Torpaq altında yatan qədim
tarix
Salyan 2800 il
Kim bilir,
dünyanın neçə neçədir yaşı,
Tarixin nə qədər yazısı vardır.
Hər
saxsı parçası, hər məzar daşı
Nəsildən nəsilə bir yadigardır.
Səməd
VURĞUN
İnsanlar ta qədimdən suya olan tələbatlarını
ödəmək üçün çayların, su olan yerlərin
kənarında məskən salmışlar. Salyan şəhəri
də bu baxımdan istisna deyil. Min illər
boyu Kür çayının hər iki sahilində yaşayan
əhali əkinlərini, saxladıqları mal-qaranı da buradan
axıb gedən su ilə becərmişlər. Beləcə insanlar nəsil-nəsil doğulub,
yaşayıb, köç edib bu yerdən. Dəli
Kür adını qazanan çayın da zaman-zaman yerli əhaliyə
xeyri ilə bərabər, az da ziyan
vurmayıb. Min bir əziyyətlə çiy kərpicdən
tikilən evləri, əkinləri, mal-qaranı, bəzən
insanların özünü belə cənginə alıb.
Elə buna görə müdrik babalarımız əzizlərini
dəfn etmək üçün qəbiristanlıq yerini daha
hündür, su basa bilməyən ərazidə seçməli
olublar. Babazanlı dağları Salyan şəhərindən,
Kür çayının sahilindən təxminən iki min
metr kənarda yerləşir.
2011-ci ilin yayında Ələt-Astara yeni magistral şose
yolunu çəkənlər Babazanlı karxanasından torpaq
götürərkən küp qəbirlərini gördülər. Yol çəkənlər
bu barədə yubanmadan Salyan Rayon İcra Hakimiyyətinə məlumat
verdilər. İcra başçısı
Tahir Kərimov elə həmin gün Salyanın bir neçə
ağsaqqalı və ziyalısı ilə birlikdə orada
oldu və məsələ ilə əlaqədar Azərbaycan
Milli Elmlər Akademiyasının Arxeologiya və Etnoqrafiya
İnstitutunun əməkdaşlarını əraziyə dəvət
etdi. İnstitutun ekspedisiya qrupu buraya gələrək
axtarış və tədqiqat işlərinə
başladı. Araşdırmalar nəticəsində
küp qəbirlərin 2800 il bundan əvvəlki
dövrə aid olduğunu müəyyənləşdirdilər.
2011-ci
ilin dekabr və 2012-ci ilin oktyabr aylarında Salyan Rayon İcra
Hakimiyyətinin təklifi, AMEA-nın, habelə respublika Mədəniyyət
və Turizm Nazirliyinin təşkilati dəstəyi ilə
"Salyanın arxeoloji və memarlıq irsi", "Salyan
2800 il" mövzularında elmi-praktik konfranslar keçirildi.
2012-ci ilin oktyabrındakı konfrans mahiyyət
etibarilə beynəlxalq əhəmiyyət kəsb etdiyindən
burada bir çox ölkələrin tanınmış alimləri
və arxeoloqları da iştirak edirdilər.
Tariximizin,
mədəniyyətimizin, milli-mənəvi dəyərlərimizin
uzaq, yaxın keçmişinə, indisinə və gələcəyinə
böyük qayğı və həssaslıqla yanaşan
möhtərəm Prezident İlham Əliyev 29 oktyabr
2013-cü il tarixdə "Muğan-Babazanlı abidələrinin
2800 illiyinin qeyd edilməsi haqqında" sərəncam
imzalamışdır. Sərəncamda qeyd olunur
ki, indiyədək aparılan çoxsaylı tədqiqatlar və
üzə çıxarılan müxtəlif maddi mədəniyyət
nümunələri Azərbaycanın bir daha zəngin və
böyük tarixi keçmişə malik ölkə
olduğunu sübut edir. Ulu əcdadların ən qədim
zamanlardan etibarən bu yerlərdə məskunlaşdıqlarını
Salyan rayonunda Muğan arxeoloji mədəniyyətinin mərkəzi
kimi tanınmış Babazanlı ərazisində son vaxtlar
qazıntılarda 2800 il bundan əvvəlki dövrə aid
yaşayış məskəninin aşkarlanması bir daha təsdiqlədi.
Ölkə başçısının bu sərəncamı
hər bir salyanlının qəlbində sonsuz sevinc hissi
doğurdu. Tarixi hadisənin növbəti 2014-cü ilin oktyabr
ayının 24-də daha geniş şəkildə qeyd edilməsi
qərara alındı. Bu məqsədlə
Salyan şəhərində aparılan tikinti-quruculuq,
abadlıq işləri daha da sürətləndirildi, digər
tədbirlər həyata keçirildi. Həmin
vaxt gəlib çatdı. Bayram tədbirinə
bir neçə gün qalmış şəhər tarixi
günə aid şüarlar, transparantlar, nəfis şəkildə
hazırlanmış loqolar, dövlət bayrağı və
güllər-çiçəklərlə bəzədildi.
Nəhayət,
24 oktyabr günü... Yatağından qalxan
günəş çox çəkmir öz zərrin
şüalarını ətrafa səpələyir. Bir neçə gün öncə şimal küləyinin
qovub bu yerlərə gətirdiyi yağışlı, soyuq
havadan əsər-əlamət yoxdur. İlıq
payız havası əlamətdar günə yeni ovqat qataraq tədbir
iştirakçılarında xoş əhval-ruhiyyə
yaradır.
Tədbirə dəvət olunanlar şəhərin
başlanğıcındakı Dövlət Bayrağı
meydanında qarşılandılar. Onların
sırasında Milli Məclisin deputatları, komitə sədrləri,
Milli Elmlər Akademiyasının alimləri, xarici ölkələrin
Azərbaycandakı səlahiyyətli səfirləri və digər
nüfuzlu qonaqlar var idi. Qarşılanma mərasimindən
sonra qonaqlar və Salyan rayon ictimaiyyətinin nümayəndələri
şəhərin mərkəzindəki Heydər Əliyev
parkına gələrək ümummilli liderin möhtəşəm
abidəsi önünə gül dəstələri
düzdülər.
Əsl bayram təntənəsinə çevrilən tədbir
sonra Salyanda doğulan, Azərbaycanın, eləcə də
bütün türk dünyasının əvəzsiz
simalarından biri olan şair, jurnalist, rəssam, filosof,
dilçi Əlibəy Hüseynzadənin heykəlinin
qarşısındakı meydanda davam etdirildi. Qurulan
kompozisiya meydana qədimlik, alınmazlıq simvolundan qala
görkəmi vermişdi. Ümummilli
liderin və Prezident İlham Əliyevin birlikdə çəkilmiş
şəklini özündə əks etdirən və
meydanın üzərində səmada dayanan nəhəng hava
şarı tədbirə yeni rəng qatmışdı.
Qəlbi yurd sevgisi ilə vuran
salyanlıların hamısı, demək olar ki, burada idi.
Onların içərisində ziyalı da vardı,
sıravi vətəndaş, gənc və yaşlı
insanlar, məktəbli də. Meydanda qələbəlik
idi. Tədbirə gələnlər burada
ilk olaraq Salyanın tarixinə, təbiətinə, mədəniyyətinə,
bu gününə aid olan maddi mədəniyyət nümunələrinə
baxdılar, rayon mətbəxi üçün səciyyəvi
olan təamlardan daddılar. Fəxri
qonaqlar qurulmuş kürsüyə qalxdılar. Dəvə
karvanı, atlı çaparlar,
idmançılar, ayrı-ayrı idarə, müəssisə
kollektivləri bir-birinin ardınca gəlib keçdilər. Rayonun, habelə respublikamızın bir neçə
regionundan gəlmiş folklor və bədii özfəaliyyət
kollektivləri öz bacarıq və məharətlərini
nümayiş etdirdilər. Salyanın "Cəngi",
Naxçıvanın "Şərur", Masallının
"Halay", Lənkəranın "Nənələr",
İsmayıllı rayonu İvanovka kəndinin
"Slavyanoçka", Lerikin "Uzun ömürlülər-rəfti"
folklor kollektivlərinin çıxışları
tamaşaçılar tərəfindən rəğbətlə
qarşılandı.
Qonaqlara yaxınlaşıb təəssüratlarını
öyrəndik.
Ziyad Səmədzadə,
Milli Məclisin İqtisadi siyasət komitəsinin sədri,
akademik:
- Belə
bir tədbirdə iştirak etməyimdən çox məmnunam.
Hər şey yüksək səviyyədə təşkil
olunub. Salyan Azərbaycanın qədim
yaşayış məskənlərindən biridir. Bu torpaq böyük şəxsiyyətlər yetirib.
Mənə elə gəlir, bu gün
bütün salyanlılar sevinir, öz ata-baba
yurdlarının 2800 illiyini qeyd edirlər. Əslinə qalsa, dünya üçün bu tarixin
özü o qədər də böyük deyil. Çünki yaşadığımız planetin
yaşını doğru-düzgün bilən yoxdur. Amma burada insan yaşayışının,
svilizasiyasının tarixini dəqiqləşdirmək
böyük işdir. Bu baxımdan 2800 il
az tarix də deyil.
Əjdər
Ağayev, pedaqoji elmlər doktoru, professor, respublika Təhsil
Şurasının sədri:
- Mən
özüm Neftçala rayonunun Qırmızıkənd kəndində
doğulub boya-başa çatmışam, orta təhsilimi isə
Salyanda başa vurmuşam. Bu gün burada
nümayiş etdirilən maddi mədəniyyət nümunələri,
adət-ənənələr məni keçmiş illərə
qanadlandırdı. Salyanın 2800 yaşı bir də
onu təsdiqləyir ki, Zərdüşt eramızdan əvvəl
6-5-ci əsrlərdə "Avesta"nı
Muğanda yazıb. Mən Salyan Rayon İcra
Hakimiyyətinin başçısı Tahir Kərimova bu
mühüm məsələyə ciddi
yanaşdığına görə dərin təşəkkürümü
bildirirəm. Tədbirin keçirilməsi
isə təşkilatçılığın əsl
nümunəsidir. Bayram münasibətilə
bütün salyanlıları ürəkdən təbrik edirəm.
İsa Həbibbəyli,
Azərbaycan Milli Elmlər Akademiyasının vitse-prezidenti,
Milli Məclisin deputatı:
- Salyanın tarixinin müəyyənləşdirilməsində akademiyanın alimlərinin əməyi çoxdur. Onlar burada gərgin və səmərəli iş apararaq küp qəbirlərinin 2800 il bundan əvvəlki dövrə aid olduğunu öyrənmişlər. Burada rayon icra hakimiyyəti rəhbərinin də əməyini qiymətləndirmək lazımdır. Salyan son illər çox dəyişib, abadlaşıb. Bunlar ölkə rəhbərinin regionlara göstərdiyi diqqət və qayğının bariz nümunəsidir. Azərbaycan Prezidentinin Muğan-Babazanlı abidələrinin 2800 illiyi ilə əlaqədar imzaladığı sərəncam keçmişimizi öyrənmək, ona hörmətlə yanaşmaq baxımından çox əhəmiyyətlidir. Keçmişimizi, tariximizi təbliğ etmək, gənc nəslə aşılamaq indi dövlətin başlıca prioritetlərindəndir. Keçmişsiz bu günümüz olmadığı kimi, bu günsüz də gələcəyimiz ola bilməz.
Nikolay
Paskeviç, Belarus
Respublikasının Azərbaycandakı səfiri:
- Gözəl
tədbir keçirilir. Böyük layihələrin
Bakı şəhərində keçirilməsi adi hal
almışdır. Biz bunların canlı
şahidləriyik. Amma görməsəydim,
inana bilməzdim ki, əyalət rayonunda belə yüksək
səviyyədə təşkil olunmuş tədbir
keçirilsin. Təəssüratlarım
yüksəkdir. Bakıya qayıdan kimi
gördüklərimi səfirliyimizin əməkdaşlarına
danışacağam. Sözün əsl mənasında
Salyan şəhəri haqqında çox şey öyrəndik.
Adət-ənənələriniz, folklorunuz,
musiqiniz, mətbəxiniz məni valeh etdi. 2800 il yaşı olan bir yerin belə mədəniyyəti
də olmalıdır. Mən öz adımdan, səfirliyimizin
bütün kollektivi adından bayramınız mübarək
olsun - deyirəm.
Bayram tədbirinin növbəti hissəsi Heydər Əliyev parkında respublikamızın tanınmış müğənnilərinin və rayon mədəniyyət evinin bədii özfəaliyyət kollektivinin iştirakı ilə təşkil olunmuş konsertlə davam etdirildi. Müğənnilərin ifa etdikləri şən mahnılar pərdə-pərdə ətrafa yayıldı. 2800 illik tarixə malik Salyan şəhərinin yubileyi. Tədbir bayram atəşfəşanlığı ilə sona çatdı.
Seyran CAVADOV,
Azərbaycan.-2014.- 26 oktyabr.- S.7.