Nəriman Ağaqulu oğlu Quliyev
Azərbaycanın elmi ictimaiyyətinə ağır itki üz vermişdir. Fizika sahəsində tanınmış
alim, əməkdar elm
xadimi, Azərbaycan Milli Elmlər Akademiyasının həqiqi
üzvü, fizika-riyaziyyat
elmləri doktoru,
professor Nəriman Ağaqulu
oğlu Quliyev
2014-cü il mayın
20-də ömrünün 88-ci ilində vəfat etmişdir.
Nəriman Quliyev 1926-cı il dekabr ayının 28-də Bakı
şəhərində anadan
olmuşdur. Orta məktəbi başa vurduqdan sonra 1943-cü ildə Azərbaycan Dövlət Bədən Tərbiyəsi İnstitutuna
daxil olmuş, lakin fizikaya hədsiz marağı səbəbindən burada təhsilini yarımçıq
qoymuş, 1947–1952-ci illərdə
Azərbaycan Dövlət
Universitetinin fizika-riyaziyyat
fakültəsində ali təhsil almışdır. 1952-ci ildə
həmin universitetin aspiranturasına qəbul olunan Nəriman Quliyev 1953-cü ildə Lomonosov adına
Moskva Dövlət Universitetinə köçürülmüş
və 1955-ci ildə burada fizika ixtisası
üzrə aspiranturanı
bitirmişdir.
Əmək fəaliyyətinə 1956-cı ildə Azərbaycan Dövlət Universitetində
başlayan Nəriman Quliyev nəzəri fizika kafedrasında assistent və baş müəllim vəzifələrində çalışmışdır. 1959-cu ildən etibarən o, bütün sonrakı taleyini Azərbaycan Elmlər Akademiyası ilə bağlamışdır.
Nəriman Quliyev 1959–1981-ci illərdə
Fizika İnstitutunda direktorun elmi işlər üzrə müavini işləmiş,
1981–2001-ci illərdə Azərbaycan
Elmlər Akademiyasının
vitse-prezidenti, 2001–2007-ci illərdə
isə birinci vitse-prezidenti olmuşdur.
O, 2007-ci ildən Azərbaycan
Milli Elmlər Akademiyası prezidentinin müşaviri idi.
Nəriman Quliyev 1957-ci ildə Moskva şəhərində
namizədlik və
1975-ci ildə doktorluq
dissertasiyalarını müdafiə
etmişdir. O, 1976-cı ildə
Azərbaycan Elmlər
Akademiyasının müxbir
üzvü, 1983-cü ildə
isə həqiqi üzvü seçilmişdir.
Ömrünün altmış ilə yaxın bir dövrü ərzində
akademik Nəriman Quliyev öz səmərəli yaradıcılığı
ilə Azərbaycanda fizika elminin inkişafına töhfələr
vermişdir. Onun nəzəri fizikanın
aktual problemləri ilə əlaqəli geniş spektrli axtarışları həmin
istiqamətdə gələcək
dərin tədqiqatların
bünövrəsini təşkil
etmişdir. Alim xüsusən
nüvə və elementar zərrəciklər
fizikasına dair araşdırmaları ilə
tanınırdı. Nəriman Quliyev
ana dilində bu sahə üzrə
yazılmış ilk sanballı
elmi-kütləvi nəşrin
müəlliflərindəndir. Alimin gəldiyi qənaətlər
nəzəri əhəmiyyəti
ilə səciyyələnmiş
və mütəxəssislər
tərəfindən dəyərləndirilmişdir.
Azərbaycanda nüvə fizikasının
inkişafının mühüm
mərhələsi Nəriman
Quliyevin adı ilə bağlıdır.
Respublikamızda elmi potensialın qorunub saxlanılması və gücləndirilməsi,
Milli Elmlər Akademiyasının fəaliyyətinin
təkmilləşdirilməsi və müasir tələblərdən irəli
gələn islahatların
həyata keçirilməsi
proseslərində Nəriman
Quliyev yaxından iştirak edirdi. Müstəqil Azərbaycanın dünyanın
tanınmış nüvə
tədqiqatları mərkəzləri
ilə elmi-texniki əməkdaşlıq əlaqələrinin
coğrafiyasının genişləndirilməsində
onun xidmətləri təqdirə layiqdir.
Yüksəkixtisaslı kadrların hazırlanmasına böyük qüvvə sərf edən Nəriman Quliyev gənc fiziklər nəslinin formalaşmasında bilik və bacarığını əsirgəməmişdir. Alimin çoxillik zəhmətinin məhsulu olan silsilə araşdırmalarının nəticələri ölkəmizdə və onun hüdudlarından kənarda çap edilmiş 100-dən artıq sanballı elmi əsərdə əksini tapmışdır. Mötəbər beynəlxalq forumlarda o, Azərbaycan elmini layiqincə təmsil etmişdir.
Akademik Nəriman Quliyevin uzunmüddətli elmi və elmi-təşkilatçılıq fəaliyyəti yüksək qiymətləndirilmişdir. Alim bir sıra mükafatlara layiq görülmüş, müstəqil Azərbaycan Respublikasının ali mükafatlarından “Şöhrət” və “İstiqlal” ordenləri ilə təltif edilmişdir.
Tanınmış alim, bacarıqlı elm təşkilatçısı və təvazökar insan Nəriman Quliyevin xatirəsi onu tanıyanların qəlbində hər zaman yaşayacaqdır.
Allah rəhmət eləsin!
İlham Əliyev
Artur Rasizadə
Oqtay Əsədov
Ramiz Mehdiyev
Elçin Əfəndiyev
Hacıbala Abutalıbov
Akif Əlizadə
Fatma Abdullazadə
Arif Mehdiyev
Akif Hacıyev
Arif Paşayev
Rasim Əliquliyev
Maqsud Əliyev
Çingiz Qacar
Adil Qəribov
Nazim Məmmədov
Azərbaycan.- 2014.- 21 may.- S.3.