“Bakı-2015” ilk Avropa Oyunları dünyada mötəbər idman
tədbirlərinin keçirilməsi üçün
mühüm nümunə olacaq
Gələn
il Azərbaycanın ilk Avropa Oyunlarına ev sahibliyi etməsi
mühüm hadisədir. Azərbaycanda mövcud
olan və yaradılan idman
infrastrukturu yarışların yüksək
səviyyədə keçirilməsinə imkan
verəcək. Birinci Avropa
Oyunları özündən sonrakı tədbirlərin
keçirilməsi üçün mühüm nümunə olacaq.
AzərTAc
xəbər verir ki, bu sözləri Avropa Olimpiya Komitəsinin
(AOK) prezidenti Patrik Hikki noyabrın 22-də AOK-un 43-cü
Baş Assambleyasının yekunları ilə bağlı
keçirilən mətbuat konfransında deyib.
Baş Assambleyada
səmərəli müzakirələrin
aparıldığını bildirən Patrik
Hikki tədbir çərçivəsində
“Bakı-2015” ilk Avropa
Oyunları ilə bağlı müfəssəl təqdimatın
keçirildiyini xüsusi
vurğulayıb. O, adətən Oyunların keçirilməsi
üçün 7 ilə yaxın müddətin
nəzərdə tutulduğunu, lakin “Bakı-2015”ə hazırlığa iki il yarım vaxt ayrılmasına baxmayaraq,
mühüm işlərin görüldüyünü
qeyd edib.
Patrik Hikki deyib: “İlk Avropa Oyunları idman tarixində silinməz izlər qoyacaq. Çoxlu sayda könüllünün
olması, London Olimpiadasından peşəkar
əməkdaşların cəlb edilməsi bir
daha göstərir ki,
Azərbaycanın istənilən idman tədbirini
yüksək səviyyədə keçirməkdə zəngin
təcrübəsi var. “Bakı-2015” ilk Avropa Oyunları dünya miqyasında mötəbər idman tədbiri olacaq. Avropa
Oyunları beynəlxalq miqyasda artıq
kifayət qədər imic qazanıb.
İdmanın 20 növünün
Oyunların proqramına salınması gözləntilərimizi
aşdı. Avropa idmançıları Oyunlarda iştirak üçün kifayət qədər istək
və arzularını bildiriblər. Onlar
da möhtəşəm idman
oyunlarını səbirsizliklə gözləyirlər”.
“Bakı–2015” ilk
Avropa Oyunlarının dünyada
artıq idman ölkəsi kimi
tanınan Azərbaycanın bu sahədə
nüfuzunu daha da artıracağını söyləyən
Patrik Hikki maliyyə və
texniki məsələlərlə
bağlı işlərin də yüksək səviyyədə
həyata keçirildiyini diqqətə
çatdırıb.
AOK-un
prezidenti Patrik Hikki verdiyi dəstəyə görə Azərbaycan
Hökumətinə təşəkkür edib, indiyədək
görülən işlərin ilk Avropa Oyunlarının
yüksək səviyyədə keçirilməsinə imkan
yaradacağını bildirib.
Milli Olimpiya
Komitəsinin (MOK) vitse-prezidenti Çingiz Hüseynzadə Azərbaycanda
mötəbər idman tədbirlərinin
keçirilməsi üçün mühüm təcrübənin
qazanıldığını diqqətə
çatdırıb. O, MOK-un Avropanın bütün Milli Olimpiya komitələrinə nümunəvi
xidmətin göstərilməsi, onların ilk
Avropa Oyunlarından ən xoş
təəssüratla ayrılmaları məqsədilə
çoxsaylı tədbirlər həyata keçirəcəyini
söyləyib.
Azərbaycan. - 2014.- 23 noyabr.- S. 6.