Azərbaycanın sığorta-pensiya sistemi ən müasir standartlara cavab verir

Azərbaycanda həyata keçirilən sosial-iqtisadi siyasətin strateji istiqamətlərindən biri də sığorta-pensiya sisteminin qabaqcıl beynəlxalq təcrübə əsasında və müasir standartlara uyğun yenidən qurulmasıdır. Bu istiqamətdə həyata keçirilən islahatların, Prezident İlham Əliyevin bu sahəyə daimi diqqəti və vaxtında qəbul etdiyi qərarların nəticəsində ölkəmizdə vahid prinsiplər əsasında fəaliyyət göstərən, bütün işləyən əhalini əhatə edən, müasir çağırışlara çevik reaksiya verən sığorta-pensiya sistemi formalaşıb.

Uğurla tətbiq olunan yeni sığorta-pensiya sistemi pensiyaların artırılması mexanizminin bazar iqtisadiyyatının tələblərinə uyğun şəkildə həyata keçirilməsinə, mövcud maliyyə imkanlarının bütün pensiyaçılar arasında ədalətli bölgüsünə imkan yaradır. Hazırda bu sahədə Azərbaycan Respublikası Prezidentinin 2008-ci il 30 dekabr tarixli sərəncamı ilə təsdiq edilmiş "2009-2015-ci illərdə Azərbaycan Respublikasında sığorta-pensiya sisteminin inkişafına dair" Dövlət Proqramı icra olunur. Proqrama əsasən, qarşıya qoyulan vəzifələr sığorta-pensiya sisteminin fəaliyyətində sığorta prinsiplərinin gücləndirilməsi, vətəndaşların 2006-cı il yanvarın 1-dən əvvəlki dövrdə qazanılmış pensiya hüquqlarının yeni əmək pensiyaları sisteminə daha sıx inteqrasiyasının təmin edilməsi, məcburi dövlət sosial sığortasının təkmilləşdirilməsi və konüllü pensiya sığortasının inkişaf etdirilməsi, əmək pensiyalarının yığım komponentinin fəallaşdırılması, bütövlükdə sığorta-pensiya sisteminin cari ödəmə qabiliyyətinin, habelə orta və uzunmüddətli maliyyə dayanıqlığının təmin edilməsi, bu istiqamətdə müasir informasiya-kommunikasiya texnologiyalarının geniş tətbiqinə nail olunması, idarəetmənin tam avtomatlaşdırılması, fərdi uçot sisteminin əhatəli inkişafının təmin olunmasıdır.

Ötən illərin statistikası, o cümlədən DSMF-nın Füzuli rayon şöbəsinin timsalında vətəndaşlara xidmət sahəsində baş verən yeniliklər qarşıya qoyulan vəzifələrin uğurla icra olunduğunu, sığora-pensiya sistemində həyata keçirilən islahatların bəhrə verdiyini göstərir. Qısa müddətdə rayonda şöbə tərəfindən pensiyaçılara və sığortaolunanlara göstərilən xidmət səviyyəsinin artırılması istiqamətində mühüm tədbirlər həyata keçirilib.

DSMF Füzuli rayon şöbəsinin müdiri Zəfər Hətəmov bildirdi ki, şöbə tərəfindən hazırda 10 min 458 nəfər pensiyaçıya xidmət göstərilir. Bunlardan 6156 nəfəri yaşa görə, 3779 nəfər əlilliyə görə, 523 nəfər ailə başçısını itirməyə görə pensiya alır. Pensiyaçılara edilən xidmətin daha da yüksək keyfiyyətlə təmin olunması məqsədilə şöbə əməkdaşları tərəfindən lazımi qayğı və diqqət göstərilməklə, onların şöbəyə etdiyi bütün müraciətləri vaxtında araşdırılır, sorğuları ətraflı cavablandırılır və qaldırdıqları problemlər mövcud qanunvericilik çərçivəsində həll olunur.

Şöbə müdiri sosial sığorta haqlarının yığımı barədə də məlumat verdi. Qeyd etdi ki, DSMF Füzuli rayon şöbəsi 2014-cü il üzrə məcburi dövlət sosial sığorta haqlarının toplanmasının proqnoz tapşırığının icrasını təmin etmək məqsədilə müvafiq tədbirlər həyata keçirib. Belə ki, bu ilin 9 ayı ərzində qeyri-büdcə təşkilatları üzrə proqnoz tapşırıqlarının icrası, eyni zamanda, rayon ərazisindəki torpaq mülkiyyətçilərinin məcburi dövlət sosial sığorta haqqının ödənilməsinə cəlb edilməsi sahəsində işlər müvəffəqiyyətlə yekunlaşıb. Sosial sığorta haqlarını vaxtında ödəməyən hüquqi və fiziki şəxslərə qarşı mövcud qanunvericiliyə uyğun olaraq müvafiq sanksiyalar tətbiq olunub. Həmçinin "Elektron hökumət" portalının tətdbiqi ilə əlaqədar sığortaedənlər tərəfindən müvafiq hesabatlar hazırda elektron qaydada təqdim edilir. Bununla əlaqədar şöbədə sığortaedənlərin sosial sığorta haqları üzrə hesabatlarının elektron qaydada təqdim olunması üçün xidmət masası yaradılıb.

DSMF Füzuli rayon şöbəsi tərəfindən fərdi uçotun təşkili və tətbiqinə hazırlıqla bağlı da müəyyən işlər aparılır, sığortaolunanlara sosial sığorta yığımları ilə vətəndaşlara təyin olunacaq pensiya məbləği arasında əlaqə barədə, eləcə də "Sosial sığorta haqqında" Azərbaycan Respublikası Qanununun mahiyyəti haqqında geniş məlumat verilir.

Füzuli Rayon İcra Hakimiyyəti tərəfindən mütəmadi olaraq rayon əhalisinin mövcud problemlərini yerindəcə öyrənib lazımi tədbirlər görülməsi məqsədilə rayonun ayrı-ayrı yaşayış məntəqələrində keçirilən səyyar qəbullarda DSMF-nın yerli şöbəsinin əməkdaşları da iştirak edirlər. Belə qəbullarda pensiyaçılar tərəfindən olunan müraciətlərə dərhal baxılır və qanunvericilik çərçivəsində operativ həll olunur.

Ölkəmizdə pensiyaçılara göstərilən diqqət və qayğıdan, həmçinin DSMF Füzuli rayon şöbəsinin fəaliyyətindən pensiyaçılar razılıqlarını bildirdilər. Füzuli sakinləri olan 66 yaşlı Tanrıverdi Əliyev, 73 yaşlı Əliş Həsənov, 74 yaşlı Məqsəd Əliyev və 70 yaşlı Tehran Hacıyev bildirdilər ki, bir neçə il əvvəl 2006-cı ilədək olan əmək stajlarının yenidən hesablanması onların da pensiyalarının artımına əhəmiyyətli dərəcədə təsir göstərib. DSMF Füzuli rayon şöbəsində isə pensiyaçıların hər müraciətinə diqqətlə yanaşılır.

Zəfər Hətəmov qeyd etdi ki, sakinlərin sosial müdafiəsinin gücləndirilməsi və sığorta-pensiya sisteminin qurulması tədbirlərinin icrası istiqamətində DSMF tərəfindən verilən tapşırıqları yerinə yetirmək, pensiyaçılara yüksək səviyyəli xidmət göstərmək üçün səylərini bundan sonra da layiqincə səfərbər edəcəklər.

Lazım QULİYEV

Azərbaycan. - 2014.- 29 oktyabr.- S.6.