Səsin sehri, dözümün sınmayan əzmi...

Əlli illik efir təcrübəsi olan əməkdar jurnalist Telman Qarayev gözlərinin nurunu itirsə də, 80 yaşında qəlbinin işığında yazır

Azərbaycan jurnalistikasında canlı korifeylər zaman-zaman olub. Müqayisəyə ehtiyac olmasa belə, bu gün də həmin ustad qələm sahiblərinin yaratdığı jurnalistika məktəblərindən bəhrələnənlər az deyil. Belə söz, sənət adamlarının yaradıcılığı ilə yaxından tanışlıq isə qismətdir, hər kəsə nəsib olmur.

Azərbaycan Yazıçılar Birliyinin Natəvan klubunda əməkdar jurnalist, 80 yaşında da qıvraq görünən, əli qələmdən, dili kəlamdan düşməyən, əlli illik efir təcrübəsi olan əməkdar jurnalist Telman Qarayevin üçcildlik "Sənətin keçdiyi yollar" kitabının birinci cildinin təqdimat mərasimi keçirildi. Müəllifin Azərbaycan Yazıçılar Birliyinin və Bəstəkarlar İttifaqının 80 illik yubileylərinə həsr etdiyi kitabların redaktoru Milli Məclisin deputatı, "Azərbaycan" qəzetinin baş redaktoru Bəxtiyar Sadıqov, məsləhətçisi xalq yazıçısı, AYB-nin sədri Anardır.

Azərbaycan Yazıçılar Birliyinin gənclərlə iş üzrə katibi Rəşad Məcid tədbiri aparmaq üçün sözü "Qobustan" jurnalının baş redaktoru Vaqif Əlixanlıya verdi. O, qocaman söz sahiblərindən biri, uzun illər Azərbaycan radiosunda çalışmış Telman Qarayevin son illər səhhətində problem yaransa da, səsdən sonra qələmə pənah gətirməsindən, yaradıcılıq boyu korifey sənətkarlarla canlı ünsiyyətindən, onların səslərini lentə almasından bu günə qədər həmin yadigarlara sədaqətindən ətraflı danışdı.

Xalq artisti Ramiz Quliyev bu ilin avqust ayında 80 yaşı tamam olan qocaman jurnalistlə bağlı xatirələrini və arzusunu dilə gətirdi: "Telman Qarayev Azərbaycan mədəniyyətində iz qoyan canlı və həm də əfsanəyəbənzər ömür sürən bir qələm adamı, söz sahibidir. Uşaqlıq dostumun mənzilində olmuşam. Onun mənzilini səs, söz, ümumilikdə, sənət muzeyi adlandırardım. Çünki orada beş mindən artıq səs nümunələri saxlanır. Həmin arxiv bu gün Telman Qarayevə, sabah misilsiz səs sərvətlərindən biri kimi xalqa məxsus olmalıdır. Arzu edərdim ki, bu sərvət elə "səs muzeyi" kimi də qorunub saxlansın, ona qayğı göstərilsin. Telman Qarayev, demək olar ki, həyatını və yaradıcı fəaliyyətini radio jurnalistikasına həsr edib və ömrünün ixtiyar çağlarındadır. Əlbəttə, Telman Qarayev, dövlət və hökumətimizin daim diqqət və qayğısını hiss edib. Lakin artıq qocaman söz adamı 2006-cı ildən gözlərinin nurunu itirdiyindən, onun sosial vəziyyəti ürəkaçan deyil.

Şair-publisist Ramiz Məmmədzadə, yazıçı-publisist Mustafa Çəmənli, xalq artisti Zümrüd Məmmədova da Telman Qarayevin radio jurnalistikasında məktəb yaratmasından bəhs etdilər.

Azərbaycan Radio və Televiziya Verilişləri ASC Həmkarlar İttifaqı Komitəsinin sədr müavini, əməkdar jurnalist Mübariz Süleymanlı, əməkdar jurnalist Tahir Aydınoğlu, Şuşa Dövlət Dram Teatrının direktoru Yadigar Muradov, əməkdar artist, Azərbaycan radiosunun diktoru Əli Məhəmmədoğlu, "Abşeron" rəsm qalereyasının direktoru Eldəniz İbrahimov, şairə-publisist, ötən əsrin 70-ci illərində Telman Qarayevlə Azərbaycan radiosunda birgə çalışmış Raifə Sərxanqızı, AYB-nin əməkdaşı, şair Araz Arabaçı və digərləri də yubilyarla bağlı xatirələrini bölüşərək, ona bundan sonra da yaradıcılıq yollarında əzmkarlıq nümunəsi göstərməyi arzuladılar.

Məhəmməd NƏRİMANOĞLU

Azərbaycan. - 2014.- 14 noyabr.- S. 7.