Türkiyə Xarici İşlər Nazirliyi: Türk diplomatın ATƏT-dəki yeni təyinatı başda Dağlıq Qarabağ olmaqla, həlli gecikdirilən münaqişələrin nizama salınmasında səylərimizi gücləndirmək baxımından bizi məmnun etmişdir

Türkiyə Xarici İşlər Nazirliyi İsveçrənin ATƏT-ə sədrliyi dövründə professor Talip Küçükcanın bu qurumda müsəlmanlara qarşı ayrı-seçkiliyə və islamofobiyaya qarşı mübarizə üzrə təmsilçi, Türkiyənin təşkilatda daimi nümayəndəsi Tacan İldemin isə münaqişələrlə bağlı əlaqələndirici təyin olunması ilə əlaqədar bəyanat yaymışdır.

Bəyanatda deyilir: "Bu təyinatlar Türkiyənin başda Dağlıq Qarabağ olmaqla, həlli gecikdirilən münaqişələrin nizama salınması çərçivəsində səylərini gücləndirməsi və islamofobiya ilə mübarizə sahəsində qətiyyətliliyini davam etdirməsi baxımından bizi məmnun etmişdir".

Bəyanatda vurğulanır ki, rəsmi Ankara ATƏT coğrafiyasında təhlükəsizliyin təmini istiqamətində hədəflərə nail olunmasına və təşkilatın hərbi-siyasi, iqtisadi, ekoloji və humanitar sahələrdə fəaliyyətinə töhfə verməyə davam edir.

Oqtay BAYRAMOV,

AzərTAc-ın xüsusi müxbiri

İstanbul

Azərbaycan.-2014.- 10 yanvar.- S.4.