Fransadakı Azərbaycan diasporunun ən yaşlı nümayəndəsinin xatirəsi ehtiramla anılıb

Oktyabrın 10-da Parisdəki Azərbaycan Mədəniyyət Mərkəzində Fransadakı Azərbaycan diasporasının fəal üzvlərindən biri, sentyabr ayında 97 yaşında dünyasını dəyişən Qədir Süleymanovun xatirəsi anılıb.

Azərbaycanın Fransadakı səfiri Elçin Əmirbəyov mərasimdə çıxış edərək deyib ki, Qədir Süleymanov ömrünün çox hissəsini Vətəndən uzaqda yaşamasına baxmayaraq Azərbaycanı və xalqını sevən həssas qəlbli bir insan olub. Ölkəmizdə baş verən hadisələrə daima maraq göstərib, dövlətimizin tərəqqisinə daima sevinib. Q.Süleymanovun əziz xatirəsi onu tanıyanların qəlbində daima yaşayacaq.

Mərhumun oğlu Boris Süleymanov atasının xatirəsinin əziz tutulduğu üçün Azərbaycan dövlətinə və səfirliyə minnətdarlıq edib, atasının Vətənə məhəbbətindən söz açıb.

Mərasimdə səfirliyin və Azərbaycanın UNESCO yanındakı daimi nümayəndəliyinin əməkdaşları, diasporamızın təmsilçiləri iştirak ediblər.

Əsgər Əliyev

AzərTAc-ın xüsusi müxbiri

Paris

Azərbaycan. - 2014.- 12 oktyabr.- S. 7.