Heydər Əliyev Fondunun dəstəyi ilə
“Qala festivalı”
və III Beynəlxalq
“Tullantıdan sənətə” sərgisi
açılmışdır
Azərbaycanın birinci xanımı
Mehriban Əliyeva
tədbirdə iştirak etmişdir
Mayın
30-da Heydər Əliyev Fondunun dəstəyi ilə “Qala”
Dövlət Tarix-Etnoqrafiya Qoruğunda ənənəvi “Qala
festivalı” və III Beynəlxalq “Tullantıdan sənətə”
sərgisi açılmışdır.
AzərTAc xəbər verir ki, Azərbaycanın birinci
xanımı, Heydər Əliyev Fondunun prezidenti Mehriban
Əliyeva, Fondun vitse-prezidenti Leyla Əliyeva və Arzu
Əliyeva tədbirdə iştirak etmişlər.
Azərbaycanın tarixi irsinə həssaslıqla
yanaşan Heydər Əliyev Fondu maddi-mədəniyyət abidələrimizin
qorunması üçün ciddi addımlar atır. Fondun
prezidenti, Xəzər rayonundan Milli Məclisin deputatı
Mehriban Əliyevanın təşəbbüsü ilə
respublikamızda ən qədim insan məskənlərindən
sayılan Qala qəsəbəsində də silsilə tədbirlər
həyata keçirilir.
“Qala festivalı” da Heydər Əliyev Fondunun dəstəyi
ilə xalqımızın zəngin tarixi keçmişini, qədim
və mükəmməl məişət ənənələrini
yaşatmaq, gənc nəslə tanıtmaq və təbliğ
etmək məqsədini daşıyır. Beş min il
tarixi olan qəsəbədə 3-cü minillikdən
başlayaraq XX əsrədək yerli tarixi, mədəni abidələr,
arxeoloji tapıntılar mövcuddur.
Festivala qatılan tamaşaçılar Abşeronda ən
qədim insan məskənlərindən biri hesab olunan Qalada
tarixi keçmişə səyahət və tarixi sirlərinin
daşıyıcısı olan - Qalanın özünəməxsusluğu
haqqında məlumat əldə etmək imkanı
qazanmışlar.
“Qala festivalı”nda Heydər Əliyev Fondunun prezidenti
Mehriban Əliyeva nəvələri ilə, Fondun vitse-prezidenti
Leyla Əliyeva və Arzu Əliyeva iştirak etmişlər.
Festival
çərçivəsində Heydər Əliyev Fondunun təşəbbüsü,
“Təmiz Şəhər” Açıq Səhmdar Cəmiyyətinin
(ASC) təşkilatçılığının, IDEA
(Ətraf Mühitin Mühafizəsi Naminə Beynəlxalq
Dialoq) İctimai Birliyinin, “İçərişəhər”
Dövlət Tarix-Memarlıq Qoruğu İdarəsinin və
“Gallery” incəsənət qalereyasının birgə dəstəyi
ilə III Beynəlxalq “Tullantıdan sənətə” sərgisi
açılmışdır.
Sərgidə
Azərbaycan ilə yanaşı, ABŞ, Avstraliya,
Böyük Britaniya, Niderland, İspaniya, Türkiyə,
Çexiya, Kuba, Kolumbiya və Yaponiyadan olan sənətkarların
da əl işləri təqdim edilmişdir.
Sərginin əsas məqsədi əhaliyə ətraf
mühiti təmiz saxlamağın vacibliyini aşılamaq,
planetin ekoloji sağlamlığına qayğı ilə
yanaşmanı təbliğ etmək, insanları
israfçılıqdan yayındırmaq və onları
lazımsız saydıqları əşyaları
düşünmədən zibil qutularına atmaq vərdişlərindən
çəkindirməkdir.
Layihədə
iştirak edən sənətkarlar istifadəyə yararsız
hesab olunan kağız, avtomobil hissələri, şüşə,
metal qırıntıları və digər tullantılara
ikinci həyat verməklə “lazımsız əşyalar
toplusu”ndan hətta incəsənət əsərləri də
düzəltməyin mümkün olduğunu bir daha
nümayiş etdirirlər.
Artıq 3-cü dəfə keçirilən bu beynəlxalq
tədbirin Qala qəsəbəsində təşkili isə təsadüfi
deyildir.
2010-cu ildən etibarən Heydər Əliyev Fondunun təşəbbüsü
ilə “Təmiz Şəhər” ASC Qala qəsəbəsində
tullantıların idarə olunması sisteminin müasir
standartlara uyğun qurulması üzrə “Təmiz Qala” pilot layihəsini
həyata keçirir.
Layihənin məqsədi Qala qəsəbəsində
tullantıların toplanaraq çeşidlənməsi,
daşınması və təkrar emalını müasir
şəkildə təşkil etməkdir. Buna uyğun
olaraq, tullantıların vaxtında toplanması və
daşınması ilə yanaşı, onların əhali tərəfindən
üzvi və qeyri-üzvi tullantılar üzrə
çeşidlənməsi üçün Qala qəsəbəsində
müxtəlif konteynerlər
quraşdırılmışdır.
Gündəlik
fəaliyyətində sosial, ətraf mühit, mədəniyyət
və incəsənət məsələlərinə
böyük diqqət ayıran Azərbaycanın birinci
xanımı Mehriban Əliyeva sərgilənən işlərlə
yaxından tanış olmuş, rəssamlarla
fikir mübadiləsi aparmış və sərginin işinə
uğurlar arzulamışdır.
Festivalda növbəti dayanacaq “Ekosfera” Sosial-Ekoloji Mərkəzi
olmuşdur.
Burada bu təşkilatın fəaliyyəti ilə yaxından
tanış olmaq mümkündür.
“Ekosfera” təşkilatı Azərbaycanda ilk dəfə
olaraq uşaq və gənclər üçün interaktiv təlim,
ekoloji-mədəni proqramlar işləyib
hazırlamışdır. Təşkilatın
reallaşdırdığı turlarda uşaq və gənclər
təbiət qoynunda kənd həyatı keçirir, milli mənəvi
dəyərlərimiz, tətbiqi incəsənət növləri,
xalq mahnıları və rəqslər, yerli adət-ənənələrlə
tanış olur, ənənəvi kənd
işlərində, milli bayram və festivallarda iştirak edir,
ekodüşərgələrdə yaşayırlar.
Heydər
Əliyev Fondunun prezidenti Mehriban Əliyeva, Fondun vitse-prezidenti
Leyla Əliyeva və Arzu Əliyeva əsl bayrama çevrilən
bu festivalda mərkəzin fəaliyyətinə cəlb edilən
uşaqlarla söhbət etmiş, onların gördükləri
işlərlə maraqlanmış, ətraf mühitin
qorunması sahəsində biliklərin
artırılmasının vacibliyini vurğulamışlar.
Festival 1 iyun - Uşaqları Beynəlxalq Müdafiə
Günü ərəfəsində keçirilmiş və əsl
xalq gəzintisinə çevrilmişdir. Burada
uşaqlar xüsusi qatarlarda qədim ərazini gəzmiş,
at meydançasında olmuş, oyun meydançasında kəndirbazlara
tamaşa etmiş, müxtəlif oyunlarda ya iştirak
etmiş, ya da həmin oyunların tamaşaçıları
olmuşlar. Bu qədim məskənin hər
guşəsi festival zamanı bir məqsədə -
uşaqları əyləndirməyə, Azərbaycanın zəngin
tarixi, mədəniyyəti və adət-ənənələri
haqqında biliklərini onların anladığı dildə
- oyun və səhnələşdirilmiş tamaşalar vasitəsilə
məlumatlandırmağa xidmət etmişdir.
“Qala festivalı” daha bir əlamətdar hadisə ilə
yadda qalmışdır. Burada ceyranlar və Qız qalası
güşəsində uşaqlar ceyran və Qız
qalasının maketlərini öz fantaziyalarına uyğun rəngləmək
imkanı qazanmışlar.
Qeyd edək
ki, hər il Bakıda “Qız qalası”
Beynəlxalq incəsənət festivalı keçirilir. Həmin festivala müxtəlif ölkələrdən
təşrif buyuran rəssamlar məhz Qız qalası və
ceyranlar maketləri üzərində işləyərək əsərlər
yaradırlar. “Qala festivalı”nda isə uşaqlara
özlərini “Qız qalası” festivalının
iştirakçıları kimi hiss etmək şansı
verilmişdir.
İDEA İctimai Birliyinin guşəsində Leyla
Əliyevanın rəhbərlik etdiyi bu qurumun ölkəmizin ətraf
mühitə qayğı və ekoloji maarifləndirmə sahəsində
bir çox yerli və beynəlxalq təşəbbüslərə
imza atması, gənclərin dayanıqlı inkişafı
üzrə qlobal hərəkata fəal qoşulması
üçün platforma rolunu oynaması ilə bağlı
müxtəlif materiallar yer almışdır.
Uşaqlar üçün cəlbedici güşələrdən
biri də nağıllar düşərgəsi olmuşdur. Qala qəsrində yerləşən
bu güşə nağıllar aləmini
xatırlatmış və bir anlıq uşaqlara özlərini
sevdikləri nağılların qəhrəmanları kimi hiss
etmək imkanı vermişdir.
Heydər
Əliyev Fondunun prezidenti Mehriban Əliyeva, Fondun vitse-prezidenti
Leyla Əliyeva və Arzu Əliyeva bayram ab-havası ilə
yadda qalan festivalda qurulan müxtəlif çadırlarla da tanış olmuşlar.
Burada
paytaxtın Qaradağ, Xəzər, Nərimanov, Suraxanı
rayonları ümumtəhsil məktəblərinin və 1,2 və 3 nömrəli uşaq evlərinin
çadırları təqdim edilmişdir. Həmin
çadırlarda uşaqların əl işləri sərgilənir.
Heydər Əliyev Fondunun prezidenti Mehriban Əliyeva
uşaqlarla görüşüb səmimi söhbət
etmiş, bu tədbirin qədim adət-ənənələrini,
ölkəmizin milli mənəvi dəyərlərinin öyrənilməsi
baxımından əhəmiyyətini vurğulamış,
onlarla birgə xatirə şəkilləri çəkdimiş,
əl işlərinin hazırlanması prosesi ilə
maraqlanmışdır.
Uşaqlar da Azərbaycanın birinci xanımının
suallarına həvəslə cavab verərək, daim
onların qayğısını çəkən Heydər
Əliyev Fondunun prezidentinə öz əlləri ilə
hazırladıqları xatirə hədiyyələrini təqdim
etmişlər.
Qala Arxeololji Etnoqrafik Muzey Kompleksinin ərazisində davam
edən festivala Rusiya Federasiyasının Həştərxan
vilayəti, Pakistan, Bosniya və Herseqovinadan olan qonaqlar da dəvət
olunmuşlar.
Bu uşaqlar həmin ölkələrdə Heydər
Əliyev Fondunun təşəbbüsü ilə inşa
edilmiş məktəblərdə təhsil alırlar.
Heydər Əliyev Fondunun prezidenti Mehriban Əliyeva
qonaqlarla görüşmuş, onları Bakıda görməkdən
məmnunluğunu bildirmiş, xatirə şəkli çəkdirmişdir.
Qonaqlar da Fondun gördüyü işləri yüksək
qiymətləndirdiklərini vurğulamışlar.
“Qala
festivalı”nda dulusçuluq, dəmirçilik ənənələrini
sərgiləyən sənətkarların əl işlərinə
tamaşa etmək, iş prosesini izləmək və onun
iştirakçısı olmaq mümkün olmuşdur.
Burada Heydər Əliyev Fondunun prezidenti Mehriban Əliyeva
incə bəzək prosesini də izləmişdir.
Festivalın daha bir guşəsi-rəsm sərgisi
olmuşdur. Festivalın məqsədlərindən biri də bu
tədbirə qatılan uşaqlara öz
bacarıqlarını nümayiş etdirmək imkanı
yaratmaqdır. Onlar burada uşaq
dünyagörünüşünə uyğun maraqlı əsərlər
yaratmağa çalışmışlar.
Azərbaycanın birinci xanımı da onlara öz
bacarıqlarını nümayiş etdirmək
üçün kömək etmişdir.
Heydər Əliyev Fondunun prezidenti Mehriban Əliyeva,
Fondun vitse-prezidenti Leyla Əliyeva və Arzu Əliyeva
onları gülərüzlə və səmimiyyətlə
qarşılayan uşaqların əl işlərinin
maraqlı olduğunu bildirmiş və bu gənc peşəkarlara
uğurlar arzulamışlar.
2008-ci ildə Heydər Əliyev Fondunun dəstəyi ilə
yaradılan açıq səma altında ilk Arxeoloji Etnoqrafik
Muzey Kompleksinin tacir evində isə milli musiqimiz səslənmiş,
təndir çörəyi bişirilmiş, qonaqlar çaya
dəvət olunmuşlar. Buradakı musiqi
meydançasında Qədim Musiqi Alətləri
Ansamblının ifası festivalı daha da rəngarəng
etmişdir.
Muzey Kompleksinin ərazisində müxtəlif nemətlərin təqdim edildiyi bazar da təşkil olunmuşdur. Tamaşaçılar tarixi abidələr, adətlərlə tanış olmaqla yanaşı, Azərbaycanın şirniyyatları və təbii nemətlərini də dadmışlar. Festival günündə tərəvəz, gül, ədviyyat bazarını gəzmək, milli mətbəximizin yeməklərinin dadına baxmaq mümkün olmuşdur. Bu güşə həm də Azərbaycan mətbəxinin zənginliyini nümayiş etdirmişdir.
Maraqlı güşələrdən biri də nalbənd emalatxanasıdır.
Festivalda uşaqlar üçün müasir musiqidən ibarət rəqs meydançası da qurulmuşdur. Bir sözlə, “Qala festivalı” gələcəyimiz olan uşaqlar üçün yaddaqalan bir bayram əhval-ruhiyyəsi yaratmışdır. Onlar Heydər Əliyev Fondunun təşkil etdiyi bu festivalda əylənmiş, müxtəlif oyunlara qoşulmuş, rəqs bacarıqlarını göstərmiş, mahnılar ifa etmişlər.
Bu festival bir daha Heydər Əliyev Fondunun yeni nəslin fiziki, intellektual, mənəvi sağlamlığına diqqət yetirməsinin əyani sübutu olmuşdur. Uşaqlar bu festivalda iştirak etmələrinə yaradılan imkana görə Heydər Əliyev Fondunun prezidenti Mehriban Əliyevaya dərin minnətdarlıqlarını bildirmişlər.
Festivalda respublika üzrə orta ümumtəhsil və internat məktəblərindən, uşaq evlərindən, qaçqın və məcburi köçkün ailələrindən 3000-dək uşaq iştirak etmişdir.
Bu tədbir 1 iyun - Uşaqları Beynəlxalq Müdafiə Günü ərəfəsində Heydər Əliyev Fondunun uşaqlara növbəti hədiyyəsi olmuşdur.
İyunun 3-dək davam edəcək III Beynəlxalq “Tullantıdan sənətə” sərgisini izləmək istəyən hər kəsin iştirakını təmin etmək məqsədilə İçərişəhərdən - Qoşa qala qapısının önündən saat 12:00 və 15:00-da olmaqla gündə iki dəfə pulsuz avtobus turları təşkil olunacaqdır.
AzərTAc
Azərbaycan.-2014.- 31 may.- S.2.