Qırğızıstan Milli Kitabxanasının 80 illik yubiley

tədbirlərində Azərbaycan da təmsil olunub

M.F.Axundzadə adına Azərbaycan Milli Kitabxanasının direktoru Kərim Tahirov Qırğızıstanın paytaxtı Bişkekdə keçirilən Qırğızıstan Milli Kitabxanasının 80 illik yubiley tədbirlərində iştirak edib.

Milli Kitabxanadan AzərTAc-a bildirilib ki, tədbirdə Qırğızıstan Milli Kitabxanasının direktoru Jıldız Bakaşova təmsil etdiyi qurumun fəaliyyəti haqqında geniş məruzə ilə çıxış edib.

Yubiley tədbirində Azərbaycan Milli Kitabxanasının direktoru, Türkdilli Ölkələrin Milli Kitabxana direktorları şurasının vitse-prezidenti Kərim Tahirov çıxış edərək Qırğızıstan Milli Kitabxanasına xoş arzularını çatdırıb, kollektivə gələcək işlərində uğurlar arzulayıb.

Sonra qonaqlar hədiyyələrini Qırğızıstan Milli Kitabxanasının direktoruna təqdim ediblər.

Tədbir çərçivəsində Azərbaycan Milli Kitabxanasının direktoru Kərim Tahirov Avrasiya Kitabxanalar Assambleyası (БAE) əməkdaşlıq təşkilatının XVI ümumi iclasında, “Avrasiya mədəni-humanitar məkanının möhkəmləndirilməsi və genişləndirilməsində Milli Kitabxanaların rolu” mövzusunda “dəyirmi masa”da və Türkdilli Ölkələrin Milli Kitabxana direktorları şurasının iclasında iştirak edib.

Türkdilli Ölkələrin Milli Kitabxana direktorları şurasının iclasını vitse-prezident Kərim Tahirov açaraq şuranın 2012-2014-cü illər fəaliyyəti haqqında məlumat verib.

İclasda ikitərəfli və çoxtərəfli əməkdaşlıq haqqında protokolun məqsədlərinə nail olmaq üçün işçi proqramın hazırlanması, türkdilli ölkələrin milli kitabxana direktorları şurasının strukturunun yaradılması, latın əlifbasında UNİCOD standartına əsaslanan resursların toplu kataloqunun inkişafı, informasiya texnologiyalarının tətbiqi məsələləri üzrə nəşrlərin mübadiləsi, türkdilli ölkələrin tarixi şəxsiyyətləri haqqında biblioqrafiyaların tərtibi və nəşri, türk tematikasına uyğun ədəbiyyatın mübadiləsi və başqa məsələlər geniş müzakirə olunub.

Azərbaycan.-2014.- 23 sentyabr.- S.12.