Şuşanın Ermənistan silahlı qüvvələri

tərəfindən işğalının 22-ci ildönümünə

həsr edilmiş anma mərasimi keçirilmişdir

Azərbaycan Respublikasının Şuşa şəhərinin Ermənistan silahlı qüvvələri tərəfindən işğalının 22-ci ildönümü ilə əlaqədar mayın 8-də Beynəlxalq Muğam Mərkəzində anma mərasimi keçirilmişdir.

Əvvəlcə mərasim iştirakçıları Beynəlxalq Muğam Mərkəzinin foyesində şuşalı rəssamların əl işlərindən ibarət rəsm əsərlərinə baxmışlar.

Sonra “Şərəfimiz vətəndir” adlı sənədli film nümayiş etdirilmişdir.

Torpaqlarımızın bütövlüyü uğrunda şəhid olmuş Azərbaycan övladlarının xatirəsi bir dəqiqəlik sükutla yad edilmişdir.

Tədbirdə çıxış edən “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin rəhbəri, Şuşa Rayon İcra Hakimiyyətinin başçısı Bayram Səfərov Ermənistan-Azərbaycan, Dağlıq Qarabağ münaqişəsi barədə danışmışdır. Bildirilmişdir ki, Ermənistanın apardığı təcavüzkar siyasət nəticəsində Azərbaycanın Dağlıq Qarabağ bölgəsi və ona bitişik 7 rayonu işğal olunmuşdur. İşğalçı ermənilər həmin ərazilərdə azərbaycanlılara qarşı etnik təmizləmə əməliyyatları aparmış, Meşəli, Qaradağlı, Xocalı faciələrini törətmişlər.

Qeyd olunmuşdur ki, BMT Təhlükəsizlik Şurasının erməni qoşunlarının Azərbaycanın işğal edilmiş ərazilərindən dərhal çıxarılması barədə 822, 853, 874 və 884 saylı qətnamələrinin qəbulundan 21 ildən artıq vaxtın ötməsinə baxmayaraq, Ermənistan təşkilatın bu tələblərinə məhəl qoymadan işğalçılıq siyasətini davam etdirir.

Bayram Səfərov bildirmişdir ki, ermənilərin bu işğalçılıq siyasəti Azərbaycan xalqına ağır maddi və mənəvi zərbələr vurmuşdur. Müqəddəs torpaqlarımızda vətəndaşlarımızı amansızcasına qətlə yetirən ermənilər insanlığa qarşı ən ağır cinayət törətmişlər. Bu təcavüzkar siyasət nəticəsində bir milyondan çox insan qaçqın və məcburi köçkünə çevrilmişdir.

B.Səfərov qeyd etmişdir ki, torpaqlarımızın bütövlüyü uğrunda Şuşa şəhərindən 195 nəfər şəhid, 165 nəfər əlil olmuş, 58 insan isə itkin düşmüşdür. O vurğulamışdır ki, məscidləri, karvansaraları, mədrəsələri, tarixi abidələri, bulaqları ilə Azərbaycanın ən qədim mədəniyyət mərkəzlərindən biri olan Şuşa xalqımıza görkəmli şəxsiyyətlər, incəsənət xadimləri, ziyalılar bəxş etmişdir. Milli mənəvi dəyərlərimizi və musiqi ənənələrimizi daim yaşadan Şuşa həm də böyük memarların, xəttatların, rəssamların, xalça ustalarının vətənidir.

B. Səfərov bildirmişdir ki, Azərbaycanın mədəniyyət və sənətkarlıq beşiyi olan Şuşa şəhəri XX əsrdə üç dəfə erməni təcavüzünün qurbanı olmuşdur. 1905-1907-ci illərdə bu şəhər ermənilər tərəfindən hücuma məruz qalaraq yandırılmış, 1920-ci ildə şəhərin xeyli hissəsi dağıdılmışdır. 1992-ci il mayın 8-də isə Ermənistan silahlı qüvvələri şəhəri tamamilə işğal etmişlər. İşğal nəticəsində Şuşanın 8 muzeyi, 17 klubu, 8 mədəniyyət evi, 25 orta məktəbi, 25 tibb müəssisəsi, 4 texnikumu, 2 institut filialı, 7 uşaq bağçası, 4 kinoteatrı, 5 mədəniyyət və istirahət parkı, 2 mehmanxanası, uşaq sağlamlıq mərkəzi, sanatoriya, Şuşa televiziyası, Şərq musiqisi alətləri fabriki və bir sıra digər qədim tarixi abidələri ermənilər tərəfindən talan edilmişdir.

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirmişdir ki, Azərbaycanın müqəddəs və tarixi ərazisi olan Şuşa 22 il öncə erməni faşistləri və onların himayədarları tərəfindən işğal edilmişdir. Baş nazirin müavini demişdir ki, Şuşa qədim Azərbaycan ərazisidir. Sadəcə olaraq, bu şəhərin sakinləri müvəqqəti olaraq yerlərini dəyişiblər. Ermənilər də müvəqqəti olaraq burada məskunlaşıblar. Onlar başa düşməlidirlər ki, Şuşada yaşamaq, bu şəhərin suyunu içmək hələ şuşalı olmaq demək deyildir. Başqasının yurdunda, ocağında necə yaşamaq olar?! Ermənilər sonradan gedib yerləşdikləri əraziləri öz torpaqları hesab edirlər. Bu, yolverilməzdir.

Komitə sədri vurğulamışdır ki, Azərbaycanın torpaqlarını işğal altında saxlamaqla əslində Ermənistan heç nə qazanmır, əksinə çox şey itirir.

Şuşanın Azərbaycanın qədim tarixə malik bölgələrindən biri olduğunu deyən Əli Həsənov qeyd etmişdir ki, bu şəhər təkcə Azərbaycan deyil, bütün müsəlman dünyası üçün müqəddəs bir yerdir.

Əli Həsənov qeyd etmişdir ki, Prezident İlham Əliyevin uğurlu siyasəti nəticəsində bu gün Azərbaycan inkişaf edərək dünya miqyasında ən qabaqcıl ölkələrdən birinə çevrilmişdir. Komitə sədri demişdir: “Ulu Öndər bu siyasətin, bugünkü inkişafın təməlini qoydu. Prezident İlham Əliyev bu siyasəti davam etdirərək Azərbaycanı dünyanın qabaqcıl ölkələri sırasına çıxardı”.

Baş nazirin müavini bildirmişdir ki, qaçqınların və məcburi köçkünlərin həyat şəraitinin yaxşılaşdırılması hər zaman Azərbaycan Prezidenti İlham Əliyevin diqqət mərkəzindədir. Dünyanın heç bir münaqişə zonasında qaçqın və məcburi köçkünlər üçün Azərbaycandakı kimi əlverişli şərait yaradılmamışdır.

Əli Həsənov vurğulamışdır ki, Azərbaycan Prezidentinin uğurlu fəaliyyəti nəticəsində ölkəmizdə neft kapitalı insan kapitalına çevrilmişdir. Baş nazirin müavini əmin olduğunu bildirmişdir ki, Dağlıq Qarabağ münaqişəsinin həlli istiqamətində Prezident İlham Əliyevin gördüyü işlər tezliklə öz nəticəsini verəcəkdir və torpaqlarımız işğaldan azad ediləcəkdir.

Tədbirdə çıxış edən “Dədə Qorqud” Milli Fondunun prezidenti Eldar İsmayılov Fond və “Azərbaycan dünyası” beynəlxalq jurnalı tərəfindən təsis olunmuş “Vətən övladı” ordenini Azərbaycanın Milli Qəhrəmanı, şəhid Albert Aqarunovun qardaşı Rantik Aqarunova təqdim etmişdir.

Azərbaycan Dağ Yəhudiləri İcmasının sədri Semyon İxiilov ölkəmizdəki mövcud tolerantlıq mühitindən danışmış, milli azlıqlara, o cümlədən yəhudilərə göstərilən diqqət və qayğıya görə minnətdarlığını bildirmişdir.

Tədbir Şuşa şəhər musiqi kollektivlərinin ifasında “Sən qalib gələcəksən” adlı ədəbi-bədii kompozisiya ilə başa çatmışdır.

AzərTAc

Azərbaycan.- 2014.- 9 may.- S.10.