Tələbə Qəbulu üzrə Dövlət Komitəsinin sədri Ağsuda vətəndaşları qəbul edib

Azərbaycan Respublikasının Prezidenti İlham Əliyevin tapşırıq və tövsiyələrinə müvafiq olaraq mərkəzi icra hakimiyyəti orqanlarının rəhbərləri bölgələrdə vətəndaşların qəbulunu davam etdirir, onların müraciətlərinin, ərizə və şikayətlərinin qanunauyğun, operativ həlli üçün konkret tədbirlər görürlər.

AzərTAc xəbər verir ki, mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq Tələbə Qəbulu üzrə Dövlət Komitəsinin (TQDK) sədri Məleykə Abbaszadə oktyabrın 24-də Ağsu şəhərində Göyçay, Kürdəmir, Ağsu və Ucar rayonlarından olan vətəndaşları qəbul edib.

TQDK sədri qəbuldan əvvəl Ulu Öndər Heydər Əliyevin Ağsu şəhərinin mərkəzində ucaldılmış abidəsi önünə gül-çiçək dəstəsi qoyaraq əziz xatirəsinə dərin ehtiramını bildirib.

Ağsu Rayon Uşaq-Gənclər Bədii Yaradıcılıq Mərkəzində keçirilən qəbulda müraciətlər əsasən ali və orta ixtisas məktəblərinə, ali təhsilin bakalavr və magistratura pillələrinə qəbul, hərbi çağırışla əlaqədar möhlət, xüsusi qabiliyyət tələb edən ixtisaslara qəbul, xarici ölkələrdə təhsil imkanları və s. barədə olub.

TQDK-nın sədri M. Abbaszadə hər bir vətəndaşı diqqətlə dinləyib. Bəzi müraciətlər yerindəcə öz həllini tapıb, bir qismi barədə vətəndaşlara ətraflı izahat və məsləhətlər verilib. Komitənin səlahiyyətlərinə aid olmayan məsələlərlə bağlı müraciətlər isə aidiyyəti qurumlara çatdırılmaq üçün qeydiyyata alınıb.

Azərbaycan. - 2014.- 25 oktyabr.- S.5.