Azərbaycan ilə İtaliya arasında hərbi əməkdaşlıq planı imzalanmışdır

Yanvarın 28-də Müdafiə Nazirliyinin Beynəlxalq Hərbi Əməkdaşlıq İdarəsində "Azərbaycan-İtaliya ikitərəfli hərbi əməkdaşlıq üzrə müzakirələr" keçirilmişdir.

Müdafiə Nazirliyinin mətbuat xidmətindən AzərTAc-a bildirmişlər ki, tədbirdə nümayəndə heyətlərinə Azərbaycan tərəfdən Beynəlxalq Hərbi Əməkdaşlıq İdarəsinin rəisi, general-mayor Ramiz Nəcəfov, İtaliya tərəfdən isə İtaliya Silahlı Qüvvələrinin Baş Qərargahının 3-cü İdarəsinin rəis müavini, kontr-admiral Edoardo Kompiani rəhbərlik etmişlər. Müzakirələr zamanı ölkələrimiz arasında hərbi, hərbi təhsil və hərbi-texniki sahələrdə əməkdaşlığın mövcud vəziyyəti və inkişaf perspektivləri nəzərdən keçirilmiş, regional təhlükəsizlik məsələləri barədə fikir mübadiləsi aparılmışdır.

Sonda "Azərbaycan Respublikası Müdafiə Nazirliyi və İtaliya Respublikası Müdafiə Nazirliyi arasında 2014-cü il üçün ikitərəfli əməkdaşlıq Planı" imzalanmışdır.

Tədbirdə İtaliyanın Azərbaycandakı səfiri Ciampaolo Kutillo və İtaliya Silahlı Qüvvələrinin ölkəmizdə akkreditə olunmuş hərbi attaşesi, kontr-admiral Emanuele Botazzi iştirak etmişlər.

Azərbaycan.-2014.- 29 yanvar.- S.3.