Aleksis Şaxtaxtinski: Azərbaycanın dini

tolerantlıq təcrübəsi dünyaya yayılmalıdır

Sentyabrın 19-da Milli Məclis sədrinin müavini Bahar Muradova ATƏT-in Bakı layihə əlaqələndiricisi, səfir Aleksis Şaxtaxtinski ilə görüşüb.

Milli Məclisin mətbuat xidmətindən AzərTAc-a bildiriblər ki, səfir ATƏT Parlament Assambleyasının bu yay Bakıda keçirilən 23-cü illik sessiyasının yüksək səviyyədə təşkilinə və uğurla başa çatmasına görə Milli Məclisə təşəkkürünü bildirib. O, təmsil etdiyi qurumun yeni əməkdaşlarını təqdim edib, ATƏT missiyasının planlaşdırdığı layihələrdən söhbət açıb. A.Şaxtaxtinski məlumat verib ki, dini tolerantlığın təşviqi ilə bağlı hazırladıqları layihə Azərbaycanın Xarici İşlər Nazirliyində təsdiq olunub. Bu il noyabrın 17-də Bakıda həmin mövzuda konfrans keçiriləcək. Dünyanın bir sıra ölkələrindən din xadimlərinin, tanınmış alimlərin, siyasətçilərin, Avropa Şurası və UNESCO kimi nüfuzlu beynəlxalq qurumların nümayəndələrinin, universitetlərin və vətəndaş cəmiyyəti təmsilçilərinin dəvət olunacağı tədbirin məqsədi Azərbaycanın dini tolerantlıq məskəni olmasını və bu sahədəki müsbət təcrübəsini dünyaya yaymaqdır.

A.Şahtaxtinski deyib ki, son dövrlər durmadan radikallaşan dünyada xalqları və millətləri, dövlətləri bir-birinə qarşı qoyan müxtəlif meyillərin güclənməsi müşahidə olunur. Bu baxımdan müsəlman ölkəsi olan Azərbaycanda tolerantlığın çox yüksək səviyyədə olduğunu göstərmək, ATƏT regionundakı qonşu ölkələrdə dini tolerantlığın vəziyyətinə nəzər salmaq, müqayisəli təhlillər aparmaq vacib və faydalıdır. Beynəlxalq miqyasda terrorizmin qarşısının alınması üçün bütün dünya dözümsüzlüyə, zərərli meyillərə qarşı mübarizədə səylərini birləşdirməlidir.

ATƏT-in Bakı layihə əlaqələndiricisi dini tolerantlığın təşviqinə dair konfransın yüksək səviyyədə keçirilməsi üçün Milli Məclisin hərtərəfli dəstəyinə ehtiyac duyduqlarını bildirib. O, həmçinin konfransın proqramının layihəsi barədə məlumat verib və təşkilati işlərlə bağlı məsləhətləşmələr aparıb.

Bahar Muradova ölkəmizdə yeni mandatla fəaliyyətə başlamış ATƏT missiyasının ümumi məsələlərdən uzaqlaşaraq konkret, nəticə verən işlər görməsinin razılıqla qarşılandığını bildirib. B.Muradova bu formatda əməkdaşlığın hər iki tərəfə böyük fayda verəcəyinə inandığını söyləyib.

Milli Məclis sədrinin müavini dünyada gedən proseslərə toxunaraq qeyd edib ki, hər hansı problemin nəticələrindənsə onun səbəbləri və əlamətləri ilə mübarizə aparmaq daha səmərəlidir.

Görüşdə səslənmiş təkliflərə münasibətini bildirən B.Muradova bildirib ki, dini tolerantlığın təşviqinə dair layihəni dəstəkləyir. O deyib ki, Azərbaycan bu sahədə malik olduğu üstün cəhətləri, mövcud təcrübəsini bölüşməyə, mövqeyini ifadə etməyə hazırdır. B.Muradova əminliklə qeyd edib ki, Milli Məclis ATƏT missiyasının Bakı təmsilçilərinə köməyini əsirgəməyəcək.

Azərbaycan.-2014.- 20 sentyabr.- S. 8.