Ərəb mətbuatında dahi Azərbaycan şairi Nizami Gəncəvi yaradıcılığından bəhs edən məqalə dərc olunmuşdur

Birləşmiş Ərəb Əmirliklərində ingilis dilində nəşr olunan nüfuzlu "Arabian gazette" qəzetində jurnalist Rahma Raşdinin dahi Azərbaycan şairi Nizami Gəncəvinin yaradıcılığından, Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə Parisin Məktublar və Əlyazmalar Muzeyində, Strasburqun Reyn sarayında keçirilən sərgilərdən bəhs edən "Nizami Gəncəvi - böyük romantik və epik şair" sərlövhəli məqaləsi dərc olunmuşdur.

Məqalədə Nizami Gəncəvinin Xll əsrdə intibah dövrünün və Azərbaycanın böyük filosof şairi olduğu, söz sərrafının romantik duyğularla zəngin "Leyli və Məcnun" əsəri əsasında eyni adlı tamaşanın hazırlandığı, bu poemanın Şekspirin "Romeo və Cülyetta" əsərindən xeyli əvvəl qələmə alındığı və dünyada məşhur olduğu xatırlanır.

Müəllif şairin üçüncü epik poeması olan "Leyli və Məcnun" əsərinin 1188-ci ildə tamamlandığını, əsərin əsas məzmununun ərəb əfsanələrindən alındığını, psixoloji məqamlarla zəngin əsərdə iki gəncin nakam məhəbbətindən söhbət açıldığı barədə oxuculara ətraflı məlumat vermişdir.

Məqalədə qeyd edilmişdir ki, Nizami Gəncəvi şair olmaqla yanaşı, həm də dövrünün filosofu, astroloqu, həkimi, rəssamı, coğrafiyaşünası və tarixçisi olmuşdur.

Jurnalist şairin Azərbaycanın qədim şəhəri və dilbər guşəsi Gəncədə anadan olduğunu, onun xatirəsinə şəhər yaxınlığında mərmərdən məqbərənin inşa edildiyini, Bakıda Ədəbiyyat Muzeyinin şairin adını daşıdığını, əsərlərində zəngin müsəlman sivilizasiyasının ənənələrini yaşatdığını, bərabərlik, qardaşlıq və azadlıq kimi ideyaların əks olunduğunu və bütün bunların bu günün tələbi ilə səsləndiyinə görə aktuallığını itirmədiyini oxucuların diqqətinə çatdırmışdır.

Dövrünün tanınmış alim və şəxsiyyətlərindən olan Biruni, əl-Farabi, Rumi, Hafiz, Cami, Aristotel, Platon və digər dahilərin əsərləri ilə yaxından tanış olan, onların yaradıcılığından bəhrələnən Nizami Gəncəvinin mükəmməl "Xəmsə" yaratdığı və bu əsərin nəinki Şərq, həm də dünya ədəbiyyatının nadir incilərindən biri olduğu xüsusi vurğulanır. Şairin insanlara dostluq, yüksək keyfiyyətlərə, etik normalara, ictimai mühitdə qarşılıqlı anlaşmaya çağırış etməsi kimi fikirlərin əsərlərində yer aldığını xatırladan müəllif onun gələcək nəsil üçün qiymətli irs qoyduğunu bildirmişdir.

Nizami Gəncəvinin əsərlərinin sərhədlər tanımadığını, əlyazmalarının dünyanın məşhur muzeylərində saxlandığını, şairin yaradıcılığının Şərq və Qərb alimləri tərəfindən tədqiq edildiyini, bəşəriyyətin Azərbaycana Nizami Gəncəvi və digər dühalar bəxş etdiyini vurğulayan müəllif alman şairi Hötenin fikrinə istinad edərək Şərqin tanınmış 14 şairindən yeddisinin məşhur olduğunu və onların arasında Nizami Gəncəvinin xüsusilə seçildiyini bildirmişdir.

Qəzetdə Parisdə və Strasburqda Nizami Gəncəvinin həyat və yaradıcılığından bəhs edən sərgilərdə nümayiş etdirilən onlarla şəkil də verilmişdir.

Məqalənin tam mətni ilə http://arabiangazette.com/nizami-ganjavi-greatest-epic--romantic--poet saytından tanış olmaq mümkündür.

Əsgər ƏLİYEV,

AzərTAc-ın xüsusi müxbiri

Strasburq

Azərbaycan.-2014.- 28 yanvar.- S.8.