Azərbaycan ilə Vyetnam arasında əlaqələrin hüquqi sahədə

inkişaf etdirilməsi müzakirə olunub

Azərbaycanda səfərdə olan Vyetnam Milli Assambleyasının hüquq komitəsinin üzvləri ilə oktyabrın 10-da Ədliyyə Nazirliyində görüş keçirilib.

Ədliyyə Nazirliyinin mətbuat xidmətindən AzərTAc-a bildiriblər ki, görüşdə Azərbaycan və Vyetnam arasında mövcud dostluq əlaqələrinin səviyyəsindən məmnunluq ifadə edilib. Azərbaycan Prezidenti İlham Əliyevin Vyetnama səfərinin ikitərəfli münasibətlərin inkişafına güclü təkan verdiyi xüsusi vurğulanaraq bu əlaqələrin daha da genişləndirilməsi üçün yaxşı perspektivlərin olduğu bildirilib.

Nazir müavini Toğrul Musayev dövlətimizin başçısının rəhbərliyi ilə ölkəmizdə aparılan köklü məhkəmə-hüquq islahatları, o cümlədən ədliyyə sisteminin inkişafı, qanunyaradıcı fəaliyyətdə nazirliyin funksiyaları barədə qonaqlara məlumat verib. O, hüquqi sahədə əməkdaşlığın və təcrübə mübadiləsinin əhəmiyyətini qeyd edib.

Ölkələrimiz arasında tarixi köklərə bağlı əlaqələrin genişləndirilməsinə böyük önəm verdiklərini bildirən qonaqlar vyetnamlı yüksək ixtisaslı mütəxəssislərin hazırlanmasında Azərbaycanın töhfəsini xüsusi vurğulayıblar. Vaxtilə Bakıda ali hüquq təhsili alan Vyetnam Milli Assambleyasının komitə sədri Fan Trunq Li səfər zamanı Azərbaycanın hərtərəfli dinamik tərəqqisindən, əldə etdiyi nailiyyətlərdən heyran qaldığını bildirib, xalqımızın yüksək və səmimi qonaqpərvərliyinin dəyişməz olduğunu diqqətə çatdırıb.

Söhbət zamanı ədliyyə fəaliyyəti ilə bağlı faydalı fikir mübadiləsi aparılıb, maraq doğuran suallara aydınlıq gətirilib.

Sonra qonaqlar nazirlikdə Ədliyyə tarixi muzeyi ilə tanış olublar.

Azərbaycan.-2014.- 11 oktyabr.- S.3.