Azərbaycanın xarici işlər naziri Qoşulmama Hərəkatının XVII nazirlər konfransında təşkilatın Avropa Qrupundan sədr müavini qismində çıxış etmişdir

Azərbaycan Respublikasının xarici işlər naziri Elmar Məmmədyarov Qoşulmama Hərəkatının Əlcəzairdə keçirilən XVII nazirlər konfransında təşkilatın Avropa Qrupundan sədr müavini qismində çıxış etmişdir.

Xarici İşlər Nazirliyinin mətbuat xidmətindən AzərTAc-a verilən məlumata görə, Avropa Qrupunun adından açılış nitqi söyləyən Elmar Məmmədyarov əmin olduğunu bildirmişdir ki, bu görüş bizim beynəlxalq hüququn norma və prinsiplərinə əsaslanan ədalətli, çiçəklənən, sabit və təhlükəsiz dünya qurmaq səylərimiz istiqamətində mühüm addım olacaqdır. Bu məqsədlə Avropa Qrupu görüşün işinə töhfə vermək niyyətindədir.

Nazir demişdir: “Əminik ki, bizim buradakı görüşümüz və onun nəticəsində qəbul edəcəyimiz yekun sənəd Hərəkatın prinsip və məqsədlərinə dəstək olaraq kifayət qədər hərtərəfli gündəliyi əks etdirir. Şübhəsiz ki, nəticədə bu sənəd üzv dövlətlər tərəfindən həmrəylik ruhunda həyata keçiriləcəkdir”.

Elmar Məmmədyarov qeyd etmişdir ki, bütün dünyada beynəlxalq sülhün və təhlükəsizliyin gücləndirilməsində böyük rol oynayacağına əmin olduğumuz Qoşulmama Hərəkatının prinsip və məqsədlərinə dəstək olaraq Avropa Qrupu siyasi məsləhətləşmələr və praktiki əməkdaşlığın genişləndirilməsi və dərinləşdirilməsi istiqamətində Hərəkat çərçivəsində səmərəli qarşılıqlı fəaliyyət göstərəcəkdir.

Azərbaycan.-2014.- 30 may.- S.7.