Hər sahədə yüksəliş var

Goranboy sürətlə inkişaf edir, gözəlləşir, tanınmaz olur. Neçə vaxtdır ki, rayon mərkəzi tamamilə yenidən qurulur. Buradan müxtəlif səmtlərə yollar uzanır - Bakıya, Gəncəyə, Naftalana, Safıkürdə... Hamısı da bir-birindən abad.

Hər bir istiqamətə ikitərəfli yol çəkilib, müasir işıqlandırma sistemi, yaraşıqlı səkilər düzəldilib. Ətrafdakı binaların fasadları əsaslı təmir olunub, dam örtükləri təzələnib. Yolların qovşaqlarında güllü-çiçəkli dairələr yaradılıb.

Rayonda abadlıq və quruculuq işləri getdikcə daha geniş vüsət alır. Son vaxtlar burada bir-birindən yaraşıqlı neçə-neçə obyekt istifadəyə verilib. YAP rayon təşkilatı, uşaq şahmat məktəbi, şəhər üç nömrəli orta məktəb, qaz istismarı sahəsi və qaz paylayıcı məntəqəsi üçün yeni binalar tikilib, şəhər Mədəniyyət evində, bir sıra sosial obyektlərdə, o cümlədən ağsaqqallar evində əsaslı təmir işləri aparılıb.

Goranlı, Baxçakürdə, Tatarlı, Ağamalıoğlu kəndlərinə abad yollar çəkilib, Məşədiqaralar - Eyvazlılar yolu əsaslı təmir edilib. Dəliməmmədli şəhərinin, Qaradağlı, Qarqucaq və Yolqulular kəndlərinin yollarındakı körpülər düzəldilib. Kürəkçay üzərində 25 metr uzunluğunda yeni körpü tikilib. Son vaxtlar Qızılhacılı qəsəbəsində işıqlandırma sistemi təzələnib. Cinli Boluslu kəndində daxili yollara çınqıl döşənib. Xan Qərvənd kəndində qaz xətti qaydaya salınıb.

İllər boyu rayonda hamını düşündürən mühüm bir məsələ - su və kanalizasiya problemi həll olunur. Murov-Goranboy su kəmərinin inşası da başa çatır. Safıkürddə təmizləyici qurğu və bir neçə su anbarı inşa olunub. Murovdan gələn içməli dağ suyundan rayonun mərkəzindən əlavə, sərhəd bölgəsində yerləşən Tapqaraqoyunlu kəndində də istifadə olunur.

Regionların sosial iqtisadi inkişafı Dövlət Proqramının icrası ilə əlaqədar rayonun hər guşəsində, içtimai həyatın hər sahəsində əsaslı işlər görülür, iqtisadiyyat yüksəlir. Son vaxtlar ümumi məhsul istehsalı 4,2 dəfə artıb, əhalinin gəliri çoxalıb, ərzaq proqramı uğurla həll olunur. Sahibkarlıq sürətlə inkişaf edir. Abadlıq-quruculuq işləri bütün qəsəbə və kəndləri bürüyüb. İçtimai obyektlərlə yanaşı fərdi mənzillərin inşası da geniş vüsət alıb. Təkcə son vaxtlarda 596 fərdi ev tikilib, minlərlə iş yerləri açılıb. Əhaliyə qayğı məsələsi daim ön plandadır.

Rayonda iftixarla deyirlər ki, bütün bunlar Prezident İlham Əliyevin qayğısı və diqqətinin bəhrəsidir. Dövlət başçısı son illər dörd dəfə Goranboya səfər edib, vəziyyətlə ətraflı tanış olandan sonra tövsiyə və tapşırıqlar verib. Təkcə ötən ilin iyun və iyul aylarında Goranboyun sosial-iqtisadi inkişafının sürətləndirilməsinə dair əlavə tədbirlər haqqında iki sərəncam imzalayıb, 18 kəndi birləşdirən Goranboy - Yuxarı Ağcakənd avtomobil yolunun inşası məqsədilə 3 milyon manat vəsait ayırıb.

Prezidentin tapşırıqları uğurla yerinə yetirilir. Hər yanda sosial problemin həllinə böyük fikir verilir. Səhiyyə, təhsil və mədəniyyət ocaqlarının fəaliyyəti aybaay, ilbəil genişlənir. Xüsusən, təhsil sahəsində görülən işlər diqqəti daha çox cəlb edir. Təhsil sisteminin maddi-texniki bazası ilbəil möhkəmlənir. Son illər rayonda 25 yeni məktəb binası, xeyli əlavə tədris korpusu tikilib, 20 bina əsaslı şəkildə yenidən qurulub.

Sərhəd bölgəsində yerləşən Tapqaraqoyunlu kənd orta məktəbi üçün əlavə tədris korpusu inşa olunub. Hazırəhmədli kənd orta məktəbinin binası əsaslı təmir edilib. Hazırda Goran qəsəbə, Qarasuçu Yenikənd, Xınalı və Təhləkənd məktəbləri üçün yeni binalar tikilir. Təhsilin maddi-texniki təchizatının bütün məsələləri sistemli surətdə həll olunur. Təkcə son bir ildə 492 parta, 190 şkaf, 980 stul, 108 yazı lövhəsi və digər avadanlıq alınıb, laboratoriya üçün 6 ədəd müasir avadanlıq gətirilib. İl ərzində məktəblərə 65 adda 20,5 min nüsxə dərslik və metodik ədəbiyyat verilib. Kitabxanalar üçün işıqlı-yaraşıqlı otaqlar ayrılıb, bir çox məktəblərdə oxucu zalları təşkil olunub.

Təhsil sisteminin informasiyalaşdırılması üzrə dövlət proqramının tələblərinə uyğun xeyli iş görülüb. Məktəblərin hamısı kompyuter və kompyuter otaqları ilə təmin olunub, kompyuterlərin internet şəbəkəsinə qoşulması təmin edilib. Şəhər 1, 2 və 3 nömrəli, Qızılhacılı qəsəbə 1 və 2 nömrəli, Xanqərvənd, Eyvazlar və Qurbanzadə kənd məktəbləri, ümumən 31 məktəb internet şəbəkəsinə qoşulub.

Təhsil şöbəsinin müdiri İlham Hüseynov deyir ki, bütün bunlar tədrisin keyfiyyətinin yüksəldilməsinə, gənc nəslin dünya görüşünün artırılmasına kömək edir. Təhsil naziri Mikayıl Cabbarovun "...buraxılış sinfini bitirən hər bir şagird təhsil sənədi almalıdır" fikri rayonda rəğbətlə qarşılanıb. Buraxılış imtahanlarında iştirak edən 1101 nəfərin hamısı tam orta təhsil haqqında attestat alıb. Ali məktəblərə qəbul imtahanlarında iştirak edən 575 nəfərdən 324-ü yəni, 56,2 faizi tələbə bileti ala bilmişdir. Daha 93 nəfər orta ixtisas məktəblərində təhsil alır. Məzunlardan 14 nəfəri Heydər Əliyev adına Hərbi Akademiyaya, polis və Fövqəladə Hallar Nazirliyinin akademiyalarına, habelə, C.Naxçıvanski adına Hərbi Liseyə qəbul olunub. Ümumən isə həmin təhsil ocaqlarında oxuyan goranboylu gənclərin sayı 30 nəfərdən çoxdur. Gənclər Qaradağlı kənd orta məktəbinin şagirdi Elman Muxtarov Avropa çempionatında ikinci yerə çıxmış, Həsrət Cəfərov və Vəfadar Cəfərov Yunan-Roma güləşi üzrə respublika çempionu adına layiq görülmüşlər. Şahmat məktəbinin komandası respublika çempionatının seçmə yarışlarında yaxşı nəticələr əldə etmişdir.

Digər sahələrdə də uğurlar az deyil. Texniki yaradıcılıq üzrə baxış müsabiqəsində Dəliməmmədli şəhər orta məktəbinin 6-cı sinif şagirdi Sultan Mahmudovun "Avtomodel" əl işi ikinci yerə layiq görülmüşdür. Borsunlu kənd orta məktəbinin şagirdi Hikmət Kazımov "Ən çox sevdiyim idman növü" mövzusundakı rəsm musabiqəsində ikinci yerə çıxmış, şəhər 1 nömrəli tam orta məktəbin yetirməsi Ülkər Hüseynova "Heydər Əliyev və müstəqil Azərbaycan" mövzusunda keçirilən müsabiqədə diplomla təltif olunmuşdur. Əl işləri müsaqibəsinin respublika turunda isə Borsunlu kənd məktəbinin yetirməsi Aynur Cəfərovanın işləri xüsusilə fərqlənmişdir.

Rayon məktəbliləri fənn olimpiadalarında və müsabiqələrdə də fəal iştirak edirlər. 2013-cü ildə 9 şagird müxtəlif bilik yarışlarında fərqləndiklərinə görə Təhsil Nazirliyinin diplomlarına və qiymətli hədiyyələrə layiq görülmüşdür.

İstedadlı və xüsusu qabiliyyəti olan uşaqların aşkara çıxarılması və onların yaradıcılıq potensialının inkişaf etdirilməsi sahəsində uşaq gənclər idman məktəbində, şahmat məktəbində, texniki yaradıcılıq, ekoloji tərbiyə və təcrübəçilik mərkəzində sistemli işlər görülür.

İlham Hüseynov deyir ki, yeni tələblərə uyğun olaraq indi müəllimlərin üzərinə böyük vəzifələr düşür. Bu mənada Prezident İlham Əliyevin təsdiq etdiyi "Azərbaycan Respublikasında təhsilin inkişafı üzrə Dövlət Strategiyası" islahatların uğurla davam etdirilməsinə əsaslı zəmin yaradır. Bu mənada yeni ildən biz bütün işlərimizi yeni üslubda qurmağa çalışırıq.

Ötən ili hər sahədə uğurla başa vuran rayon sakinləri deyirlər ki, 2014-cü il Goran torpağı üçün daha uğurlu olacaq. Bu günlər Safıkürddə kənd sakinləri ilə keçirilən görüş zamanı bu barədə geniş söhbət getdi. Rayon icra hakimiyyətinin başçısı Nizaməddin Quliyev regionların sosial-iqtisadi inkişafı dövlət proqramının icrası ilə əlaqədar görülən işlər barədə danışdı və yeni ildə qarşıda duran vəzifələri xatırlatdı. Görüşdə kənd sakinləri də çıxış edərək sərhəd bölgəsində yerləşən Goranboyun inkişafına göstərdiyi qayğı və köməyə görə Prezident İlham Əliyevə dərin minnətdarlıqlarını bildirdilər.

Əhməd İSAYEV,

Azərbaycan.-2014.- 10 yanvar.- S.5.