Bakıda Ümumhəmkarlar İttifaqları Konfederasiyası

İcraiyyə Komitəsinin növbəti iclası keçirilib

Oktyabrın 22-də Bakıda Ümumhəmkarlar İttifaqları Konfederasiyası İcraiyyə Komitəsinin növbəti iclası keçirilib.

AzərTAc xəbər verir ki, Konfederasiyanın prezidenti, Beynəlxalq Həmkarlar İttifaqları Konfederasiyasının vitse-prezidenti Mixail Şmakov iclasda çıxış edərək bildirdi ki, MDB ölkələrinin 10 milli həmkarlar ittifaqı mərkəzi və 30 beynəlxalq həmkarlar ittifaqı birliyi Ümumhəmkarlar İttifaqları Konfederasiyasının ətrafında birləşib. Azərbaycan Həmkarlar İttifaqları Konfederasiyası 2001-ci ildən bu təşkilatın üzvüdür və hazırda onun bütün rəhbər orqanlarında təmsil olunur.

M.Şmakov dedi ki, Azərbaycanda gedən ümumi inkişaf prosesləri ölkədə həmkarlar ittifaqlarının da inkişafına imkan yaradır. O, bugünkü iclasın təcrübə mübadiləsinin aparılması, həmkarlar ittifaqlarının inkişaf perspektivlərinin müzakirəsi baxımından önəmini qeyd etdi.

M.Şmakov bildirdi ki, Azərbaycan dövləti gündən-günə inkişaf edir. İqtisadi inkişaf sürətinə görə Azərbaycan MDB-də liderdir. Ölkədə ümumi daxili məhsul istehsalının həcmi, adambaşına düşən gəlirlərin məbləği artıb. Bu artım davam edir. Təbii ki, bütün bunlar insanların sosial vəziyyətinin, həyat şəraitinin yaxşılaşmasına xidmət edir. Azərbaycanda həmkarlar ittifaqları da mütəşəkkildir. İcraiyyə Komitəsinin növbəti iclasının Bakıda keçirilməsi isə dostluğumuzun, əməkdaşlığımızın inkişafının bariz nümunəsidir.

Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Mehbalıyev çıxışında ölkəmizdə həmkarlar ittifaqlarının formalaşması və inkişafı məsələlərindən danışdı. Həmkarlar ittifaqlarının əlaqələrinin möhkəmlənməsində Ümumhəmkarlar İttifaqları Konfederasiyasının rolunu yüksək qiymətləndirən S.Mehbalıyev dedi ki, AHİK ilə bu təşkilata üzv olan digər birliklər arasında əlaqələr yüksək səviyyədədir. O, qarşılıqlı təcrübə, fikir mübadilələrinin əhəmiyyətli olduğunu vurğuladı.

S.Mehbalıyev qeyd etdi ki, Azərbaycan həmkarlar ittifaqları vətəndaş cəmiyyətinin fəal üzvü olmaqla ölkə həyatının bütün həlledici istiqamətlərinin formalaşmasında iştirak edirlər. Bu gün AHİK öz sıralarında 1 milyon 600 mindən artıq həmkarlar ittifaqı üzvünü, 27 sahə həmkarlar ittifaqı mərkəzini, 504 şəhər və rayon komitəsini, 68 birləşmiş həmkarlar ittifaqını, 10730 ilk təşkilatı birləşdirir. Konfederasiyanın tərkibində 3 həmkarlar ittifaqı federasiyası, Naxçıvan Vilayət Həmkarlar İttifaqı Şurası fəaliyyət göstərir. AHİK Əmək və Əhalinin Sosial Müdafiəsi, Maliyyə, Təhsil, Gənclər və İdman nazirlikləri, Dövlət Sosial Müdafiə Fondu, Qaçqınların və Məcburi Köçkünlərin İşləri Üzrə Dövlət Komitəsi, müharibə veteranları təşkilatı və digər qurumlarla konstruktiv şəkildə əməkdaşlıq edir.

S.Mehbalıyev əmin olduğunu bildirdi ki, Ümumhəmkarlar İttifaqları Konfederasiyası İcraiyyə Komitəsinin iclasının Bakıda keçirilməsi əlaqələrin daha da genişlənməsində və möhkəmlənməsində, müştərək problemlərin həllində mühüm rol oynayacaq.

Sonra iclas iştirakçıları gündəlikdə duran məsələləri müzakirə etdilər. Ümumhəmkarlar İttifaqları Konfederasiyasının üzv təşkilatlarının minimum əməkhaqlarının artırılması və yaşayış minimumundan aşağı olmayan səviyyəyə çatdırılması istiqamətində həmkarlar ittifaqlarının fəaliyyəti, azad ticarət xidmətləri barədə razılaşmalara həmkarlar ittifaqlarının mövqeyi, MDB iştirakçısı olan dövlətlərdə əməyin mühafizəsinin vəziyyəti, Ümumdünya Layiqli Əmək Gününün keçirilməsində Ümumhəmkarlar İttifaqları Konfederasiyasına üzv təşkilatların iştirakı, Konfederasiyanın üzv təşkilatlarının gənclərlə iş təcrübəsi, üzv təşkilatların üzvlük haqlarını ödəməsi qaydaları və s. məsələlərə baxıldı. Həmçinin Ümumhəmkarlar İttifaqları Konfederasiyasının 2015-ci il üçün gəlir və xərclər smetası müəyyən edildi.

Azərbaycan.-2014.- 23 oktyabr.- S.5.