Azərbaycan ilə Macarıstan arasında iqtisadi əlaqələrin

genişləndirilməsi üçün böyük potensial mövcuddur

Azərbaycan ilə Macarıstan arasında iqtisadi əlaqələrin genişləndirilməsi üçün böyük potensial mövcuddur. Bu barədə iqtisadiyyat və sənaye naziri Şahin Mustafayevin ölkəmizdə səfərdə olan Macarıstanın xarici işlər və ticarət naziri, Azərbaycan Respublikası Hökuməti və Macarıstan Respublikası Hökuməti arasında İqtisadi Əməkdaşlıq üzrə Birgə Komissiyanın həmsədri Peter Siyartonun rəhbərlik etdiyi nümayəndə heyəti ilə görüşündə ətraflı söhbət açılıb.

Nazirlikdən AzərTAc-a bildiriblər ki, görüşdə Şahin Mustafayev xarici işlər və ticarət naziri vəzifəsinə təyin olunması münasibətilə Peter Siyartonu təbrik edib və fəaliyyətində uğurlar arzulayıb. Ş.Mustafayev ölkələrimiz arasında əlaqələrin qarşılıqlı hörmət və səmərəli əməkdaşlıq prinsipləri üzərində qurulduğunu diqqətə çatdırıb, bu sahədə dövlət başçılarının qarşılıqlı səfərlərinin mühüm önəmini vurğulayıb.

Bildirilib ki, Azərbaycan-Macarıstan arasında siyasi, iqtisadi və mədəni sahələrdə əlaqələr uğurla inkişaf edir. İndiyədək iki ölkə arasında iqtisadi sahə də daxil olmaqla, müxtəlif sahələr üzrə bir sıra sənədlər imzalanıb. 2014-cü ildə Azərbaycan və Macarıstan arasında ticarət dövriyyəsi artıb. Azərbaycan Respublikası Hökuməti və Macarıstan Respublikası Hökuməti arasında İqtisadi Əməkdaşlıq üzrə Birgə Komissiyanın fəaliyyəti ölkələrimiz arasında əlaqələrin inkişafına öz töhfəsini verir. Ş.Mustafayev yaxın vaxtlarda Macarıstanda iki ölkənin iş adamları arasında keçirilməsi nəzərdə tutulan biznes forumun əməkdaşlığın inkişafına yeni impuls verəcəyini vurğulayıb.

Macarıstanın xarici işlər və ticarət naziri P.Siyarto Azərbaycana növbəti səfərindən, ölkələrimiz arasında əməkdaşlığın inkişafından məmnunluğunu ifadə edib. O, əczaçılıq, heyvandarlıq, su təsərrüfatı və digər sahələrdə əlaqələrin genişləndirilməsi üçün böyük potensialın olduğunu bildirib.

Görüşdə iqtisadi əməkdaşlığın mövcud vəziyyəti və perspektivləri, ticarət əlaqələrinin genişləndirilməsi, birgə ekoloji layihələrin həyata keçirilməsi və qarşılıqlı maraq doğuran digər məsələlər müzakirə olunub.

Azərbaycan.-2014.- 4 noyabr.- S.2.