Prezident İlham Əliyev 2013-cü ildə 10 193, fəaliyyətinin 10 ili ərzində isə 35164 məhkuma azadlıq bəxş edib

Azərbaycanda insan hüquq və azadlıqlarının yüksək səviyyədə qorunması Prezident İlham Əliyevin daim diqqət mərkəzində saxladığı prioritet məsələlərdəndir. Ulu öndər Heydər Əliyevin ikinci dəfə ölkəyə rəhbərliyindən sonra bu sahədə qəti addımlar atılmışdır. Respublikada humanizm siyasəti istiqamətində həyata keçirilən tədbirlər beynəlxalq aləmdə də dəyərləndirilmişdir.

Məhz Heydər Əliyev 1993-cü ildə hakimiyyətə qayıtdıqdan sonra əfv və amnistiya təsisatlarını bərpa etmişdir. 1998-ci ildə həm Şərqdə, həm də MDB məkanında ilk dəfə olaraq ölüm hökmünün ləğv edilməsi Heydər Əliyevin yüksək humanizmini xarakterizə edən amillərdən biridir. Ölüm hökmünün ləğvi ilə ulu öndər bir daha təsdiqlədi ki, Azərbaycanda insanların hüquq və azadlıqlarının qorunması dövlətin daim diqqət mərkəzində saxladığı əsas məsələlərdəndir.

1996-2003-cü illərdə 7 amnistiya və 32 əfv sərəncamı

ilə 21325 məhkum azadlığa qovuşub

Ulu öndərin uzaqgörən siyasətini davam etdirən və hər bir Azərbaycan vətəndaşının prezidenti olduğunu bu on il ərzində tam sübuta yetirən Prezident İlham Əliyev hətta cinayət əməlinə yol vermiş insanların da taleyinə biganə qalmamışdır. Məhkum olunmuş bir sıra şəxslərin, onların ailə üzvlərinin müraciətlərinə əsaslanan, məhkumların səhhətini, ailə vəziyyətini, bu müddətdə davranışlarını nəzərə alan, cəzadan azadetmənin tərbiyəvi əhəmiyyətini önə çəkən Prezident İlham Əliyev vaxtaşırı əfv sərəncamları imzalayır. Bu addım Azərbaycanda insan hüquqlarının etibarlı təminatını və demokratikləşməyə xidmət edən strateji siyasi kursun layiqincə davam etdirildiyini bir daha təsdiqləyir.

İnsan hüquq və azadlıqlarının müdafiəsi, Azərbaycan vətəndaşlarının şərəf və ləyaqətinin qorunması Prezident İlham Əliyevin həyata keçirdiyi dövlət siyasətinin əsasını təşkil edir. Bu istiqamətdə tədbirlər ölkəmizin beynəlxalq aləmdəki nüfuzunu daha da artırır, Avropa və dünya birliyinə inteqrasiyasını getdikcə sürətləndirir. "Biz ölkəmizdə demokratiyanın, insan hüquqlarının inkişafına və qorunmasına çox böyük əhəmiyyət veririk" - deyən Prezident İlham Əliyevin birbaşa tövsiyə və göstərişləri əsasında görülən sistematik işlər insan hüquq və azadlıqlarının müdafiəsi sahəsində xüsusi əhəmiyyət kəsb edir. İnkişaf etmiş demokratik ölkələrdə insan haqlarının təminatına və ümumbəşəri humanist dəyərlərin bərqərar olmasına xidmət edən əfv və amnistiya aktları olduqca yüksək dəyərləndirilir. Ümummilli lider Heydər Əliyevi böyük şəxsiyyət və siyasi lider kimi xarakterizə edən mühüm keyfiyyətlərdən biri də məhz bu idi ki, o, günahkarlara şans verərək bağışlamağı, islah etməyi bacarırdı. Ulu öndərin bilavasitə rəhbərliyi ilə 1995-2003-cü illərdə 7 amnistiya və 32 əfv sərəncamı imzalanmışdır. Amnistiya aktlarına əsasən 21325 məhkum azadlığa buraxılmış, ümumilikdə, 78 mindən artıq məhkuma bu amnistiya aktları şamil edilmişdir.

Prezident İlham Əliyev 2013-cü ildə 10 193 məhkumu bağışlayıb

Ulu öndər Heydər Əliyev tərəfindən əsası qoyulmuş əfv və amnistiya ənənəsi bu gün Azərbaycan Prezidenti İlham Əliyev tərəfindən davam etdirilir. Prezident İlham Əliyev 2003-cü ildən 2013-cü ilədək, yəni, fəaliyyətinin 10 ili ərzində 23 əfv sərəncamı imzalayıb. Ancaq konkret olaraq 2013-cü ildə dövlət başçısı 1 amnistiya aktı imzalayıb və 1 əfv sərəncamı verib. Sonuncu əfv sərəncamı 14 oktyabr 2013-cü ildə - Qurban bayramı münasibəti ilə imzalanıb.

1995-ci ildən 2013-cü ilədək olan dövrdə sayca 55-ci əfv sərəncamı ilə 153 nəfər əfv olunub. Dövlət başçısının humanizm prinsiplərinə əsaslanan bu fərman və sərəncamlarına əsasən, indiyədək 5683 nəfərdən çox məhkum azadlığa buraxılıb. Sonuncu amnistiya aktı isə 10 040 məhbusa şamil olunub. Bu isə onu deməyə əsas verir ki, ümumbəşəri dəyərlərə, hər bir fərdin mənafeyinin əsas götürüldüyü hüquqi dövlət quruculuğu prinsiplərinə həssas münasibətin əyani təcəssümü olaraq Azərbaycanda məhkumların əfv edilməsi - bağışlanması təqdirəlayiq ənənəyə çevrilib. Prezidentin əfv siyasəti beynəlxalq birliklər tərəfindən də dəyərləndirilir. Bu qətiyyətli addımı ilə cənab İlham Əliyev bir daha təsdiqləyir ki, Azərbaycanda insan hüquq və azadlıqlarının müdafiəsi dövlətin daim diqqət mərkəzində saxladığı zəruri məsələlərdəndir və bu istiqamətdə görülən işlər beynəlxalq aləmdə yüksək qiymətləndirilir.

Mərhəmət və humanizm məfkurəsi Heydər Əliyev Fondunun başlıca məramıdır

Ölkəmizin tərəqqisinə, dünya birliyinə inteqrasiyasına, ulu öndər Heydər Əliyev irsinin öyrənilməsinə, təbliğinə böyük dəstək verən Heydər Əliyev Fondu həyata keçirdiyi layihələrlə respublikamızın hərtərəfli inkişafına və vətəndaş cəmiyyəti quruculuğu prosesinin sürətləndirilməsinə öz töhfəsini verir, Azərbaycanın beynəlxalq aləmdə nüfuzunun artmasında xüsusi rol oynayır. Ümummilli liderin humanizm, insanpərvərlik ideyalarının praktik tətbiqi fondun fəaliyyətində əsas yer tutur. Mərhəmət və humanizm məfkurəsindən çıxış edərək insanlara daim qayğı, yardıma ehtiyacı olanlara kömək göstərmək Heydər Əliyev Fondunun başlıca məramlarındandır. Ümummilli liderin humanizm prinsiplərini layiqincə davam etdirən Heydər Əliyev Fondu yarandığı gündən etibarən xeyirxahlıq və mərhəmətlilik göstərərək yardıma ehtiyacı olan insanları daim diqqət mərkəzində saxlayır, onların problemlərinin həllinə yaxından kömək edir.

Müxtəlif səbəblər üzündən azadlıqdan məhrum edilmiş şəxslərin və onların yaxınlarının, ailə üzvlərinin fonda çoxsaylı müraciətlər etməsi vətəndaşların Heydər Əliyev Fondunun ali prinsiplərinə olan ictimai etimadının mühüm göstəricisidir.

Heydər Əliyev Fondunun prezidenti, UNESCO və İSESCO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə qəbul olunmuş amnistiya aktları ümummilli liderin humanist siyasətinə sadiqliyin bariz nümunəsidir. Fondun təşəbbüsü ilə irəli sürülən və Milli Məclis tərəfindən qəbul edilən amnistiya aktları da ölkə ictimaiyyəti tərəfindən daim böyük sevinc hissi ilə qarşılanır.

Son 10 ildə Heydər Əliyev Fondunun təşəbbüsü ilə Milli Məclisdə 3 dəfə amnistiya aktı ilə bağlı qərar qəbul olunub. Dövlət başçısı 2003-2013-cü illərdə 3 amnistiya aktına imiza atıb. Milli Məclis tərəfindən 2007-ci il mayın 8-də qəbul olunmuş qərarla 9877 məhkum barəsində, 2009-cu il 17 mart tarixli qərarla 9564 və 2013-cü il 7 may tarixli qərarla 10 040 məhkum barəsində amnistiya tətbiq edilmişdir. Statistikaya nəzər saldıqda isə görərik ki, Prezident İlham Əliyevin imzaladığı 3 amnistiya aktı 29481 nəfərə şamil olunmuşdur.

Onu da qeyd edək ki, əfv və amnistiya təsisatları bərpa edildikdən sonra 1995-ci ildən 2009-cu ilədək qəbul edilən 9 amnistiya aktı 96 mindən çox şəxsə tətbiq edilmişdir. Təxminən 25 min məhkum cəzaçəkmə müəssisələrindən azad olunmuşdur. "Heydər Əliyevin 90 illik yubileyi münasibəti ilə amnistiya elan edilməsi haqqında" Milli Məclisin 7 may 2013-cü il tarixli qərarı ilə, yəni, 10-cu amnistiya aktı 10 040 məhkuma şamil olunmuşdur. Son amnistiya nəticəsində 2268 nəfər azadlıqdan məhrumetmə cəzasından azad edilmişdir.

Beləliklə, rəqəmlərə bir daha nəzər saldıqda görərik ki, 10 amnistiya aktı təqribən 106 mindən çox məhkuma şamil olunmuş və təqribən 27 268 nəfər azadlığa qovuşmuşdur. Prezident İlham Əliyev 2003-2013-cü illər ərzində imzaladığı 3 amnistiya və 23 əfv sərəncamı ilə 35 164 məhkumu əfv etmişdir.

Ədalətli rəhbər, humanizm və insanpərvərlik ideyalarının daşıyıcısı

Bütün bunlar onu deməyə əsas verir ki, Azərbaycan Prezidentinin insan hüquq və azadlıqlarının qorunmasına böyük önəm verməsi xalqın dövlət başçısının ərtafında daha sıx birləşməsini təmin etmişdir. Son 10 ildə həyata keçirdiyi çevik və məqsədyönlü siyasətlə özünü təcrübəli dövlət xadimi, bacarıqlı rəhbər kimi təsdiqləməsi, real ideya və proqramlarla insanların inam və etimadını qazanması cənab İlham Əliyevin yüksək liderlik keyfiyyətlərinə malik olduğunu göstərmişdir. Dövlət başçısı siyasi lider olaraq insanları öz ideya və baxışları ətrafında toplamaq, onların iradələrinə, qərarlarına təsir göstərmək iqtidarında olduğunu sübuta yetirmişdir. Məhz bu keyfiyyətləri sayəsində də idarəçilikdə yüksək uğurlara imza atmış, cəmiyyətin əsas və həlledici hissəsini arxasınca apara bilmişdir. Azərbaycanda ictimai-siyasi sabitliyin, vətəndaş sülhü və həmrəyliyinin qorunub saxlanılması naminə ilk gündən nümayiş etdirdiyi yüksək prinsipiallıq, qətiyyət və əzmkarlıq Prezident İlham Əliyevin istənilən ekstremal situasiyada çevik və optimal qərar qəbul edən qətiyyətli lider olduğunu təsdiqləmişdir. Ulu öndər Heydər Əliyevin müəyyənləşdirdiyi inkişaf strategiyasının davamlılığını təmin edən Prezident İlham Əliyev milli maraqlara əsaslanan diplomatiya, demokratikləşdirmə, hüquqi dövlət quruculuğu istiqamətində ardıcıl və məqsədyönlü fəaliyyəti ilə məhz dövlət müstəqilliyinin praktik olaraq möhkəmləndirilməsini təmin etmişdir. Azərbaycanın ötən 10 ildə sosial-iqtisadi, siyasi, hüquqi və digər sahələrdə əldə etdiyi yüksək nailiyyətlər Heydər Əliyev siyasi kursuna alternativin olmadığını bir daha təsdiqləmişdir.

Prezident İlham Əliyevin ötən illərdə ölkədə siyasi barışığın, vətəndaş həmrəyliyi və sülhünün təmin olunması, etimad mühitinin formalaşdırılması istiqamətində atdığı addımlar onun ədalətli rəhbər obrazını şərtləndirən amillər sırasında xüsusi vurğulana bilər. Bu məqam ölkə rəhbərinin idarəçilik fəlsəfəsində humanizm və insanpərvərlik ideyalarının parlaq xətt təşkil etdiyini bir daha təsdiqləyir. Dövlət başçısının ötən 10 ildə qanunçuluğa, hüquq qaydalarına, ədalətə bağlı olması, vətəndaş hüquq və azadlıqlarının təminatçısı kimi çıxış etməsi onun yüksək humanizminin ifadəsidir. Dünyanın insan hüquqları sahəsində ixtisaslaşmış nüfuzlu təşkilatları da bunu açıq etiraf edir, cənab İlham Əliyevin insanpərvər dövlət başçısı olduğunu bildirirlər.

Rəşad BAXŞƏLİYEV,

Azərbaycan.-2014.- 22 yanvar.- S.15.