Tatyana Anodina: Azərbaycan dünyada aviasiya

infrastrukturu çox inkişaf etmiş ölkə kimi tanınır

“Azərbaycan Respublikası Hökuməti ilə Aviasiya və Hava Məkanından İstifadə üzrə səlahiyyətli nümayəndələrin Dövlətlərarası Şurası arasında onun Azərbaycan Respublikasının ərazisində yerləşməsinin şərtləri haqqında” Sazişin imzalanması böyük hadisədir”.

AzərTAc xəbər verir ki, Beynəlxalq Aviasiya Komitəsinin (BAK) prezidenti və Aviasiya və Hava Məkanından İstifadə üzrə səlahiyyətli nümayəndələrin Dövlətlərarası Şurasının prezidenti Tatyana Anodina bu gün həmin Sazişin imazalanmasının əhəmiyyətini bu cür qiymətləndirib.

T.Anadona deyib: “Qərargahın Bakıda yerləşməsi haqqında Sazişin imzalanması təsadüfi deyil. Bu, təkcə mənim bu gözəl və qonaqpərvər ölkəyə şəxsi məhəbbətimin və ehtiramımın, inteqrasiya fəaliyyətimizin təməlində dayanan Azərbaycan xalqının böyük oğlu Heydər Əliyev barədə nurlu xatirələrimin və ona şəxsi minnətdarlığımın, ulu öndər Heydər Əliyevin işlərinin davamçısı - Azərbaycan Prezidenti İlham Əliyevə ehtiramımın əlaməti deyildir. Azərbaycan iqtisadi baxımdan dinamik inkişaf edən ölkələrdən biridir. O, dünyada aviasiya infrastrukturu çox inkişaf etmiş ölkə kimi tanınır.

Biz ölkələrimizin prezidentlərinin, hökumətlərinin, xarici işlər nazirliklərinin, qanunvericilik hakimiyyəti orqanlarının yardımı və dəstəyi olmadan heç vaxt dünyanın ən səmərəli peşə təşkilatlarından biri kimi ad-san qazanmazdıq. Bu gün imzalanan Saziş Azərbaycan Prezidenti İlham Əliyev tərəfindən bəyənilib. Şuranın qərargahının günəşli və gözəl Azərbaycanda yerləşməsi, fəaliyyət göstərməsi üçün çox gözəl şərait yaradılıb. Biz təkcə sülh və uçuşların təhlükəsizliyi üçün çox əhəmiyyətli olan peşə fəaliyyəti ilə məşğul olmaq niyyətində deyilik, həm də bütün dünyanın heyran qaldığı, qeyri-adi və unikal qadın olan Azərbaycanın birinci xanımı Mehriban Əliyevanın başçılıq etdiyi Heydər Əliyev Fondunun fəaliyyətinə və onun həyata keçirdiyi sosial proqramların inkişafına töhfə vermək istəyirik”.

Xatırladaq ki, bu gün Bakıda “Azərbaycan Respublikası Hökuməti ilə Aviasiya və Hava Məkanından İstifadə üzrə səlahiyyətli nümayəndələrin Dövlətlərarası Şurası arasında onun Azərbaycan Respublikasının ərazisində yerləşməsinin şərtləri haqqında Saziş” imzalanıb. Sənədi Azərbaycan tərəfindən xarici işlər nazirinin müavini Xələf Xələfov, Aviasiya və Hava Məkanından İstifadə üzrə səlahiyyətli nümayəndələrin Dövlətlərarası Şurası tərəfindən Beynəlxalq Aviasiya Komitəsinin (BAK) prezidenti və Aviasiya və Hava Məkanından İstifadə üzrə səlahiyyətli nümayəndələrin Dövlətlərarası Şurasının prezidenti Tatyana Anodina imzalayıblar.

Azərbaycan.-2014.- 7 noyabr.- S.4.