 4,7 dəfə,
nəqliyyat sektoru 2,5 dəfə, rabitə və informasiya sektoru 8,2 dəfə,
ticarət 3,2 dəfə, adambaşına ÜDM istehsalı
2,8 dəfə artıb.
Ölkə
iqtisadiyyatının inkişafı bir
sıra beynəlxalq təşkilatlar tərəfindən
hazırlanan hesabatlarda da
müsbət əksini tapmışdır. Son
"Qlobal Rəqabətlilik
Hesabatı"na əsasən ölkəmiz 7 pillə irəliləyərək
148 ölkə arasında 39-cu yerə qalxmışdır. Hesabatda "makroiqtisadi sabitlik" göstəricisi üzrə
ölkəmiz dünya sıralamasında
8-ci, "əmək bazarının səmərəliliyi"
göstəricisi üzrə isə 30-cu olmuşdur.
Hesabatda
Azərbaycan bəzi alt göstəricilər
üzrə ilk 20-liyə daxil
olmuşdur: "İnflyasiyanın illik səviyyəsi" (1-ci yer),
"işə götürmə və işdən azad etmə praktikası" (8-ci), "ümumi milli
yığımın ÜDM-ə nisbəti" (10-cu), "ümumi dövlət borcunun
ÜDM-ə nisbəti" (13-cü), "qabaqcıl texnoloji məhsulların dövlət
alqısı" (14-cü), "dövlət büdcəsi saldosunun ÜDM-ə nisbəti" (15-ci). Bununla yanaşı, Azərbaycan
iqtisadiyyatının vəziyyəti beynəlxalq reytinq agentlikləri ("Moody's",
"Standart & Poor's"
və "Fitch Ratings")
tərəfindən də yüksək qiymətləndirildi.
Beləliklə, Azərbaycan Qafqaz ölkələri
arasında investisiya reytinqinə malik yeganə ölkə olaraq
qalmaqdadır.
Prezident İlham Əliyevin
bəyan etdiyi kimi,
hazırda qarşıda duran ən
başlıca məqsəd Azərbaycanı inkişaf
etmiş dövlətlər səviyyəsinə
çatdırmaqdır. Bu məqsədə nail olmaq üçün
dövlət başçısının 29 dekabr
2012-ci il tarixli fərmanı
ilə ixracyönümlü iqtisadiyyata transformasiya və
insan inkişafı konsepsiyası əsas
götürülməklə sosial-iqtisadi
sahələrin inkişafına kompleks yanaşma prinsiplərini özündə əks
etdirən "Azərbaycan 2020: gələcəyə
baxış" İnkişaf
Konsepsiyası təsdiq edildi. Bu Konsepsiya Azərbaycanın
gələcək inkişaf perspektivlərini
dərin elmi əsaslarla müəyyənləşdirən
konseptual əhəmiyyətli sənəddir.
Hazırda
İnkişaf Konsepsiyasında müəyyən
edilmiş hədəflərin
reallaşdırılması ilə bağlı ardıcıl
və zəruri tədbirlər həyata keçirilir
ki, bu da
növbəti illərdə ölkəmizin davamlı
inkişafını, onun dünyada
mövqeyinin daha da möhkəmlənməsini və xalqımızın sosial-iqtisadi vəziyyətinin daha
da yaxşılaşmasını təmin
edəcəkdir.
Beləliklə,
siyasi və iqtisadi
baxımdan sabit, davamlı və dayanıqlı
inkişaf edən Azərbaycanın bugünkü nailiyyətləri məhz Heydər Əliyev siyasətinin, bu siyasətin Prezident İlham Əliyev
tərəfindən uğurla, qətiyyətlə
davam etdirilməsinin məntiqi nəticəsidir. Bu inkişaf
kursu Azərbaycanı daha
böyük zəfərlərə,
möhtəşəm qələbələrə aparır. Ulu öndərin qurub-yaratdığı,
müstəqilliyə qovuşdurduğu Azərbaycan
hazırda Prezident İlham
Əliyevin rəhbərliyi altında sürətlə inkişaf edir,
qarşıya qoyduğu hədəflərə
doğru inamla irəliləyir.
Bu gün dünyada baş verən ictimai-siyasi, iqtisadi hadisələr fonunda tarix Heydər Əliyev strategiyasının uzaqgörənliyini, səlisliyini, Vətənimizin hərtərəfli tərəqqisinə hesablandığını bir daha təsdiq edir. Ölkəmizin dinamik inkişafı Prezident İlham Əliyevin rəhbərliyi ilə müstəqil Azərbaycanın yaxın gələcəkdə dünyanın ən qabaqcıl dövlətləri sırasnda öz yerini tutacağına tam əminlik yaradır.
Şahin
MUSTAFAYEV,
iqtisadiyyat və sənaye naziri
Azərbaycan.- 2014.- 9 may.- S.4.