Baş nazirlər Azərbaycan-Türkiyə əlaqələrinin daha da

dərinləşdirilməsi məsələlərini müzakirə ediblər

Türkiyənin Baş naziri Əhməd Davudoğlunun Azərbaycana səfəri

Azərbaycan Respublikasının Baş naziri Artur Rasizadə sentyabrın 19-da ölkəmizdə rəsmi səfərdə olan Türkiyə Respublikasının Baş naziri Əhməd Davudoğlu ilə görüşüb.

Əvvəlcə Azərbaycanın və Türkiyənin Baş nazirlərinin təkbətək görüşü olub.

Sonra görüş nümayəndə heyətlərinin iştirakı ilə geniş tərkibdə davam etdirilib.

Baş nazir Artur Rasizadə ölkələrimiz arasındakı dostluq və qardaşlıq münasibətlərindən danışıb. Bildirilib ki, Azərbaycan və Türkiyə bütün istiqamətlərdə, o cümlədən siyasi, iqtisadi, humanitar sahələrdə uğurla əməkdaşlıq edir.

Artur Rasizadə Əhməd Davudoğlunun bu səfərinin ölkələrimiz arasında əməkdaşlığın daha da güclənməsinə töhfə verəcəyinə əminliyini bildirib.

Dünyada baş verən hadisələr fonunda hər iki ölkənin münasibətlərinin daha sıx olmasının vacibliyini vurğulayan Azərbaycanın Baş naziri deyib ki, yeni çağırışlarla üzləşdiyimiz hazırkı zamanda biz daha güclü olmalıyıq.

Azərbaycan-Türkiyə əməkdaşlığının gələcəkdə daha da inkişafı üçün yaxşı potensialın olduğunu vurğulayan Artur Rasizadə hər iki ölkənin birgə reallaşdırdığı iri layihələrin əhəmiyyətini diqqətə çatdırıb.

Türkiyənin Baş naziri Əhməd Davudoğlu yüksək səviyyəli qarşılıqlı səfərlərin münasibətlərimizin inkişafında önəmli rol oynadığını qeyd edib.

Baş nazir Əhməd Davudoğlu qardaş ölkələrimizin son 10 ildə keçdiyi inkişaf yoluna nəzər salaraq qeyd edib ki, Azərbaycanın və Türkiyənin birgə həyata keçirdiyi uğurlu layihələrə artıq dünya dövlətləri də maraq göstərir. Türkiyənin Baş naziri əmin olduğunu bildirib ki, ölkələrimiz arasında dostluğa və qardaşlığa söykənən əlaqələr daha da genişlənəcək.

Görüşdə qarşılıqlı maraq doğuran bir sıra məsələlər ətrafında fikir mübadiləsi aparılıb.

Azərbaycan.-2014.- 20 sentyabr.- S.5.