İsrail səfiri: Azərbaycanda
tolerantlıq, mədəniyyətlərarası və dinlərarası
dialoq siyasəti respublika
Prezidenti İlham
Əliyev tərəfindən uğurla davam etdirilir
Yəhudi
Xəbərlər Agentliyi (YXA) “Amerikalılara Azərbaycan yəhudilərindən
bəhs etməli” sərlövhəli məqalə dərc
edib. Məqalədə Azərbaycanın ABŞ-dakı səfirliyinin
və İsrailin Azərbaycandakı səfirliyinin ötən
həftə ABŞ-da həyata keçirdikləri birgə
proqramdan bəhs olunur.
Məqalədə
deyilir: “İsrailin Azərbaycandakı səfiri Rafael
Harpazın və Azərbaycanın ABŞ-dakı səfirliyinin
müşaviri Məmməd Talıbovun iştirak etdikləri
proqramın məqsədi Azərbaycan-İsrail münasibətləri
və respublikada yəhudilərin həyatı barədə həqiqətin
amerikalılara çatdırılmasıdır”.
Vaşinqtonda,
Filadelfiyada və Nyu-Yorkda Azərbaycan-İsrail proqramı
çərçivəsində birgə tədbirlər
keçirilib.
İsrailin
Azərbaycandakı diplomatik nümayəndəliyindən Yəhudi
Xəbərlər Agentliyinə bildirilib ki, səfir Rafael Harpaz
və Məmməd Talıbov Vaşinqtonda Amerika Universitetinin
İsrail Mərkəzində keçirilən seminarda, Amerika
Yəhudi Komitəsi (AJC), Yəhudi Respublikaçılar
Koalisiyası (RJC) və ACCESS Gənc Peşəkarlar Təşkilatı
tərəfindən təşkil olunmuş konfransda, habelə
AJC-nin Filadelfiya rəyasət heyəti və AJC-nin gənc
rusdilli liderləri qarşısında çıxış
ediblər.
İsrail
diplomatik nümayəndəliyində YXA-ya bildiriblər ki, “bu
tədbirlər zamanı səfir Rafael Harpaz Azərbaycan və
İsrail xalqları arasında çoxillik dostluq münasibətlərindən,
iki ölkənin qarşılıqlı faydalı əməkdaşlığından
söhbət açıb, çoxsaylı suallara cavab verib”.
Səfir
Rafael Harpaz öz çıxışlarında və suallara
verdiyi cavablarda şəxsi diplomatik təcrübəsinə əsaslanaraq
vurğulayıb ki, Azərbaycanda antisemitizm yoxdur, respublikada yəhudi
icmaları sərbəst və təhlükəsiz
yaşayırlar.
İsrail
səfiri Azərbaycan xalqının ümummilli lideri Heydər
Əliyevin respublikada tarixi tolerantlıq ənənələrinin
inkişafına sanballı töhfəsini xüsusi qeyd edib.
Səfir
Rafael Harpaz həmçinin bildirib ki, tolerantlıq, mədəniyyətlərarası
və dinlərarası dialoq siyasəti Azərbaycanda respublika
Prezidenti İlham Əliyev tərəfindən uğurla davam
etdirilir.
Azərbaycan.-2014.- 23 sentyabr.- S.4.