Azərbaycanın Avropa Şurası Nazirlər Komitəsinə sədrliyi müddətində müəyyən etdiyi prioritetlər yüksək qiymətləndirilir

Mayın 23-də Azərbaycan Respublikası Milli Məclisinin sədri Oqtay Əsədov Avropa Şurası Parlament Assambleyasının sədri xanım Ann Brasör ilə görüşmüşdür.

AzərTAc xəbər verir ki, görüşdə O.Əsədov Ann Brasör ilə 2012-ci ildə keçirdiyi görüşü xatırlamışdır. Sədr növbəti görüşün Bakıda, Avropa Şurası Parlament Assambleyasının daimi komitəsinin iclasında reallaşmasından məmnunluğunu bildirmişdir. O, demişdir ki, Azərbaycan bu iclasın yüksək səviyyədə keçirilməsi üçün əlindən gələni etmişdir.

Ann Brasör bildirmişdir ki, Azərbaycan bir sıra sahələrdə böyük uğurlar əldə etmişdir. Eyni zamanda, rəsmi Bakı Avropa Şurasının bir sıra konvensiyalarını da qəbul etmişdir. A.Brasör Azərbaycanın Avropa Şurası Nazirlər Komitəsinə sədrliyi müddətində müəyyən etdiyi prioritetlərin yüksək qiymətləndirildiyini vurğulamışdır.

Görüşdə qarşılıqlı maraq doğuran bir sıra məsələlər ətrafında fikir mübadiləsi aparılmışdır.

Azərbaycan.-2014.- 24 may.- S.1.