Bakıda Azərbaycan, Türkiyə və Türkmənistan xarici

işlər nazirlərinin birinci üçtərəfli görüşü keçirilmişdir

Mayın 26-da Bakıda Azərbaycan Respublikasının xarici işlər naziri Elmar Məmmədyarovun, Türkiyə Respublikasının xarici işlər naziri Əhməd Davudoğlunun və Türkmənistanın xarici işlər naziri Rəşid Meredovun birinci üçtərəfli görüşü keçirilmişdir.

AzərTAc xəbər verir ki, əvvəlcə ikitərəfli görüşlər keçirən nazirlər sonra danışıqları üçtərəfli formatda davam etdirmişlər.

Üçtərəfli görüşün yekununda Bakı Bəyannaməsi qəbul olunmuşdur.

Növbəti görüşün bu ilin ortalarında Türkmənistanın paytaxtı Aşqabad şəhərində keçiriləcəyi barədə razılıq əldə edilmişdir.

Sonra nazirlər mətbuata bəyanatlarla çıxış etmişlər.

Elmar Məmmədyarov demişdir ki, görüşdə Azərbaycan, Türkiyə və Türkmənistan arasında bir çox istiqamətlərdə, o cümlədən nəqliyyat, enerji, mədəniyyət, turizm, idman sahələrində əməkdaşlığın daha da genişləndirilməsi, müxtəlif layihələrin həyata keçirilməsi barədə fikir mübadiləsi aparılmışdır. Bildirilmişdir ki, Aşqabaddakı növbəti görüşdən əvvəl keçiriləcək iclasda qeyd edilən sahələrdə əməkdaşlığın genişləndirilməsi məsələləri müzakirə olunacaqdır. İstiqamət artıq bəllidir. Bu layihələr üzərində işimizi quracağıq. E.Məmmədyarov yalnız xarici işlər nazirləri səviyyəsində deyil, əməkdaşlığın göstərilən sahələrinə məsul olan nazirliklərin rəhbərlərinin də görüşlərinin keçirilməsi barədə razılığa gəlindiyini vurğulamışdır.

Türkiyənin xarici işlər naziri Əhməd Davudoğlu 28 may – Respublika Günü münasibətilə Azərbaycan xalqını təbrik etmişdir.

O, Soma fəlakəti zamanı göstərilən yardıma görə Azərbaycan və Türkmənistan prezidentlərinə minnətdarlığını bildirmişdir. İldə iki dəfə nazirlərin üçtərəfli görüşlərinin keçiriləcəyi barədə razılığa gəlindiyini söyləyən Ə.Davudoğlu aparılan müzakirələrin səmərəli nəticələr verəcəyinə əminliyini bildirmişdir. O demişdir: “Biz, həmçinin beynəlxalq sülhə töhfələr verməyi düşünürük”.

Türkmənistanın xarici işlər naziri Rəşid Meredov Bakıya dəvət və yüksək səviyyəli görüş üçün təşəkkürünü bildirmişdir. O, Azərbaycan, Türkmənistan və Türkiyə arasında əməkdaşlığın Asiya ilə Avropa arasında əlaqələrin inkişafı baxımından önəmini qeyd etmişdir. Bildirmişdir ki, görüşdə ikitərəfli və üçtərəfli əlaqələrin aktual məsələləri, gələcək əməkdaşlığın vacib istiqamətləri müzakirə edilmişdir. Nazir demişdir ki, ölkələrimizin ortaq tarixi, mədəni kökləri vardır ki, bu da hər üç dövlət arasında əməkdaşlığın daha da möhkəmlənməsinə zəmin yaradır.

Azərbaycan.-2014.- 27 may.- S.3.