Şəkidə I Beynəlxalq Teatr Festivalı keçirilir

"Azərbaycan teatrı 2009-2019-cu illərdə" Dövlət Proqramının icrasına uyğun olaraq sentyabrın 10-dan 19-dək respublika Mədəniyyət və Turizm Nazirliyi və Şəki Şəhər İcra Hakimiyyətinin təşkilati dəstəyi ilə Şəki şəhərində I Beynəlxalq Teatr Festivalı öz işinə başladı.

Tanınmış mədəniyyət və incəsənət xadimlərinin, teatrsevərlərin, şəhər ictimaiyyəti nümayəndələrinin iştirak etdikləri açılış mərasiminin rəsmi hissəsində əvvəlcə son illər teatrların maddi-texniki bazasının yaxşılaşdırılması sahəsində həyata keçirilən məqsədyönlü tədbirlərdən bəhs edən film nümayiş etdirildi.

Mərasimi mədəniyyət və turizm naziri Əbülfəs Qarayev açaraq Azərbaycan teatrının keçdiyi tarixi yola qısa nəzər saldı, son illər teatrlarımızın qazandıqları uğurlar barədə danışdı. Nazir bildirdi ki, bu gün ilk dəfə olaraq yeni teatr mövsümü Şəkidə açılır. 142 illik tarixi olan Azərbaycan teatrının tarixində yeni bir dövr başlanır. XXI əsrin teatrının düşüncəsi, qüdrəti və qüvvəsi insanlarla bağlıdır. O insanlarla ki, Azərbaycan teatrının inkişafı yolunda özlərini fəda edirlər, öz istedad və bacarıqlarını əsirgəmirlər. Sözsüz ki, bu teatr fədailəri Azərbaycan Prezidenti İlham Əliyevin, Heydər Əliyev Fondunun prezidenti Mehriban Əliyevanın mədəniyyət sahəsindəki tarixi xidmətlərini, gördüyü işləri yüksək qiymətləndirərək, bu qayğıdan bəhrələnərək teatrın inkişafına öz töhfələrini verirlər.

Ə.Qarayev bildirdi ki, bu gün bəlkə də bir neçə il öncə ağlımıza belə gəlməyən bir layihənin gerçəkləşməsində iştirak edirik. Şəkidə I Beynəlxalq teatr festivalı başlayır. Teatr binasının yenidən qurularaq belə gözəl görkəm almasında, həmçinin teatrın inkişafında əməyi olan bütün insanlara təşəkkürünü bildirən nazir bu teatrda hələ bir çox layihələrin həyata keçiriləcəyinə əminliyini ifadə etdi. Vurğuladı ki, şübhəsiz teatrın qapıları həmişə nəinki Şəki sakinlərinin, eləcə də bütün regionun teatrsevərlərinin üzünə açıq olacaq.

Ə.Qarayev dedi: "Son illər Azərbaycanda teatr anlayışı o qədər tanınıb, tamaşaçılar tərəfindən qəbul olunub ki, artıq tamaşaçıların da tələbatı və maraqları haqqında düşünülür. Son 8 ildə respublikamızın teatrlarında 750-dən çox yeni tamaşalar səhnələşdirilib və ya bərpa olunub. Son 5 ildə Azərbaycan teatrları 20-dən artıq ölkədə öz tamaşalarını nümayiş etdirməyə müvəffəq olublar, yəni Azərbaycan teatrını təbliğ ediblər. Bu, çox yaxşı haldır. Hazırda teatrlarımızda dünyanın bir çox ölkələrinin tanınmış teatr xadimləri, rejissorlar, aktyorlar, rəssamlar fəaliyyət göstərirlər. Eyni zamanda, Azərbaycan teatrının yeni nəsli müxtəlif aparıcı teatrlarda təhsil alırlar".

Nazir bildirdi ki, bu gün biz artıq teatrların yeni binası haqqında deyil, yeni dünyası, müasir dövrün müasir teatrları haqqında düşünürük, danışırıq. Çox sevindirici haldır ki, bu gün bu proses nəinki Azərbaycanın paytaxtında, eləcə də bütün bölgələrdə özünü büruzə verməkdədir.

Ə.Qarayev çıxışının sonunda yeni teatr mövsümünün bütün teatrlar üçün uğurlu olacağına, çox maraqlı təqdimatların keçiriləcəyinə əminliyini bildirdi.

Mərasimdə Şəki Şəhər İcra Hakimiyyətinin başçısı Elxan Usubov çıxış edərək belə mötəbər tədbirin və festivalın Şəkidə keçirilməsinə göstərdiyi dəstəyə görə Mədəniyyət və Turizm Nazirliyinin rəhbərliyinə şəhər sakinləri, teatrsevərlər adından minnətdarlığını bildirdi. Vurğuladı ki, Azərbaycanın qədim mədəniyyət mərkəzlərindən olan Şəki artıq festivallar şəhərinə çevrilib. Bu festival cari il Şəkidə keçirilən sayca 4-cü beynəlxalq festivaldır.

İcra başçısı bildirdi ki, son illər respublikamızın hər yerində olduğu kimi, Şəkidə də sənət ocaqlarının, tarixi abidələrin bərpasına yüksək diqqət və qayğı göstərilir. Tədbirin keçirildiyi, əsaslı şəkildə yenidən qurularaq 2013-cü ildə istifadəyə verilən bu yaraşıqlı teatr binası da məhz Prezident İlham Əliyevin Azərbaycan mədəniyyətinə, teatrın inkişafına göstərdiyi diqqət və qayğının bariz nümunəsidir. İcra başçısı bu qayğıya görə dövlətimizin başçısına, eləcə də Azərbaycanın birinci xanımı, Heydər Əliyev Fondunun prezidenti Mehriban Əliyevaya şəkililər və sənətsevərlər adından minnətdarlığını bildirdi.

Ölkəmizi festivalda on iki tamaşa ilə on iki teatr - Azərbaycan Dövlət Akademik Milli Dram Teatrı, Dövlət Gənc Tamaşaçılar Teatrı, Dövlət Kukla Teatrı, həmçinin Gəncənin, Şuşanın, Lənkəranın, Mingəçevirin teatr kollektivləri təmsil edir. Azərbaycan Dövlət Pantomima Teatrının, Dövlət Rus Dram Teatrının, Şəki Dövlət Dram Teatrının, Qax Dövlət Kukla Teatrının, həmçinin Azərbaycan Dövlət Musiqili Teatrının tamaşaları da festival iştirakçılarının ürəyincə olacaq. Onu da qeyd edək ki, Rusiya Federasiyası Kalmıkiya Respublikasının Milli Dram Teatrı B.Manciyevin "Mən aktrisayam", Q.Musrepov adına Qazaxıstan Dövlət Akademik Uşaq və Gənclər Teatrı İrarı-Qayıpın "Estay-Korlan" tamaşaları ilə festivalda iştirak edirlər. Bu günlərdə tamaşaçılara N.Qoqolun "Evlənmə", L.Nurenin "Müharibə", Ü.Hacıbəylinin "Ər və arvad", Ə.Haqverdiyevin "Kimdir müqəssir", M.F.Axundzadənin "Müsyö Jordan və dərviş Məstəli şah", X.Eçeqarayın "Mahir aradüzəldənlər", Ə.Əmirlinin "Varlı qadın" və digər maraqlı əsərlər təqdim olunacaq. Tamaşalar Şəki Dövlət Dram Teatrında və Şəki Amfiteatrında göstəriləcək. Festival müddətində Şəki Dövlət Dram Teatrının foyesində müxtəlif sərgilərin təşkili də nəzərdə tutulur.

İki ildən bir keçirilməsi planlaşdırılan Şəki Beynəlxalq Teatr Festivalının sonuncu günü sentyabrın 19-da görkəmli gülüş ustası, respublikanın xalq artisti, Dövlət mükafatı laureatı Lütvəli Abdullayevin anadan olmasının 100 illiyi münasibəti ilə mərasimin keçirilməsi və böyük sənətkarın Şəki şəhərindəki adını daşıyan küçədə büstünün açılışı da teatr bayramının proqramına daxildir.

Telman NƏZƏRLİ,

Azərbaycan.-2014.- 11 sentyabr.- S.11.