Ermənistan
beynəlxalq səviyyədə yalana əsaslanan
siyasət yürüdür
Ermənistan kütləvi
informasiya vasitələrinin yaydığı məlumata
görə, özünü qondarma Dağlıq Qarabağ
rejiminin “xarici işlər naziri” kimi təqdim edən Karen
Mirzoyan bu yaxınlarda Kanadaya səfər edib.
Azərbaycan Respublikası Xarici İşlər Nazirliyinin mətbuat xidmətinin rəhbəri vəzifəsini icra edən Hikmət Hacıyev bununla əlaqədar AzərTAc-a məxsusi müsahibə verib. Müsahibəni təqdim edirik.
Özünü qondarma Dağlıq Qarabağ rejiminin “xarici işlər naziri” kimi təqdim edən Karen Mirzoyanın Kanadaya səfəri ilə bağlı nə kimi tədbirlər görülüb və bu məsələyə Kanada hökumətinin reaksiyası necə olub?
- Özünü Azərbaycan Respublikasının işğal edilmiş ərazilərində yaradılmış qondarma Dağlıq Qarabağ rejiminin “xarici işlər naziri” kimi təqdim edən Karen Mirzoyan adlı şəxsin bu ilin oktyabrında Kanadaya səfəri ilə əlaqədar Azərbaycanın Kanadadakı səfirliyi tərəfindən ölkəmizin narazılığı və narahatlığı Kanada tərəfinə çatdırılıb.
Azərbaycan Respublikasının narazılığına cavab olaraq, Kanada tərəfi bir daha vurğulayıb ki, rəsmi Ottava Azərbaycanın ərazi bütövlüyünü, o cümlədən işğal altında olan Dağlıq Qarabağ və ətraf yeddi rayon üzərində Azərbaycanın suverenliyini tanıyır. Bundan əlavə,
Kanadanın Ermənistan-Azərbaycan, Dağlıq Qarabağ münaqişəsinin ATƏT-in Minsk prosesi çərçivəsində sülh yolu ilə həllini dəstəkləməkdə davam etdiyi bildirilib.
Kanada tərəfindən Azərbaycanın narahatlığının nəzərə alındığı qeyd olunaraq, “Dağlıq Qarabağ”ın nümayəndəsi kimi özünü bəyan edən bu şəxsin səfərinə Kanada hökumətinin nə razılıq verdiyi, nə bu səfəri təşkil etdiyi, nə də yardım etdiyi diqqətə çatdırılıb və belə bəhanə ilə Kanadaya səfər edən hər hansı şəxsin Kanadada rəsmi statusa malik olmadığı vurğulanıb. Kanada tərəfindən məlumat verilib ki, bu ölkəyə səfəri zamanı həmin şəxsin Kanada hökumət nümayəndələri və ya rəsmiləri ilə təmasda olmamasını təmin etmək üçün lazımi tədbirlər görülüb.
Məsələ ilə əlaqədar Kanadanın Vətəndaşlıq və İmmiqrasiya Nazirliyi ilə təmaslar zamanı Karen Mirzoyan adlı şəxsin Ermənistan Respublikasının pasportuna sahib olduğu və Ermənistan Respublikasının vətəndaşı kimi Kanadaya səfər etdiyi müəyyən olunub.
Ona
görə də Kanadaya gəlmək üçün Ermənistan vətəndaşı
kimi müraciət edən bu
şəxsə viza verilməsindən imtina üçün hüquqi əsas olmayıb. Belə
faktların ortaya çıxması Ermənistanın
yalançı təbliğatının çox
qabarıq ifşasıdır. Bu, bir daha ona dəlalət edir ki, Ermənistan Respublikası tərəfindən
beynəlxalq səviyyədə yalana əsaslanan
siyasət yürüdülür və
müxtəlif şəxslərə öz
pasportunu paylayaraq, digər
dövlətlərə bu kimi
şəxslər və onların kimliyi və
əsl vətəndaşlıq mənsubiyyəti
haqqında yanlış məlumat verilir. Bu kimi əməlləri
ilə Ermənistan Azərbaycan ərazisinin bir
hissəsinin ilhaq edilməsi siyasətini yürütdüyünü bir
daha sübut edir.
Azərbaycan.
- 2014.- 8 noyabr.- S.8.