Dövlət Miqrasiya Xidmətində Azərbaycan vətəndaşlığına yeni qəbul və bərpa olunan şəxslərlə görüş olub

Noyabrın 22-də Dövlət Miqrasiya Xidmətinin (DMX) rəisi Firudin Nəbiyev Azərbaycan Respublikasının vətəndaşlığına yeni qəbul və bərpa olunan şəxslərlə görüşüb.

DMX-dən AzərTAc-a bildiriblər ki, Xidmətdə keçirilən görüşdə Firudin Nəbiyev ölkəmizin inkişafından, əsası ulu öndər Heydər Əliyev tərəfindən qoyulmuş inkişaf strategiyasına uyğun olaraq regionun lider dövlətinə çevrilmiş Azərbaycanda son illərdə həyata keçirilən islahatlar nəticəsində qazanılan uğurlardan söhbət açıb.

O, beynəlxalq birliyin bərabərhüquqlu üzvü kimi sabitliyin yüksək səviyyədə təmin olunduğu, tolerantlıq nümunəsi sayılan respublikamızın dünyanın siyasi, iqtisadi və mədəni mühitinə verdiyi töhfələrdən bəhs edib. F.Nəbiyev sadalanan bu amillərin xaricdə ölkəmizə yaratdığı marağa və bunun nəticəsində respublikamızda yaşamaq, işləmək, təhsil almaq, xüsusilə Azərbaycan vətəndaşı olmaq istəyənlərin sayının da ildən-ilə artmasına səbəb olduğunu diqqətə çatdırıb. Xidmət rəisi bu arzuya qovuşanlarla görüşün əhəmiyyətini qeyd edib, belə tədbirin bu il artıq ikinci dəfə keçirildiyini vurğulayıb. O, Prezident, Silahlı Qüvvələrin Ali Baş Komandanı İlham Əliyevin müvafiq sərəncamları ilə Azərbaycan Respublikasının vətəndaşlığına yeni qəbul və bərpa olunan şəxsləri təbrik edib.

Sonra Azərbaycan Respublikasının vətəndaşlığına qəbul və bərpa edilən şəxslərin siyahısı oxunub.

Prezident İlham Əliyevin müvafiq sərəncamları ilə əcnəbi və vətəndaşlığı olmayan 150 şəxs Azərbaycan Respublikasının vətəndaşlığına qəbul, səkkiz nəfər isə bərpa olunub. Onların arasında əsasən vətəndaşlığı olmayan şəxslər üstünlük təşkil edir.

Xidmət rəisi vətəndaşlığa qəbul və bərpa edilmiş şəxslərin hər birinin Azərbaycan dövlətinə layiqli vətəndaş olacaqlarına inandığını bildirib.

Görüş iştirakçıları Azərbaycan Respublikasının vətəndaşı adını şərəflə daşıyacaqlarını vurğulayaraq, bu yüksək etimada görə Prezident İlham Əliyevə dərin minnətdarlıqlarını ifadə ediblər.

Tədbir dövlət himninin ifası ilə başa çatıb.

Bu il Azərbaycan Respublikasının vətəndaşlığına daha 111 nəfər qəbul, 2 nəfər isə bərpa olunub.

Azərbaycan. - 2014.- 23 noyabr.- S.5.