Dünyada Azərbaycandan gözəl məkan yoxdur

“Ölkəmizi tanıyaq” layihəsi çərçivəsində İsmayıllı-Qəbələ-Şəki marşrutu üzrə maarifləndirici tur-aksiyanın sonuncu iştirakçıları- qazaxlı şagirdlər sentyabrın 6-da rayona qayıtdılar.

AzərTAc xəbər verir ki, tur-aksiyanın iştirakçılarını rayon rəhbərliyi, müəllimlər və valideynlər qarşıladılar.

Qrupun rəhbəri Əziz Məmmədov tur-aksiyanın yekunları haqqında məlumat verərək dedi: “Dörd günlük ekskursiyamız çərçivəsində gəzdiyimiz və ilk dəfə gördüyümüz yerlər şagirdlər üçün çox maraqlı idi. Bu səyahət onlarda doğma Vətənə olan məhəbbəti qat-qat artırdı. Əksəriyyəti ilk dəfə rayon ərazisindən kənara çıxan şagirdlərimiz İsmayılı, Qəbələ və Şəki rayonlarının görməli və gəzməli yerləri ilə tanış oldular. Gördülər ki, Azərbaycanın hər bir guşəsi gözəldir. Doğma Azərbaycanımız haqqında daha geniş məlumat topladılar. Bizə bu şəraiti yaratdığına görə dövlətimizin başçısına dərin minnətdarlığımızı bildiririk”.

Qazax şəhər 2 nömrəli tam orta məktəbinin X sinif şagirdi Kənan Rəfiyev ekskursiyanın yekunu ilə bağlı təəssüratlarını bu sözlərlə ifadə etdi: “İsmayıllı, Qəbələ və Şəki rayonlarının tarixi abidələri ilə böyük maraqla tanış oldum, görməli yerlərini gəzdim. İsmayıllıda qədim sənətkarlar məskəni Lahıcla, Qəbələdə “Beltmann” piano fabriki ilə, Şəkidə xan sarayına baş çəkdim. Bir daha başa düşdüm ki dünyada Azərbaycandan gözəl məkan yoxdur.

Bu gün biz və Göyçay rayonundan olan həmyaşıdlarımız Azərbaycan Prezidenti İlham Əliyevin tapşırığı ilə avqustun 1-dən sentyabrın 6-dək davam edən “Ölkəmizi tanıyaq” maarifləndirici tur-aksiyasının birinci mərhələsinin sonuncu iştirakçıları olaraq səyahətimizi başa vurub evimizə qayıtdıq. Qarşıda tur-aksiyanın ikinci və üçüncü mərhələləri var. Arzu edirəm ki, bu tur-aksiyalar davamlı olsun və biz Vətənimizin hər bir guşəsi ilə tanış olmaq imkanı qazanaq. Biz məktəblilərə bu şəraiti yaratdığına görə Prezident İlham Əliyevə tur-aksiyaların iştirakçısı olan bütün məktəblilər adından minnətdarlığımı bildirirəm”.

Azərbaycan.-2014.- 7 sentyabr.- S.2.