Azərbaycan həm də turizm ölkəsinə çevrilir

Bu sahədə turistlərə yüksək səviyyəli xidmət göstərilməsi vacib şərtlərdən sayılır

Qeyri-neft sektorunun inkişafı prioritet olaraq qalır. Bu sahədə xidmət sektoru xüsusi yet tutur. Son illərin, eləcə də bu ilin ötən aylarının göstəriciləri təsdiqləyir ki, qeyri-neft sektorunda turizmin inkişafı da sürətlə gedir. Bölgələrdə turizm imkanları genişlənməkdədir.

Bu barədə Nazirlər Kabinetinin 2014-cü ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında da ətraflı bəhs edilmişdir. Prezident İlham Əliyev bu sahənin böyük potensialı olduğunu vurğulayaraq demişdir: "Biz ölkəmizin turizm imkanlarını daha da geniş şəkildə təbliğ etməliyik. Çünki bizim gözəl təbiətimiz var, istənilən turizm növü Azərbaycanda mövcuddur. Gözəl sahillər, Xəzər dənizi, dağlar, meşələr, xizək turizmi. Artıq infrastruktur da var. Aeroportlar, magistral yollar və bütün bölgələrdə beşulduzlu, dördulduzlu, üçulduzlu gözəl hotellər yaradılır".

Turizmin inkişafında təbii ki, əsas rollardan birini də qonaqlar üçün rahatlığın yaradılması, onlara yaxşı istirahət şəraitinin təşkil olunması, nümunəvi xidmət göstərilməsidir. Bu sahədə turistlərin yerləşdikləri mehmanxanaların xüsusi rolu var. Dövlət Statistika Komitəsinin açıqladığı fakt və rəqəmlər ölkəmizdə həmin istiqamətdə görülən işlərin necə genişmiqyaslı olduğunu bir daha təsdiqləyir. Belə ki, cari ilin birinci yarısında Azərbaycanda 527 mehmanxananın mövcud olduğu, onlarda nömrələrin sayının 16876 vahid, birdəfəlik tutumun isə 34731 çarpayı-yer təşkil etdiyi bildirilir. Birdəfəlik tutumun 11807-si Bakı, 927-si Gəncə, 6563-ü Xaçmaz, 1195-i Masallı, 1184-ü Qubada yerləşən mehmanxanalardadır. Qalanı isə ölkənin digər şəhər və rayonlarındakı mehmanxanaların payına düşür.

Ölkədə turizmin inkişafını təsdiqləyən faktlardan biri də bu ilin ilk altı ayında mehmanxanalarda yerləşdirilmiş şəxslərin sayının artmasıdır. Belə ki, keçən ilin eyni dövrü ilə müqayisədə onların sayı 0,5 faiz artıb və 319 min nəfərə çatıb.

Mehmanxanada qalan şəxslərin 58,8 faizi xarici ölkə vətəndaşları olub. Onların da sayı keçən ilin müvafiq vaxtı ilə müqayisədə xeyli artaraq 187,7 min nəfərə çatıb. Mehmanxanada yer alan Azərbaycan vətəndaşlarının sayı isə 131,3 min nəfər təşkil edib. Qonaqların 15,6 faizi turizm yollayışı ilə gələnlər olub.

Sözügedən dövrdə gecələmələrin ümumi sayı əvvəlki ilin birinci yarısı ilə müqayisədə 1,2 faiz artaraq 711,8 min adam-gecə təşkil edib və bunun 57,2 faizi xarici ölkə vətəndaşlarının payına düşüb. Ümumi gecələmələrin 70,5 faizi Bakıda, qalan hissəsi isə ölkənin digər şəhər və rayonlarında qeydə alınıb. İyun ayında daha çox gecələmələr olub.

Mehmanxana və mehmanxana tipli müəssisələrdə müvəqqəti yerləşmə üzrə xidmət göstərilən şəxslərin əsas hissəsinin - 80 faizdən çoxunun turizm məqsədilə səfər edənlər olması da turizmin inkişafını təsdiqləyən göstəricilərdəndir. Bu ilin birinci yarısında onların 34,6 faizi istirahət və əyləncə, 48,1 faizi işgüzar, 10,2 faizi müalicə, 7,1 faizi digər turizm məqsədilə səfər ediblər. Bakıya, Naxçıvan Muxtar Respublikasına, Naftalan, Xaçmaz, Lənkəran, Gəncə, Şəki, Quba, İsmayıllı, Masallı şəhər və rayonlarına istirahət məqsədilə səfər edən turistlərin sayı digər bölgələrlə müqayisədə daha çox olub. Turizm məqsədilə səfər edən ölkə vətəndaşlarının 52,7 faizini Bakı şəhərinin sakinləri təşkil edib.

Statistik rəqəmlər ilin birinci yarısında mehmanxanalarda bir gecə qalmaq üçün orta qiymətin 77,8 manat olduğunu göstərir. Bakı şəhərində bu rəqəm ölkə üzrə orta göstəricidən yüksək olub və 125,9 manat təşkil edib.

Keçən ilin müvafiq dövrü ilə müqayisədə mehmanxana və mehmanxana tipli müəssisələrin əldə etdikləri gəlir artaraq 80 milyon manata çatıb. Gəlirlərin 69,5 faizi nömrələrin satışından əldə olunub. Qalan hissəsi isə içkilər də daxil olmaqla qida məhsullarının satışından, müalicə, sağlamlıq və digər xidmətlərin göstərilməsindən yaranıb.

Qonaqlara nümunəvi xidmət göstərmək üçün ölkəmizdə mehmanxana və hotellərin sayı ildən-ilə artırılır. Bu ilin əvvəlindən də şəhər və bölgələrdə bir sıra bu tipli müəssisələr istifadəyə verilib. Elə bu yaxınlarda Naftalanda "Qarabağ SPA and Resort" hotel kompleksi açılıb. Prezident İlham Əliyev kompleksin açılış mərasimində iştirak edib.

Tədbirdə bir daha qeyd edilib ki, son illərdə Azərbaycana böyük turizm axını müşahidə olunur. Bu baxımdan ölkədə hotel biznesinin daha da inkişafı üçün kompleks tədbirlər görülür, qonaqlara yüksək səviyyəli xidmət göstərilir. Açılış mərasimində çıxış edən dövlət başçısı turizmin inkişafını belə səciyyələndirmişdir: "Ona görə ki, Azərbaycan inkişaf edir, gözəl işlər görülür, təhlükəsizlik tam şəkildə təmin edilir. Azərbaycan dünyanın ən təhlükəsiz ölkələrindən biridir. Böyük imkanlar var. Biznes imkanları genişlənir, tarixi yerlərimiz kifayət qədər çoxdur, gələnlər bizim zəngin mədəniyyətimizlə tanış olurlar".

Turizm sahəsinin inkişafı həm də yeni iş yerlərinin açılmasına imkan yaradır. Belə ki, indi mehmanxanalarda çalışan işçilərin sayı 8118 nəfərə çatıb. Bu, onların orta siyahı sayının keçən ilin müvafiq dövrü ilə müqayisədə 5,9 faiz artması deməkdir. İndi bu sahədə bir işçiyə düşən orta aylıq əməkhaqqının məbləği 469 manatdır.

Ölkədə qonaqlara yüksək səviyyədə xidmət göstərəcək yeni hotellər də tikilməkdədir. Hazırda Bakıda iki möhtəşəm hotelin inşası davam etdirilir. Biri "İnturist" adlanacaq. "Ağ şəhər" bulvarında isə otaqlarının sayına görə Azərbaycanda ən böyük hotellərdən biri (bəlkə də ən böyük hotel) tikilir.

Flora SADIQLI

Azərbaycan. - 2014.- 9 noyabr.- S.9.