Azərbaycan ilə Litvanın kənd təsərrüfatı sahəsində birgə tvinninq layihələri həyata keçirməsi təklif olunur

Azərbaycan və Litva kənd təsərrüfatı sahəsində birgə tvinninq layihələri və kadr hazırlığı həyata keçirə bilərlər.

Bu təklif Litvanın kənd təsərrüfatı nazirinin müavini Vilius Martuseviğiusun rəhbərlik etdiyi nümayəndə heyəti ilə Azərbaycan Kənd Təsərrüfatı Nazirliyində keçirilən görüşdə səslənib.

Nazirliyin mətbuat xidmətindən AzərTAc-a bildiriblər ki, görüşdə iki ölkə arasında kənd təsərrüfatı sahəsində əməkdaşlığın perspektivləri müzakirə edilib. Azərbaycan kənd təsərrüfatı nazirinin müavini İlham Quliyev aqrar sahədə əldə olunan nailiyyətlər, dövlətin bu sahəyə göstərdiyi diqqət və qayğıdan danışıb. Diqqətə çatdırılıb ki, Azərbaycan ilə Litva arasında iqtisadiyyatın digər sahələri ilə yanaşı, aqrar sahədə də əməkdaşlıq əlaqələri dinamik inkişaf edir.

Litvanın kənd təsərrüfatı nazirinin müavini Vilius Martuseviğius kənd təsərrüfatı sahəsində əməkdaşlığın daha da genişlənməsinin vacibliyini vurğulayıb.

AzərTac

Azərbaycan. - 2014.- 25 oktyabr.- S.3.