“Avropa irs günləri” müxtəlif mədəniyyətə

malik insanları bir araya toplayır

Oktyabrın 13-də Azərbaycanın Avropa Şurasının Nazirlər Komitəsinə sədrliyi çərçivəsində “Avropa irs günləri”nə həsr olunan mətbuat konfransı keçirilib.

Azərbaycan Respublikasının Mədəniyyət və Turizm Nazirliyinin və Avropa Şurasının demokratik idarəçilik direktorluğunun nümayəndələrinin iştirakı ilə baş tutan konfransda ötən illərdə Azərbaycanda “Avropa irs günləri”nin qeyd olunmasına həsr olunmuş qısa film nümayiş olunub.

Sonra milli əlaqələndiricilər – Azərbaycan üzrə Emil Səfərov, Avropa Şurasından Madelena Qrossman, Şimali İrlandiyadan Mixail Koulter, İrlandiyadan İzabel Smiz, İspaniyadan Ana Şobel, Şotlandiyadan Lesli Makevan “Avropa irs günləri”nin əhəmiyyətindən, eləcə də təmsil etdikləri ölkələrin müvafiq sahə üzrə əldə etdikləri təcrübədən söz açıblar.

Bildirilib ki, hazırda 50 ölkənin nümayəndəsi Azərbaycana toplaşıb. Bu çox möhtəşəm imkandır ki, proqramı birgə icra edirik.

Bakıda keçiriləcək tədbirlər çərçivəsində müvafiq sahələr üzrə əməkdaşlığın qurulmasına dair müzakirələr aparılacaq.

Mətbuat konfransında “Avropa irs günləri portalı”nın təqdimatı olub.

Qeyd olunub ki, “Avropa irs günləri” Avropa vətəndaşları arasında əməkdaşlıq çərçivəsində kütləvi qeyd olunan mədəni təşəbbüslərdən biridir. 1985-ci ildə Avropa Şurası tərəfindən irəli sürülmüş bu təşəbbüsə 1999-cu ildə Avropa İttifaqı Komissiyası da qoşulub. Hər iki qurum indiyədək bu proqramı birgə davam etdirir. Hər il sözügedən layihə Avropanın 50 ölkəsində keçirilir və müəyyən olunmuş günlərdə ziyarətçilər üçün minlərlə abidələrə və tarixi yerlərə ödənişsiz giriş təmin edilir. Bu təcrübə ilə Avropa vətəndaşları yalnız mədəni irsin zənginliyindən zövq almır, eyni zamanda indiki və gələcək nəsil üçün onların qorunmasına və vəziyyətinin yaxşılaşdırılması işlərinə fəal şəkildə cəlb olunur. Hər il təxminən 20 milyona yaxın insan bu təşəbbüsdən yararlanır.

Azərbaycan.-2014.- 14 oktyabr.- S.7.