Ümummilli liderin 91 illiyi ehtiramla yad edildi

Azərbaycan Respublikasının Standartlaşdırma, Metrologiya və Patent üzrə Dövlət Komitəsində ümummilli lider Heydər Əliyevin anadan olmasının 91-ci ildönümünə həsr olunmuş tədbir keçirilmişdir.

Tədbirdə çıxış edən Standartlaşdırma, Metrologiya və Patent üzrə Dövlət Komitəsinin sədri Ramiz Həsənov ulu öndər Heydər Əliyevin Azərbaycan xalqı və dövləti qarşısında əvəzsiz xidmətlərindən danışdı. O vurğuladı ki, ümummilli lider Heydər Əliyevin dühası, uzaqgörənliyi və milli maraqlara söykənən dövlətçilik konsepsiyasının uğurlu nəticəsidir ki, bu gün Azərbaycan dünya iqtisadiyyatına, mədəniyyətinə öz töhfələrini verir.

Tədbirdə 1993-cü il iyunun 15-də ümummilli lider Heydər Əliyevin Azərbaycan xalqının təkidi və tələbi ilə respublika rəhbərliyinə qayıdışı xatırlandı və bildirildi ki, bu qayıdış həm də Azərbaycan tarixinin dönüş nöqtəsi oldu. İtirilməkdə olan müstəqilliyimiz bərpa edildi, ölkəni bürüyən özbaşınalıq və xaos aradan qaldırıldı, vətəndaş müharibəsinin qarşısı alındı.

Tədbirdə Standartlaşdırma, Metrologiya və Patent üzrə Dövlət Komitəsinin yaradılmasının, bu istiqamətdə köklü inkişafın və nailiyyətlərin əldə olunmasının ulu öndərin adı ilə bağlı olduğu bir daha tədbir iştirakçılarının diqqətinə çatdırıldı. Digər çıxış edən struktur bölmə rəhbərləri və gənc dövlət qulluqçuları da Azərbaycanın dövlət müstəqilliyi bərpa edildikdən sonra keçid iqtisadiyyatının problemləri, Azərbaycan xalqının ümummilli lideri Heydər Əliyevin təşəbbüsü və rəhbərliyi ilə ölkəmizdə aparılan əsaslı iqtisadi islahatlar haqqında danışdılar. Komitənin əməkdaşları keyfiyyət infrastrukturunun yaradılması, sahibkarlara dövlət dəstəyi, beynəlxalq standartlaşdırma, metrologiya, uyğunluğun qiymətləndirilməsi, patent siyasətinin həyata keçirilməsi, istehlakçı hüquqlarının etibarlı qorunması və digər məsələlərlə bağlı məruzələrlə çıxış etdilər.

Elnur HADIYEV

Azərbaycan.- 2014.- 11 may.- S.10.