Uşaqları Beynəlxalq Müdafiə Gününə həsr olunmuş

"İstedadlı uşaqlar festivalı-2014" keçirilmişdir

Mayın 30-da Beynəlxalq Muğam Mərkəzində Ailə, Qadın və Uşaq Problemləri üzrə Dövlət Komitəsinin (AQUPDK) və “YARAT” Müasir İncəsənət Məkanının birgə təşkilatçılığı ilə 1 iyun-Uşaqları Beynəlxalq Müdafiə Gününə həsr olunmuş "İstedadlı uşaqlar festivalı-2014" keçirilmişdir.

Festivala xüsusi qayğıya ehtiyacı olan və digər xalqları təmsil edən 200-dək uşaq qatılmışdır.

Dövlət qurumlarının və qeyri-hökumət təşkilatlarının nümayəndələrinin iştirakı ilə keçirilən tədbirdə çıxış edən AQUPDK-nın sədri Hicran Hüseynova və UNİCEF-in Azərbaycandakı nümayəndəliyinin rəhbəri Mark Hervord uşaqları təbrik etmiş, ölkəmizdə həyata keçirilən dövlət uşaq siyasətinin uğurlu nəticələrindən danışmışlar.

Qeyd olunmuşdur ki, hazırda ölkəmizdə 2 milyon 500 mindən çox uşaq vardır. Respublikamızın sürətli iqtisadi inkişafı onların sosial problemlərinin həlli üçün etibarlı zəmin yaradır.

Tədbirdə rəsm əsərləri nümayiş etdirilmiş, həmçinin 2013-2014-cü illərdə uğur qazanmış uşaqların fəaliyyətini əks etdirən "İstedadlı uşaqlar-2014" mövzusunda qısa filmin təqdimatı olmuşdur.

Sonra elm-təhsil, yaradıcılıq və idman sahələrində Azərbaycanı beynəlxalq müsabiqələrdə və yarışmalarda təmsil edərək qalib olmuş, yüksək nailiyyətlər əldə etmiş uşaqlar mükafatlandırılmış, "Azərbaycanın gələcəyi" kuboku ilə təltif olunmuşlar.

Festival uşaq yaradıcılıq qruplarının iştirakı ilə konsert proqramı ilə davam etmişdir.

Azərbaycan.-2014.- 31 may.- S.3.