Mədəniyyət və Turizm Nazirliyində

Gürcüstan nümayəndə heyəti ilə görüş olub

Mədəniyyət və Turizm Nazirliyində Gürcüstanın mədəniyyət və abidələri mühafizəsi naziri Mixail Giorqadzenin başçılıq etdiyi nümayəndə heyəti ilə görüş olub.

AzərTAc xəbər verir ki, Azərbaycanın mədəniyyət və turizm naziri Əbülfəs Qarayev qonaqları səmimi salamlayaraq M.Giorqadzenin mədəniyyət naziri vəzifəsində ilk səfərini qardaş Azərbaycana etməsi faktını əlamətdar hadisə adlandırmışdır.

Ə.Qarayev deyib: “Bizim ortaq sərhədlərimizlə yanaşı, ortaq tarixi keçmişimiz var. Biz beynəlxalq layihələrdə həmişə ortaq mövqelərdən çıxış etmişik, əməkdaşlığımızı genişləndirmək üçün zəngin potensial var”.

Nazir daha sonra deyib ki, bu gün İncəsənət Muzeyində gürcüstanlı rəssamların əsərlərindən ibarət “Gürcüstandan sevgilərlə” adlı sərginin açılışı olacaq.

Mixail Giorqadze ölkəmizə və gözəl Bakı şəhərinə dəvət olunduğuna görə təşəkkürünü bildirərək qeyd edib ki, ölkələrimiz arasında istər mədəniyyətdə, istərsə də başqa sahələrdə tarixi münasibətlər nəinki mehriban qonşuluq, hətta əsl qardaşlıq və dostluq münasibətlərinin nümunəsi ola bilər.

Qonaq vurğulayıb ki, mədəniyyət sahəsində qarşılıqlı əlaqələrimizin imkanları çox genişdir. Mədəniyyət xalqların qarşılıqlı yaxınlaşması, onların dostluğunun möhkəmlənməsi üçün ən səmərəli vasitələrdən biridir.

Nazir bu sahədə Azərbaycanla birgə işləməyə hazır olduğunu bildirərək deyib: “Bizim aramızda həll edilə bilməyəcək məsələlər yoxdur”.

Tərəflərin ümumi fikrinə görə, turizm sahəsində əlaqələrimiz yaxşı vəziyyətdədir və mədəni turizm bu işin əsas istiqamətlərindən biri olmalıdır. Bu sahə bizim regiona turist axınının daha da artmasına səbəb ola bilər.

Turistlərin vahid bir region kimi üz tutduqları bu bölgədə mədəniyyətlərin və ənənələrin müxtəlifliyi onlar üçün əlavə stimuldur.

Azərbaycan.-2014.- 19 noyabr.- S.8.