“TEAS Press” Nəşriyyat Evinin “Üç alma” uşaq ədəbiyyatı bölməsi kitablarını təqdim etdi

Noyabrın 13-də “TEAS Press” Nəşriyyat Evinin “Üç alma” uşaq ədəbiyyatı bölməsi uşaqlar üçün kitablarını ilk dəfə təqdim edib.

Mərasimdə Avropa Azərbaycan Cəmiyyətinin sədri Taleh Heydərov sözügedən nəşriyyat evinin uşaq ədəbiyyatı bölməsi haqqında geniş məlumat verib.

Bildirib ki, bölmənin məqsədi Azərbaycan dilində uşaqları əyləndirmək, maarifləndirmək və onları mütaliəyə həvəsləndirməyə istiqamətlənmiş keyfiyyətli kitablar nəşr etməkdir. Bu məqsədə nail olmaq üçün seçilmiş strategiyanın iki istiqaməti var. Birincisi, dünyanın ən yaxşı kitablarını – həm klassik, həm də yeni kitabları tərcümə edib nəşr etməkdir. İkinci istiqamət isə Azərbaycanda və xaricdə yaşayan azərbaycanlı yazıçı və illüstratorları cəlb etməklə uşaqlarımız üçün dünya standartlarına cavab verən bədii və elmi-kütləvi ədəbiyyat nümunələri nəşr etməkdir.

Azərbaycan xalqının ümummilli lideri Heydər Əliyevin uşaqların inkişafına hər zaman böyük diqqət və qayğı göstərdiyini diqqətə çatdıran AAC-nin sədri uşaq nəşri istiqamətində görülən işlərin nəşr evinin müqəddəs borcu olduğunu vurğulayıb.

Qeyd olunub ki, təqdimatı keçirilən kitablar “TEAS Press”in peşəkar yaradıcı heyəti tərəfindən tərcümə və dizayn edilib. Bu kitabların nəşri zamanı bir çox janrlar və uşaqların yaş qrupları üzrə mütaliə-qavrama səviyyələri nəzərə alınıb. Kitabların hamısı Türkiyədə, beynəlxalq standartlara uyğun olaraq çap edilib. Kitabların əksəriyyəti keyfiyyətli və sərt cildlə üzlənib. Onların arasında valideyn, müəllim və kitabxanaçıların uşaqlara ucadan oxuması üçün gözəl, rəsmli kitablar da var. Bu kitablar mütaliəyə hələ təzəcə başlamış uşaqlar üçün nəzərdə tutulub. Klassik romanlar yumşaq cildlə üzlənib. Onlar daha böyük yaş qrupundan olan uşaqlar üçün nəzərdə tutulub.

Diqqətə çatdırılıb ki, məşhur yazıçı və illüstrator Mo Uilyamsın beş şəkilli kitabı Azərbaycan dilinə tərcümə edilib. Dünyanın ən məşhur uşaq ədəbiyyatı müəllifi və illüstratoru Mo Uilyams yazdığı əsərlərə və çəkdiyi illüstrasiyalara görə ən nüfuzlu mükafatları qazanıb.

Tədbirdə məşhur ingilis yazıçısı və illüstratoru Devid Makkinnin 4 kitabı təqdim edilib. Kitablar hamısı yazıçının məşhur “Elmer” seriyasındandır. Elmer müasir uşaq hekayələri dünyasında ən çox tanınan və sevilən personajdır. Bu il Elmerin 25 illiyidir. Azərbaycandakı tədbir bu yubileyin bir hissəsi oldu.

Təqdim edilən üç şəkilli kitab isə bir çox mükafatların sahibi, hollandiyalı yazıçı və illüstrator Hido van Heynektnə aiddir. İki kitab onun məşhur “Rikki”, digəri isə “Maks” seriyasındandır.

“Mənim ilk klassik hekayəm” silsiləsindən uşaqlar üçün asan oxunaqlı kitablar da təqdim edilib. Bu kitablar oxumağa hələ yenicə başlayan uşaqlar üçün nəzərdə tutulub. “Capstone” nəşriyyatından alınmış digər silsilə “Sevimli Sevinc” adlanır. Bu silsilə xüsusilə qız uşaqları üçün nəzərdə tutulub. Kitab Sevincdən və onun ən yaxın rəfiqəsi Mələkdən bəhs edir.

Qeyd edək ki, “TEAS Press” Mo Uilyamsı VİP-kitab təqdimatına xüsusi qonaq kimi dəvət edib. Mərasimin xüsusi qonağı hələ uşaq ikən Bakını görmək arzusunun olduğunu vurğulayıb. Mo Uilyams Azərbaycanın gənc yazarları, animator və uşaq ədəbiyyatı üzrə ixtisaslanan naşirlər üçün ustad dərsi də keçib.

Azərbaycan. - 2014.- 14 noyabr.- S. 3.