Ermənistan NATO-nun Uels sammitində çox ciddi zərbə aldı
Sentyabrın 4-5-də keçirilən NATO-nun Uels
sammitinin yekun bəyannaməsində Azərbaycanın
ərazi bütövlüyünün,
müstəqilliyinin və
suverenliyinin dəstəklənəcəyi
bildirildi. Bəyannamənin Azərbaycandan bəhs
edilən 30-cu maddəsində
deyilir ki, alyans tərəfdaşlıq
etdiyi ölkələrin
kənar təzyiqlərdən
asılı olmadan müstəqil seçim, sərbəst xarici siyasət və müdafiə hüquqlarını
dəstəkləməyə davam edəcək.
Sammitdə çıxış edən
Prezident İlham Əliyev bir daha təcavüzkar Ermənistanın həyata
keçirdiyi etnik təmizləmə, insanlığa
qarşı törətdiyi
soyqırımı cinayətlərini
dünyaya bəyan etdi. Dövlət
başçısı bildirdi
ki, Azərbaycan ilə NATO arasında tərəfdaşlığın iyirmi ili
ərzində ölkəmiz
alyansın bir çox fəaliyyət sahəsinə töhfə
verən etibarlı tərəfdaşa çevrilib.
Prezident İlham Əliyevin NATO-nun
sammitindəki çıxışı
ölkəmizdə birmənalı
olaraq yüksək səviyyədə qarşılanmış
və politoloqlar, siyasətçilər qeyd
etmişlər ki, bu toplantıda da Azərbaycanın ərazi bütövlüyünün
bir daha tanınması Ermənistanı
çıxılmaz duruma
salmışdır.
Milli Məclisin
Təhlükəsizlik və
müdafiə komitəsinin
üzvü Zahid Oruc hesab edir
ki, Ermənistanın
NATO-nun Uels samitində
iştirakı simasızlıq
idi. Çünki hamı bu ölkənin xarici siyasət maraqlarını
və addımlarını
yaxşı bilir.
Onun sözlərinə
görə, bir dövlət ki bütövlükdə Kollektiv
Təhlükəsizlik Müqaviləsinin
üzvü və eyni zamanda, Rusiyanın
hərbi bazalarının
yerləşdiyi əsas
məskən olaraq paralel şəkildə Avrasiya İqtisadi Birliyinə qoşulmaq qərarı veribsə, onun NATO ilə təmasları bir anlam kəsb etmir: "Şübhəsiz,
Rusiyaya Ukrayna hadisələri üzündən
bağlanmış qapılar
Ermənistan üçün
açılırsa, düşünmək
olmaz ki, bu, sadəcə müxtəlif dövlətlərə
bərabərhüquqlu yanaşmadan
irəli gəlir. Belə hesab edirəm ki, NATO-nun Cənubi Qafqaz üçün xüsusi planı var və Ermənistan
guya Rusiya ilə razılaşdırılaraq
o tədbirə getməklə
orada casus rolunda çıxış edir.
Öncə həmin qurumun
tribunasından Azərbaycan
əleyhinə çıxışları
heç bir effekt vermədiyindən, əksinə, NATO-nun hazırkı
dönəmdə, sanksiyaların
dili ilə danışdığı zamanda
Ermənistan çox ciddi zərbə aldı".
Zahid Orucun fikrincə, Prezident İlham Əliyevin çıxışında əsas
diqqət ona yönəldildi ki, Azərbaycan bu gün Əfqanıstanın
həyatında bir neçə istiqamətdə
vacib missiyanı həyata keçirir. Azərbaycan Əfqanıstana
uzunmüddətli inkişafın
təmin edilməsi üçün hərtərəfli
yardım edir. Həmçinin ölkəmizin
hava məkanı, o cümlədən qonşu
regiondakı proseslərə
təsirimiz baxımından
əhəmiyyətli yer
tuturuq: "Belə olan təqdirdə Azərbaycan sülh ixracatçısıdır. Bu sözü Ermənistan haqqında danışmaq olmaz. Ona görə də
NATO-nun Uels sammitinin zirvə görüşünü
Ermənistan üçün
çox uğursuz hesab edirəm. NATO Rusiyanı separatçı
adlandırırsa, o zaman
erməni qüvvələri
də separatçıdır.
Əgər kənar müdaxilə
ilə bunu həyata keçirirlərsə,
Azərbaycanın praktikasında
bu, Ermənistandır.
Düşünürlər ki, Rusiyaya qarşı birləşmək
lazımdır. Amma Ermənistan
kimi işğalçı
dövləti azad buraxırlar. Krıma görə
Rusiyanı cəzalandırmaq
məsələsi qaldırılırsa,
o zaman Qarabağa görə Ermənistanı
da cəzalandırmaq lazımdır. Cənab Prezidentin
məntiqi və siyasi üslubu çox güclüdür
və onun mövqeyi beynəlxalq aləmdə indi daha çox qəbul olunur. Qərb dairələri Azərbaycanın
həqiqətlərini daha
yaxşı başa düşürlər".
Milli Məclisin Beynəlxalq münasibətlər və
parlamentlərarası əlaqələr
komitəsinin üzvü
Asim Mollazadə isə deyir ki, Uels sammitində
dövlət başçısının
çıxışı zamanı fikirlərini məhz Dağlıq Qarabağ münaqişəsinə
yönəltməsi müsbət
haldır və bu, onu göstərir
ki, Ukraynada bu gün baş
verən hadisələrlə
yanaşı, Ermənistan-Azərbaycan,
Dağlıq Qarabağ münaqişəsinə
dünya səviyyəsində
diqqət var. Deputatın
fikrincə, Azərbaycan
da bu münaqişənin
beynəlxalq səviyyədə
həll olunmasında maraqlıdır və beynəlxalq ictimaiyyətdən
bu münaqişənin
həllinə dəstək
gözləyir. Asim Mollazadə bildirdi ki, Azərbaycan tərəfi beynəlxalq ictimaiyyətdən təcavüzkara
qarşı konkret təqiblər, sanksiyalar gözləyir: "Bu gün
Ukrayna ilə bağlı belə bir sanksiyalar qəbul olunur. Ermənistan bu cinayətləri daha öncə həyata keçirib.
Amma indiyə qədər münaqişə həll
olunmayıb. Ona görə
də Azərbaycanın
istəyi ondan ibarətdir ki, təcavüzkara qarşı
ciddi tədbirlər, sanksiyalar tətbiq edilsin".
Deputatın sözlərinə görə,
NATO-nun sammitində ən
böyük iclas Əfqanıstan üzrə
görüş olub. Bu iclasda 60-dan çox dövlət rəhbəri
iştirak edib. Həmin iclasda çıxış edən
dövlət başçısı
İlham Əliyev ilk olaraq Dağlıq Qarabağ problemindən söz açıb, iclasda iştirak edən dövlət başçılarına Ermənistanın
işğalçılıq siyasəti və hazırda bu istiqamətdə vəziyyətin
nə yerdə olması ilə bağlı məlumat verib. Prezident iclas iştirakçılarına
bir daha bildirib ki, Azərbaycan
regional təhlükəsizlik və sabitlikdə mühüm rol oynayır.
Bununla belə, bu gün regionumuzdakı təhlükəsizliyə ən
böyük hədə
Azərbaycan ərazisinin
iyirmi faizini təşkil edən Dağlıq Qarabağ və yeddi ətraf
rayonu işğal altında saxlayan Ermənistanın işğalçılıq
siyasətidir. Ermənistan azərbaycanlılara
qarşı etnik təmizləmə siyasəti
həyata keçirib və bunun nəticəsində
1 milyondan artıq insan qaçqın və məcburi köçkün vəziyyətinə
düşüb. BMT Təhlükəsizlik Şurasının
4 qətnaməsi Ermənistan
qoşunlarının işğal
edilmiş ərazilərdən
dərhal və qeyd-şərtsiz çıxarılmasını
tələb edir.
Əfsuslar olsun ki, Ermənistan onlara məhəl qoymamaqda davam edir və
münaqişə həll
olunmamış qalır.
Rəşad
BAXŞƏLİYEV,
Azərbaycan.-2014.- 10 sentyabr.- S.4.