Kütləvi informasiya vasitələri Azərbaycanın

milli maraqlarını ciddi qorumalıdır

Xəbər verildiyi kimi, avqustun 29-da Azərbaycan Respublikası Prezidenti Administrasiyasının rəhbəri, akademik Ramiz Mehdiyevin sədrliyi keçirilən müşavirədə Azərbaycan Respublikasının informasiya təhlükəsizliyi ilə bağlı bir sıra aktual məsələlər geniş müzakirə olunub.

Müşavirədən irəli gələn məsələlərlə bağlı Azərbaycan Mətbuat Şurasının təşkilatçılığı ilə sentyabrın 12-də Şəkidə “Azərbaycanın informasiya təhlükəsizliyi bölgə mediası müstəvisində” mövzusunda konfrans keçirilib.

Konfransda iştirak edən Mətbuat Şurasının sədri Əflatun Amaşov bölgə jurnalistlərinə müsahibəsində bu sahədə görülən işlər barədə məlumat verib. Qurumun rəsmisi deyib: “Həmin müşavirədə Azərbaycanın informasiya təhlükəsizliyinin, milli maraqlarının qorunması məsələsi gündəmə gəldi. Bəs görəsən, bu məsələlər media müstəvisində necə qorunur? Ölkə mediası, ümumiyyətlə, Azərbaycanın informasiya təhlükəsizliyini, milli maraqlarını qoruyurmu? Bu məsələlərə aydınlıq gətirmək üçün Azərbaycan Mətbuat Şurası müşavirədən dərhal sonra Azərbaycanda fəaliyyət göstərən bütün redaksiyalara müraciət ünvanlayıb. Həmin müraciətə əsasən, redaksiyalarda müşavirədə qoyulan məsələlərə həsr olunmuş daxili yığıncaqlar keçirilib, təkliflər hazırlanıb. Mətbuat Şurası daha sonra Beynəlxalq Mətbuat Mərkəzində geniş tərkibli konfrans keçirib və həmin tədbirdə redaksiyaların təklifləri yenidən dinlənilib”.

Bu təkliflərin nədən ibarət olduğuna aydınlıq gətirən Ə.Amaşov bildirib ki, bir sıra redaktorlar kütləvi informasiya vasitələri haqqında qanunvericiliyə dəyişikliklərin olunmasını arzulayırlar. Çünki onların fikrincə, artıq Azərbaycanda yeni bir jurnalistika növü – onlayn jurnalistikası yaranıb. İnformasiyaların əldə olunmasında, ictimaiyyətə çatdırılmasında, insanların şərəf və ləyaqətinin qorunmasında həmin KİV-lərdə müəyyən problemlər var və vətəndaşlar bu məsələlərdən narahatdırlar. Xəbər portallarının qeydiyyat məsələsi, bu portallarda xəbərlərin düzgün verilməsi məsələsi, Azərbaycanın milli maraqlarının qorunmasında həmin KİV-lərin buraxdığı səhvlər gündəmə gəlir.

Ə.Amaşov deyib: “Bu məsələlər daha çox Azərbaycan-Ermənistan sərhədində, təmas xəttində avqustun əvvəllərində baş verən olaylarla əlaqədar üzə çıxıb. Həmin dövrdə bir sıra xəbər portalları üzərlərinə düşən missiyanı layiqincə yerinə yetirə bilməyiblər. Onlar hərbi birləşmələrin yerləşməsi, dislokasiyası, hərbi texnikanın sayı, növləri, canlı qüvvələrin sayı və digər məsələlər barədə ictimaiyyətə açıq-aydın və eyni zamanda yanlış məlumatlar, bəzi məqamlarda isə sərhəd bölgələrinin boşaldılması, insanların təşviş içərisində yaşaması kimi təxribat xarakteri daşıyan məlumatlar veriblər. Bütün bunların hamısı düşmənlərimizin, yəni ermənilərin dəyirmanına su tökmək kimi bir şeydir. Bu məsələlər Mətbuat Şurasını, Azərbaycan jurnalistikasını ciddi narahat edir. Təbii ki, Azərbaycan dövləti, ölkə rəhbərliyi də bu məsələlərlə bağlı öz narahatlığını bildirib”.

Mətbuat Şurasının rəhbəri bildirib ki, regionlarda ilk olaraq Şəkidə keçirilən bu tədbir yerli jurnalistlərin də bu məsələyə münasibətini öyrənmək, təkliflərini dinləməkdir. Gələcəkdə belə toplantılar digər regionlarda da keçiriləcək. Azərbaycan Mətbuat Şurası bütün bu təklifləri ümumiləşdirərək müvafiq qurumlara təqdim edəcəkdir.

Azərbaycan.-2014.- 13 sentyabr.- S.9.